كيفاش كيربحو المواقع الإلكترونية؟
المقصود بالمواقع الالكترونية هنا هي أي حاجة فالانترنت..
تطبيقات السوشل ميديا.. محركات البحث.. لي سيت ويب.. أي حاجة وسط عالم الانترنت..
طرق الربح ديال هاد المواقع مختلفة.. والبعض منها مشتركة.. مثلا معظمهم كيربح من الإعلانات.. كيفااش كيربحو من الإعلانات؟
نعطيك مثال كيف العادة.. لأنه بالمثال يتضح المقال..
لنفترض نتا صاوبتي موقع ديالك بهدف الربح.. كتصاوب الموقع ديالك وكتحط فيه المقالات والصور وما الى ذلك.. لحد الآن نتا مزال ماكتربح والو.. ملي كيكون الموقع ديالك جاهز.. كتدفع لكوكل آدسنس باش تولي تعرض الإعلانات ديالها فالموقع ديالك.. ومن خلال هاد الاعلانات غاتولي نتا تربح الفلوس..
امم كيفاش البلان زيد شرح..
اوكي.. نبقاو مع كوكل ديما لأنها هي أكبر منصة للاعلانات فالعالم.. فهاد كوكل كاينين جوج بلانات.. كاينة كوكل ادسنس لي هي مديورة غير للناشرين يعني الناس لي عندهم مواقع كتخدم فيها..
وكاين كوكل ادووردز لي هي مديورة للناس المعلنين.. الناس لي عندهم شركات مثلا وكيبغيو يروجو المنتوجات ديالهم.. فكيجيو عند كوكل كيعطيوها الفلوس وكيقولو ليها ديري لينا اعلان للمنتوج ديالنا.. وهنا كوكل كتحط المنتوج ديال دوك الاشخاص فالموقع ديالك وكتبقى تعطيك واحد النصيب من داكشي لي ربحات من عند المعلن.. ولكن كتربح الفلوس على قد الناس لي دخلو للموقع ديالك وشافو الاعلان.. عموما هاذي فكرة بسيطة باش تفهم كيفاش كيتم الربح من خلال الاعلانات.. ومن بعد غانشرح هاد الموضوع فمنشوور خااص.. لأنه فيه مايتقال..
.
هاذي هي الطريقة المشهورة ديال ربح المواقع.. لكن كاينة طرق اخرى لي كيكون فيها الربح بدون اعلانات..
هنا غانسلطو الضوء على مواقع التواصل الاجتماعي خصوصا فايسبوك وواتساب..
بالنسبة للواتساب راني ديجا دويت عليه وعلى طريقة الربح ديالو لي بغى يقراه يدخل لهنا:
هنا.
ف 2016 مارك شرا الواتساب ب 19 مليار دولار ! مبلغ خيالي رغم أن قيمة التطبيق فداك الوقت كانت يالاه مليار ونص دولار.. ويالاه كانو مطيليشارجينو حوالي 500 مليون..
فعلاش فنظرك مارك خلص هاد المبلغ الخيالي على قبل هاد التطبيق ؟
لأنه ببساطة بان ليه هذا هو التطبيق المربح ولي غايدخل ليه الزباابل دالفلوس.. والطريقة كاملة تكمن فبيانات المستخدمين..
كيعرفك معامن كدوي وشنو كتبغي وعلاش وكيفاش أي لعبة ذكرتيها فالشاط كيعرفها مارك..
هنا كيبدا اللعب الصحيح.. كيهز بياناتك يبيعها للمعلنين هاذي الأولى.. ويعاود يبيعهم لشركات اخرى مختصة فالذكاء الاصطناعي وما الى ذلك.. ويبيعها لجهات حكومية.. ورابع حاجة كيديفلوبي الابليكاسيون ديالو عن طريق بياناتك.. شفتي شحال من حاجة كيدير بالبيانات ديالك !
كاين منكم لي غا يتساءل كيفاش كيديفلوفي الابليكاسيون بالبيانات ديالي؟
يعني كيشوفك علاش كدوي كيفاش طريقتك فالحوار.. شنو الصعوبات لي كتلقى باش تكونيكطا شنو الحوايج لي كتبغيهم ومكتلقاهمش وشنو الطرق السهلة لي كتخليك تستعمل دوك التطبيقات. وهو كيزيد يديفلوبي اكثر التطبيقات ديالو باش يبقى مواكب التطور وماتجيش تطبيقات اخرى بمزايا اخرى وتدي ليه بلاصتو..
.
نفس الشيء كتعتامد عليه شركة كوكل.. غير هو شركة كوكل هربات حيت أي واحد كيستعمل نظام اندرويد راها كتعرفو فين كيمشي وشنو كيدير.. كتعرفك كثر من واليديك وصحابك. لأن أولا النظام ديال اندرويد هو ملك لشركة كوكل.
والبلاي سطور هو ملك لها أيضا.. وتطبيقات جيمايل ويوتيوب ودرايف وكروم وكوكل فوطو وهانكوس ومابس ديال الخرائط وبلاي ميزيك لي كتمزك بها فطيلي وبلاي فيديو والغراق ديال الابليكاسيون.. وعاد زيد عليها المواقع لي كتسجل فيهم بجيمايل كلهم كتكون عندهم الاطوغوزيسايون باش يوصلو ليك المعلومات ديالك وسط داك الموقع.. ويشوفوك اش كدير تم..
وكذلك العكس كيوقع ملي كتبغي تسجل فشي موقع بجيمايل ديالك.. كيقولك وافق على الشروط ومن بين دوك الشروط هو الوصول الى معلوماتك لي مرتبطة مع داك الجيمايل.. يعني حتى هما كتعطيهم الاوطوغيزاسيون باش يوصلو لكولشي.. وهما ايضا كياخذو بياناتك ويستغلوها يا اما فبيعها لجهات اخرى او يستغلوها فتطوير مواقعهم نيت..
وكاينين طرق اخرى للربح ولي هي الشراء من داخل المواقع او التطبيقات.. بحال المواقع لي كتبيع الضومينات او الهوستينغ.. او لي كتقدم خدمات مختلفة..
هاكا كيربحو المواقع الفلوس.. نتا هو سلعتهم.
