المعالج ولا البروسيسور هو العقل المدبر ديال الحاسوب.. نقدرو نقولو أنه هو الأب الروحي ديال الحاسوب.. الدور ديالو هو يجيري لينا جميع العمليات لي كتدار فالبيسي.. غير ملي كتحرك لاسوري راه البروسيسور كيعالج هاد العملية لي درتي.. وأيضا ملي كتفتح شي بروغرام البروسيسور هو لي مسؤول عليه.. فإذا كان عندك شي بروسيسور واعر فغاتلاحظ أن البروغرام تفتح بسرعة وإلى كان عيان غاتبقى شاد لاسوري وكتدير Actualiser على مايتفتح.. يعني كل كبيرة وصغيرة كتدوز على يديه هو مما يعني أن الدور ديالو كبير..
وفهاد المقال غادي نتعرفو على أنواع البروسيسورات والفرق بيناتهم وكيفاش تختار البروسيسور المناسب وكيفاش تفرق بين المزيان والعيان
مرحبا بك فالمقال الثاني من سلسلة تعرف على مكونات الحاسوب.. إلى ماكنتيش شفتي المقال الأول لي دوينا فيه على الكارت كرافيك وكنتي مهتم تعرف فسير تقراه بعدما تسالي هاد المقال..
ودبا ندخلو فالموضوع ديالنا.
فالعالم كاينين جوج شركات ديال البروسيسورات لي رائدين فهاد المجال والمنافسة مشتدة بيناتهم.. هما شركات كانو ضيوف الحلقة ديالنا فالمقال السابق وغانعاودو نستاضفوهم حتى فهاد الحلقة وقبل مانفتاتحو الجلسة مع الضيوف ديالنا.. غانضربو واحد الإطلالة صغيرة على كيفاش تتم صناعة هاد البروسيسورات وعلاش هما غاليين وعلاش ماكاينينش شركات بزاف كتنافس فصناعة هاد القطعة الصغيرة والمهمة..
المواد لي كيتم بها تصنيع هاد المعالجات هي السيليكون لي كيتستخرج من الرمال الصحراوية.. لأن هاد الرمال كتحتوي على 25% من السيليكون وكيديوها كيعرضوها لحرارة كبيرة مع عمليات اخرى باش كيخرجو ديك 25% ديال السيليكون ومن بعد كيشدو داك السيليكون وكيرجعوه على شكل قوالب ويقطعوه بأذاة حادة ديال الألماس وكيقطعوها على شكل قطع صغييرة.. من بعد كيديوها للمصنع فين غاتم معالجتها.. وهاد المصنع كيكون أنقى حتى من المختبرات والغرف الطبية، والعمال كيلبسوهم بحال دوك اللباسي لي كيلبسو الأطباء ديال كورونا هههه حيت المكان حساس بزااف وأي جزيئة صغيييرة تقدر تأثر على عملية المعالجة، إلى مشى شي حد فيهم عطس غا يخسر لهم اللعب ههه.. وكيشدو دوك الشرائح كيقادوهم حسب المعايير المتبعة ديالهم.. وكيبقاو فالمصنع لمدة شهر وهما غاكيتعالجو وخلال هاد الشهر كيدوزو فأكثر من 800 عملية معالجة حتى يضمنو أنها نقية 100%
من بعد كتجي العملية ديال الترونزيستورات لي هما القلب ديال البروسيسور.. الترونزيستور هو قطعة إلكترونية بلاما نتعمق فالشرح ديالها حيت غانوليو فحاجة اخرى تاني.. لمهم البروسيسور الكم الهائل ديال الترونزيستورات لي فيه خيالي كتلقى 10 مليون 200 مليون لي كيتزرعو بتقنية النانو متر ولي كياخذو أشكال طوابق باش تكفيهم المساحة..
وهاد المصانع ماكتسدش نهائيا 24/24 طيلة أيام الأسبوع وطيلة أيام السنة.. حيت العملية كتطلب وقت كبير والمصانع قلااال بزاف (طبعا ماشي غا AMD و Intel لي كاينين كاينين شركات اخرى بحال SAMSUNG مثلا ولكن هاذوك مختصين غا فالهواتف وحنى هنا كنهضرو على البيسيات )
والسبب هو أن هاد المصانع التكلفة ديال الماطيريال لي كتحتاج كبيييرة بزااف ماشي أي شركة تقدر تديرهم.
