سبق لينا دوينا على المعالج، لي بغى يتعرف أكثر عليه.
دبا غانهضرو على الكارت كرافيك..
قبل الخوض فالتفاصيل شنو هي الكارت كرافيك بعدا ؟ هي المسؤولة على لافيشاج هي لي كتطلع لينا الصورة وأي حاجة كتطلع فالشاشة من كتابة وصور وأيقونات وأي حاجة كتآفيشا بمجرد ماكيشعل البيسي.. فإلى ماكانتش غايشعل البيسي ولكن ماغاتبان لك تا حاجة فليكرون.. يعني هي العوينات ديال البيسي.
هاد الكارت كرافيك كتكون فيها جوج أنواع.. كاينة لي كتكون مدموجة مع البروسيسور، بحال مثلا معالج i5 4790 فيه كتكون معاه كارت كرافيك HD 4600
وهاد النوع من لي كارط كيكونو مثلا من صنع شركة intel ولا amd حيت هما لي كيصنعو البروسيسورات وكيصنعو معاهم حتى هاد النوع من لي كارت كرافيك لي كتكون الجودة ديالهم ضعيفة.. يعني ماغاتخدمش ليك برامج وألعاب كباار.. مديورين غا للافيشاج والبروغرامات الصغار بحال البروغرامات ديال ميكروسوفت اوفيس (الوورد والاكسل ..) ودوك البروغرامات العاديين لي صغيورين وماكيحتاجوش كارط كرافيك قوية.. وأيضا يقدرو يخدمو ليك حتى الفوتوشوب والالستراتور الى كانو إلى كانت شي كرافيك مزيانة..
ما كيستهلكوش موارد كبيرة وكيتفرقو المهام ديالهم شويا كتديه الرام والبروسيسور وشويا كتديه لاكارط كرافيك.. وكاين بروسيسورات لي ماكتكونش فيهم كارت كرافيك بحال معالجات أنتل لي كتسالي بحرف F وهذا كيفضلوه الناس ديال الكيمر، حيت كيكون ذو كفاءة كبيرة وكيزيدو معاه كارط كرافيك خارجية.
وكاين النوع الثاني لي هما لي كارط كرافيك لي كيكونو بوحدهم.. يعني كتشريها بوحدها وتجيبها تلصقها فالبيسي ديالك.. وهاد النوع كيتصنعو من طرف جوج شركات مشهورين، Nvidia و AMD
.
سؤال يقدر يكون كيراودك دبا.. واش يمكن ليا نزيد كارط كرافيك فبيسي بورطابل ؟
الجواب هو لا مايمكنش تزيدها فالقطع ديالو الداخلية حيت ماعندكش بلاصتها.. لكن يمكن ليك دير كارط كرافيك خارجية ولي كتسمى eGPU كتكون عبارة عن كارط كرافيك خارجية مع باور سبلاي ديالها (مصدر طاقة). لكن كتبقى مفروشة حيت غاتبقى حاط حداك كارط كرافيك كبيرة ماجاتش.. داكشي علاش لا ينصح بشراء بيسي بورطابل الى كنتي مهتم بالالعاب.
شري بيسي بيرو باش هاكا لا بغيتي تزيد لاكارط كرافيك غاتلقى بلاصتها موجودة. لكن ماشي أي بيسي بيرو، خاصك بيسي تكون البواتيي ديالو كبيرة وينصح بنوع Tower هو لي تقدر دير فيه أغلبية لي كارط كرافيك وخا كاينين دي كارط كرافيك لي كبار بزاف وكيطلبو بواتيي كبيرة نيت.
.
الرواد ديال هاد المجال هما AMD و Nvidia.. بحيث هما الأولين فالعالم والمنافسة شرسة بيناتهم.. فإينفوا كتسمع كارت كرافيك كطيح فبالك شركة Nvidia و ATI ..
ناخذو لمحة تاريخية على الفريق الأخضر Nvidia والفريق الأحمر AMD
ديربي الكارت كرافيك ههه..
إلى لاحظتي كتبت ATI الفوق.. تعمدت نكتبها حيت خلال البحث ديالك غاتلقى هاد ATI وها كيفاش تا جات.
AMD:
هي شركة غنية عن التعريف وموجودة من 1969 إلى الآن.. البدايات ديالها كانت كتصنع البروسيسورات (CPU) وكانت كتبيعهم للشركات الاخرين لي كيصنعو الحواسيب.. بقات كدوز الوقت والشركة بدات كتستحوذ على شركات اخرى وكتبيع قطاعات من أعمالها.. لمهم ف 2006 غاتشري شركة ATI Technology ولي ولا قسم ديال صناعة وحدات معالجة الروسوميات (GPU) .. وحاليا كتصنع البروسيسورات والكارت كرافيك.. وكتباع تحت العلامة التجارية Ryzen للبروسيسورات، و Radeon للكارت كرافيك.
يعني لا شفتي هاد جوج كلمات عرف أن داك البرودوي ديال AMD
Ryzen: كتكون فالبروسيسور
Radeon: كتكون فالكارت كرافيك
ندوزو ل Nvidia تأسست حتى ل 1993 ومن الاول ركزات على صناعة الكارت كرافيك فقط.
