هضرنا فيما سبق على أنواع مفاتيح التفيعل ديال نظام التشغيل وينداوز. إذا كنتي ما شفتيش المقال ها هو هنا :
اليوم أنهضرو على علاش ما خاصكش تآكتيفي الوينداوز بشي مفتاح لقيتيه فالانترنت وبالطريقة ديال برامج الكراك. وعلاش حتى ما خاصكش تشري من دوك المواقع لي كيبيعو الكي بـ 150درهم ولا 200.
إجابة على السؤال الأول, ما خاصكش تستعمل البرامج ديال الكراك لي كتولد مفاتيح بشكل اوتوماتيكي حيت كيكونو مدموجين معاهم طروجانات لي غايتجسسو عليك ويسرقو ليك لي دوني ديالك. وممكن يتسببو ليك ففايروسات تضرب النظام وتتسبب ففقدان البيانات.
وما خاصش تستخدم المفاتيح لي كتلقى فالانترنت حيت كيكونو مسروقين من ناس اخرين. وغالبا غاتوقفهم ليك مايكروسوفت مع المدة.
بالنسبة للسؤال الثاني, ما خاصكش تشري المفاتيح من المةاقع لي كيبيعوهم ب 120 140 حتى لـ 200 درهم. حيت دوك المفايتح لي كيجيبو دوك المواقع ما موثوقينش, وما يمكنش مايكروسوفت كتبيع المفاتيح ب 200 دولار, غاتبيعهم جملة لهاد المواقع باش يعاودو فيهم البيع بهاد الثمن البخس. فكر شويا اتبان ليك ماشي منطقية.
المصادر ديال هاد المفاتيح مجهولة, وكتكون مسروقة, يا إما كيسرقو لي كارط بونكير ديال الناس وكيشريو بيهم مفاتيح من عند مايكروسوفت, ولي كتكون طبعا مفاتيح أصلية ومافيهاش المشكل, وكيعاودو فيها البيع. وهنا ملي الشخص مول لاكارط كيدير الديكلاراسيون, مايكروسوفت كتتبع المفتاح لي تشرى بلاكارط وكتوقفو. وكترجع للسيد فلوسو. إذن لا شريتي نتا هاد المفتاح, غايتم التوقيف ديالو وغاتكون ضعتي فـ 200 درهم.
كاينين لي كيكونو مفاتيح ديال شي طالب سرقو ليه المايل ديالو وخداو بيه المفتاح, ومن بعد أنوريكم كيفاش تقدرو تاخذو مفتاح التفعيل أصلي عن طريق إيمايل جامعي خاصة للناس لي كيقراو فلافاك وفـ OFPPT. من بعد ما الطالب كيرجع المايل وكيديكلاري بداكشي, كيتم توقيف المفتاح.
كاينين لي كيكونو مفاتيح مسروقة من شركات ولي كتكون على شكل Volume وهاذو كيتم التوقيف ديالهم حتى هما.
إذن فجميع الأحوال داك المفتاح ماغايطولش عندك, لأنه ما مشريش بطريقة قانونية.
باش تحصل على مفتاح أصلي بلا مشاكل, ثلاثة الطريق لي كاينين. يا إما غاتشريه من مايكروسوفت وغايتقام عليك غالي.
يا إما غا تستخدم إيمايل جامعي وغاتاخذو فابور.
يا إما غاتشوف فالبيسي ديالك تحت الباطري ولا فاللور ديال البيسي راه كيكون واحد التيكي مكتوب فيه واحد المفتاح, وخا يكون ديال وينداوز 7 راه بإمكانك تأتكيفي بيه وينداوز 10.