وداكشي علاش الثمن ديال البروسيسور كتلقاه كيساوي تقريبا الثلث ديال الحاسوب كامل.. وطبعا كل بروسيسور والقدرة ديالو على العمل داكشي راجع للتصنيع ديالو.. وطريقة العمل ديال البروسيسور ماغانهضرش عليها هنا حيت خاصها موضوع خااص بها لأنه فيه بزاف ما تقال.
كانت هاذي واحد النبذة مختصرة على صناعة البروسيسور.. أرى دبا نشوفو الأنواع ديالهم، كيف قلنا كاينين جوج شركات وكل وحدة عندها إصداراتها الخاصة وأيضا عندها مميزات وعيوب..
نبداو مع شركة Intel
لي كانت شحال هاذي غامقة على AMD وكانت مسيطرة والأكثر شهرة.. أنتل عندها بزاف ديال الأنواع دالمعالجات..
- معالجات Atom هاد النوع لي ماكيستهلكش الطاقة ومصمم غا للاجهزة المحمولة. باش يكون عندها عمر بطارية أطول.
- معالجات Celeron هاد النوع مخصص غا للاجهزة الضعيفة.. لي كتستعمل لتصفح الأنترنت فقط والقليل من البرامج الصغيرة.
- معالجات Pentium هاد النوع حتى هو كيخدم فالحواسيب المكتبية الضعيفة.. ماغاتقدرش دير بيه عمليات كبار من غير التصفح وشي لعيبات بساط بحالو بحال خوتو الفوق.
إلى عندك هاد الأنواع من البروسيسورات غا طفي داك البيسي يا صديقي وماتسولنيش علاش.. حيت كنظن راك عرفتي السبب
- معالجات Core 2 Duo هاد المعالجات لي فيهم بدات أنتل كتميز وكتقدم أكثر وهنا فين تفوقات على AMD حتى مابقاتش بيناتهم المنافسة.. وهاد النوع لي خرج بعدة عائلات ولي مزال لحد الآن كيتستعمل. نتعرفو على عائلات هاد المعالج:
فكل بروسيسور كتلقى واحد الرقم والحروف من مور داك الرقم ولنأخذ على سبيل المثال هاد البروسيسور: 8400QX
هنا الرقم 8 يعني أن المعالج من الجيل الثامن.
الرقم 400 يعني قوة المعالج شحال ماكان طالع شحال ما مزيان.
وكيجيو الحروف لي حنى هما عندهم دور كبير:
XQ: كتعني أن البروس رباعي النواة مما يعني أن الأداء ديالو قوي.
X: معالج ثلاثي النواة تاهو مزيان
Q: رباعي النواة كيتستعمل للحاسوب المكتبي
E: ثنائي النواة وماكيستهلكش الطاقة
T,P,L,U: هاذو كاملين عندهم معدل استهلاك دالطاقة نااقص
هاذو الأنواع ديال Core 2 Duo والى ماعندكش بيسي فيه معالج مثلا:
Intel(R) Core(TM)2 Duo E8400 @ 3.00 GHz
فراه ناقص اخاي.. حيت هذا هو أحسن نوع فال Core 2 Duo ولي مزال حتى لدبا خدام مابيهش.
هاذ الأنواع لي ذكرنا الفوق كاملين كيبقاو عيانين وإلى كنتي باغي تشري بيسي غير بعد عليهم كل البعد حيت ماخدامينش ليك.
أجي دبا نتعرفو على البروسيسورات لي جداد. ونبداو مع عائلة ال Core i
ولي هما i3 i5 i7 i9
هاذو تا هما عندهم أرقامهم وحروفهم لي كتخليهم يتميزو على بعضياتهم.. فمايغركش البيسي إلى شفتي فيه i7 حتى تشوف الأرقام والحروف لي تابعينو.
مثال:
i5 8600K 2.5 GHz 3.0 GHz
i7 2600E 1.5 GHz
هنا شحال من واحد كيتقولب.. فهاد الحالة راه الحاسوب لي فيه i5 أحسن من i7 حيت فايتو فالجينيراسيون وفال SKU وحتى فال Product Line وأيضا حتى فالتردد ديال المعالج.
كيفاش أخونا شنو كيعنيو دوك الأرقام والحروف وديك الروينة كاملة.
تهدن وخوذ نفس عميق وركز معايا نشرح لك وغاتفهم.
وخا ماتكون كتفهم تا لعبة فالبيسيات غاتشوف
i3 , i5 , i7 , i9
غاتقول ليا أنه شحال ما طلع العدد شحال ما كان البروس واعر. معلم داكشي لي كاين.. شنو الفرق بعدا بين هاذو.
ال i3 هو بروسيسور لي ماكيفوتش 2 نواة.
ال i5 و i7 فيهم 2 نواة و 4 نواة أو حتى 8 النواة على حسب.
ال i9 فيه 18 نواة..
كل ما كبرات النواة كلما كان البروسيسور مجهد وغاتحس بالأداء ديال البيسي سريع..
دبا أرى ليا الأرقام والحروف آش كيعنيو ناخذو المثال ديالنا نيت:
i5 8600K 2.5 GHz 3.0 GHz
رقم 8 هو الجينيراسيون ديال البروسيسور.. واحد النقطة مهمة هنا ولي كيمشي بنادم زالق فيها هي كيصحابليه أن الجيل 4 احسن من الجيل 3 لا يا صديقي راهم نفس البروسيسور نفس الأداء فقط الجيل 4 زايدين عليه شي تعديلات بحال البلان ديال الكارت كرافيك لي كنا دوينا عليه فالمقال السابق.. يعني الأجيال راهم كيمشيو بالجوج..
كتلقى الجيل الاول والثاني بنفس الأداء الاختلاف لي كاين هو غاتلقى فالجيل الثاني تحسين فأداء البروس من ناحية استهلاك الطاقة مثلا.
والجيل الثالث والرابع بنفس الاداء كذلك، والخامس والسادس كذلك، والسابع والثامن أيضا..
يعني مايدوخكش بنادم بهاد البلان.
عندنا رقم 800 هو أداء البروسيسور شحال ما كان طالع شحال ما مزيان..
وعندنا الحرف K ماكاينش غير هاد الحرف بل كاينين حروف آخرين وغانشرحوهم دبا. بداية بهاد الحرف نيت
K: Unlocked
يعني أن هاد البروس قابل لكسر السرعة بصورة قانونية.. يعني يقدر يفوت الجهد لي هو عليه وماغاديش يأثر ليك على باقي القطع.. وطبعا هادشي كيجعلو بروسيسور قوي.
U: Ultra-low Power
هاد النوع كيكون فيه جوج نواة وكيكون الأداء ديالو بين منخفض ومتوسط حيت مديور باش مايستهلكش الطاقة بزاف. باش يصبر أطول مدة مع المستخدم. ولا ينصح بهاد النوع للألعاب والبرامج الثقيلة مهما كانت قوة البروس حيت غادي غاتهلكو.
Y: Extremely low Power
هاد الحرف غاتلقاه فالبروسيسورات العيانين لي مديروين باش مايستهلكوش الطاقة بزاف وكيعتامدو عليه فصناعة الحواسيب المحمولة الرخيصة لي مديورة غا للتصفح وشي برامج خفاف.
X: Extreme performance processors
هاد الحرف غا تلقاه غا ف i7 و i9 وهذا يدل على قوة البروس بحيث غايعطيك أحسن أداء وأيضا كيسيبورطي كسر السرعة.
H: High performance graphics
هاد النوع لي فيه هاد الحرف مديور للحواسيب المحمولة ديال الألعاب وهنا كيعنيو بيه حتى لاكارط كرافيك وهنا كيكون البيسي فيه كارط كرافيك مدموجة ولي كتكون بأداء عالي وكتقاسم الدرك هي والبروس مما كيعطي أداء جيد رغم أنه فيه غير 2 نواة.
HK: High performance graphics, Unlocked
بلا شك فهمتي شنو كيعنيو هاد الحرفين نفس البلان ديال ال H غا زايدة عليه خاصية الكسر.
HQ: High performance graphics, quad core
نفس البلان ديال الفوق غا هو زايد بداك حرف Q لي كيعني أن البروس فيه 4 ديال النواة ماشي 2 وهذا مديور للبيسيات بورطابل ديال الكيمينغ بالدرجة الاولى.
T: Power-optimized lifestyle
هاد البروس كيكون غا فالحواسيب المكتبية.. كيكون الاداء ديالهم ضعيف لأنهم ماكيعتامدوش على تقنيات التبريد بزاف حيت البروسيسور مديور باش مايعطيش حرارة كبيرة.. لذلك هذا غا ديال الاعمال العادية.
F: Requires discrete graphics
هاد النوع كيعني أن البيسي مافيهش كارط كرافيك مدمجة ولكنها قوية شيئا ما ورخيصة مقارنة مع الاخرين.. لكن ينصح باستعمال كارط كرافيك خارجية الى بغيتي تستعمل الحاسوب لأعمال كبيرة.
M: Mobile
كما هو ظاهر على إسمها. مديورة للحواسيب المحمولة فقط وهي معالجات عادية ماكتبغيش الدرك مديورة للاستعمال العادي وغير مستهلكة للطاقة.
MQ: Mobile, quad core
بحال سابقتها غير هي فيها 4 نواة.
هاذي هي عائلة ال core i وهاذو هما البلانات ديالهم.
ندوزو للعائلة الأخرى ولي هي Xeon
هاد النوع من المعالجات أنا شخصيا هو أفضل نوع عندي لأنه فعلا رائع وكيقدم أداء رائع وكل مميز.. لكنه غالي الثمن. وكيستعملوه كباار الشركات مثل
AWS , Google Cloud , Microsoft Azure
يعني معالج كيتدار فالسيرفرات.
وكيعتامدو عليه فيه الأعمال ذات طابع الذكاء الاصطناعي والنمذجة ثلاثية الأبعاد وهذا يعني أن هاد البروس قوي جدا..
كتميز هاد البروسيسورات بذاكرة ECC لي هي واحد الذاكرة برمجية كتصحح الأخطاء لي كيوقعو فنظام البت (Bit) مثلا كانت شي عملية تقلب فيها الواحد مع الصفر كتكتاشفها هاد الذاكرة وكتصححها. هاد البلان كاين حتى فالحواسيب العادية لكنها غا كتديديكطي وماكتقدرش تصحح مما يتعذر عليك إكمال معالجة داك البرنامج وكيتشنج حيت وقع فيه شي خطأ وكيتعاود من جديد عوتاني.
هاد البروسيسورات أيضا كتدعم عدد الرامات لي يقدرو يوصلو حتى ل 512 جيكا من نوع DDR4 وهادشي كامل بسبب البيانات الكثيرة لي خاص تم معالجتها بسرعة وبدون أخطاء.
أيضا من بين مميزات هاد النوع من المعالجات أنها كتدعم تقنية Hyper-Threding لي كتخلي النواة الواحدة تولي 2 وأيضا تقنية Turbo Boost لي كتخلي البروس يفوت 4GHz وكتعطي أداء رائع جدا..
وهاد النوع من البوسيسورات كيتباع حتى فالحواسيب العادية غا هو ماغايكونش بهاد الكفاءة لي عند الشركات الكبار طبعا. لكنه أفضل نوع وعندو العشاق ديالو.. خصوصا ناس الديزاين والمونتاج والألعاب.
وحتى هي عندها أرقام وحروف خاصة بها.
كنلقاو E و E3 و E5 و E7
E: رباعي النواة أو سداسي النواة
E3: رباعي النواة
E5: رباعي النواة
E7: ثماني النواة
وكنلقاو حتى فالاخير ديال الارقام حروف بحال البروسيسورات لي ذكرنا الفوق.
L: هاد النوع ماكيستهلكش الطاقة بزاف
X: نوع يمتاز بأداء عالي جدا وهذا لي كيخدمو بيه الشركات
M: اداء متوسط
دبا ندوزو ل AMD ولي من أشهر أنواع البروسيسورات ديالها هما Ryzen
وفيه السيريات 3 و 5 و 7 و 9 و Trheadripper
Ryzen 3
هو الاقل كفاءة فيهم وكيقارن المعالجات ديال intel i3 غا هي فيها معالجات رباعية النواة وهي أرخص من intel.
Ryzen 5
هذا تا هو المنافس ديال i5 وكيعتامد على رباعية النواة حتى ل سداسية النواة.
Ryzen 7
نفس الأمر بالنسبة ل i7 رباعي النواة او سداسي او ثماني. وبعض المرات كيتفوق هاد المعالج على ال i7 فشي مهام.
Ryzen 9
هذا من أقوى البروسيسورات ولي فارض راسو عالميا وكينافس بقوة intel i9
Ryzen Threadrippers
هذا معالج من الطراز الرفيع مديور للاعمال القوية وغاتلقاه غا فالحواسيب المكتبية وماكاينش فالمحمولة.
شنو كيعنيو الأرقام والحروف
مثلا:
2600X
فهاد الحالة رقم 2 كيعني الجيل الثاني بحالو بحال البلانات ديال intel
رقم 6 كيعني نوع المستوى ديال الاداء رقم 4 و 5 و 6 هما مستويات عالية الاداء.. و 7 و 8 هما أكثر قوة ومديورين للاعمال القوية
أما الرقمان 00 فهما كيعبرو على SKU نوع الطراز ديال البروس
ايوا والحرف X كيعني أن الأداء ديال المعالج عالي وأنه كيستهلك الطاقة وأنه كيدعم تقنية ال XFR لي بحالها بحال تقنية Hyper لي فأنتل.
وأيضا كاينين حروف أخرى:
H: هذا كيعني أن البروسيسور قوي وكيستهلك الطاقة وغاتلقاه فالبسيات الكبار حيت كيحتاج التبريد أكثر.
U: هذا ضعيف مديور لأجهزة الحواسيب المحمولة لي ماكتسخنش بزاف وماكتستهلكش الطاقة بزاف.
G: هذا كيعني أن المعالج معاه كارط كرافيك مدمجة من نوع Radeon RX Vega
ولي كيتعاونو بجوج باش كيعطيونا أداء زوين.
تقريبا هادشي لي كاين حاولت نعطي أدق التفاصيل بغض النظر عن الدخول فآلية عمل البروسيسور لأنه هذاك موضوع خاص وخاصو مقال مفصل خاص.. هنا غاتبان ليكم الرؤية وغاتفهمو أنواع البروسيسورات ملي تبغيو تشريو البيسي..
كيبقى السؤال المطروح شكون لي حسن واش AMD ولا Intel
غانقولك عوتاني أنه ماكاينش لي أحسن نتا كتشوف شنو غايناسبك.. لكن غانعطيكم واحد المقارنة بيناتهم..
بالنسبة لسرعة المعالج:
أنتل كتفوق فهاد المسألة بحيث أنها كتلعب على هاد النقطة.. لكن فنفس الوقت هذا كيخلي هاد المسألة سيف ذو حدين.. فإذا وقع شي مشكل فعملية المعالجة كيتعكس البيسي وكيتبلونطا.. وهاد المسألة غاتكونو لاحظتوها بزاف الى كنتو من مستعملي ال intel. ولكن حتى ال AMD مزيانة وهي أقل سعر من منافستها.
بالنسبة للألعاب:
شركة أنتل أيضا تتفوق فهاد المسألة بحيث أن معظم الألعاب مبنية على نظام DirectX بحيث أن هاد النظام كيلعب على كفاءة وسرعة النواة.. وأنتل كتلعب على هاد النقطة لأنها عندها معالجة سريعة.
درجة الحرارة:
فهاد المسألة أيضا آنتل كتفوق على AMD بحيث أن بروسيسورات AMD كتستهلك الطاقة أكثر وكتسخن اكثر.
ولكن حتى AMD كتمتاز بالاستقرار ديالها فالأداء خصوصا فالبرامج الكبار ديال المونتاج والموسيقى.. والسعر ديالها رخيص مقارنة مع أنتل.
إلى هنا السي سيدات تنتهي حلقتنا.. ودبا الى خديتي هاد المعلومات وزدتي عليهم المعلومات ديال الكارط كرافيك ماغاتلقاش مشكل فاختيار الحاسوب لي غايناسب المتطلبات ديالك..
ومن بعد غانزيد مقال آخر نشرح فيه RAM و Disque Dur حتى هو باش تكتامل الرؤية أكثر