والمنتوجات ديالها راها كتبيعهم تحت العلامة التجارية ديال اسمها نيت Nvidia
السؤال المطروح شكون هي أحسن شركة فهاد الجوج؟
مانقدرش نعطيك جواب حيت بجوج واعرين وديما كاينة التنافسية بيناتهم..
كل وحدة عندها مميزات على الاخرى وفالاخير نتا كتختار لي غايناسبك للاحتياجات ديالك..
الفرق بيناتهم كاين.. شركة Nvidia لي برودي ديالها غاليين ولكن قويين بزاف خصوصا فالألعاب.. يعني لا كنتي من عشاق الألعاب الكبار ف Nvidia أحسن اختيار.. وإذا كنتي من عشاق البروغرامات الكبار بحال برامج Adobe العملاقة ديال المونتاج وصناعة المحتوى الكبير فأحسن خيار هو AMD..
وشركة Nvidia كانت عندها قبل 2017 شهرة كبيرة بحيث كتاخذ نسبة 60% تقريبا وماتبقى لشركة AMD. ولكن AMD كتفوق عليها فمسألة الأثمنة فلي كارط كرافيك دياولها كيكونو رخاص شيئا ما مقارنة مع Nvidia. لكن حاليا فهاد الوقت بالضبط، AMD كتعيش واحد التطور لي سريع بزاف. وكاينة منافسة جد جد قوية فهاد اللحظة.
آخر كارت كرافيك ديال NVIDIA هي RTX3090 ولي تفوقات على آخر كارت دياال ATI لي هي RX 6900XT. لكن كاينة منافسة قوية.
كيفاش غانعرف الكارط كرافيك واش مزيانة ولا لا ؟ وكيفاش غانعرفها واش ديال Nvidia ولا AMD ؟
كيف قلت الفوق الكارت كرافيك ديال Nvidia ديما غاتلقاها كتبدا ب Nvidia Geforce وغاتلقى فيهم ثلاثة ديال الأنواع. يا إما GT ولا GTX ولا RTX وكاين أيضا نوع آخر لي هو Quadro وهاد النوع مديور للأعمال ديال الكرافيك.
بالنسبة للسيري ديال Geforce كيكونو متبوعين بأرقام وكيكونو فالاخير ديالهم حروف.. ناخذو كمثال
GT740
GTX930
RTX2080
شنو كيعنيو دوك الأرقام ؟
الرقم الأول كيعني الجيل ديال داك النوع من لاكارط كرافيك.. فمثلا ف GT740 هاد لاكارط من الجيل السابع.
والرقمين الأخيرين متعلقين بقوة الكارط كرافيك. كيفاش غانعرف واش دوك الارقام قويين ولا ضعيفين ؟
من 10 ل 30 هذا نوع ضعيف، وينصح باستعماله للاعمال العادية الى باغي تخدم شي بروغرامات صغار. ولا الفوطوشوب أو الاوتوكاد مثلا كيخدم لك ثقيل فالكارت كرافيك الاصلية يمكن ليك تزيد هاد النوع من لي كارط وغايخدم لك مزيان. ولكن مع المعالجات القوية الاخيرة راه هاد السيري ماغاتشكل حتى فارق، خصوصا ديك GT 710 كنشوف بنادم كيتلاح ليها بزاف، كتلقاه عندو i5 4eme جينيراسيون وكيدير ليه هاد الكارط كرافيك ! غير ضيعتي فلوسك على الخاوي حيت ماغادير حتى شي تغيير.
من 40 ل 60 هذا نوع متوسط، الى كنتي غاتلعب شي ألعاب على قد الحال فصالحة ليك هاد الكارت.
من 70 ل 90 هذا نوع جيد، وينصح للاعمال والالعاب لي كبيرة شويا.
والترتيب ديال هاد الأنواع كيجي على الشكل التالي:
GT هي العيانة حيت هي الاولى
GTX هي المتوسطة ومزال فيها موديلات قوية
RTX هي الأقوى
كاينين جوج أنواع ديال الحروف فلي كارط ديال Nvidia,
حرف M بحال مثلا GT760 M كتعني أن هاد لاكارط مخصصة للحاسوب المحمول..
وحرفي Ti وهذا كيعني أن الشركة زادت شي تعديلات على داك النوع من لاكارط..
لي كارط ديال ATI حتى هما عندهم أنواع وأرقام وحروف.. عندهم جوج أنواع XFX و RX
والمعيار باش نعرفو الكارط الأقوى حتى هو نفس المعيار لي كنديرو مع Nvidia.. على حسب الجيل والأرقام الاخيرة.. وكاينة فالأخير كنلقاو حرف X ولي كيعني أن ديك لاكارط تمت الترقية ديالها.
والترتيب ديال هاد النوعين RX أقوى من XFX
هادشي لي ذكرنا ماكافيش باش نعرفو آشمن كارط قوية.. وأغلب الناس كيسمعو أن هاد الكارك كرافيك فيها 2Gb كيقولك واو مزيانة ليا.. هذا معيار خاطئ. ماعمرك تدي على شحال الحجم ديال الكارط كرافيك.. حيت الكارط كرافيك مافيهاش غير الحجم. بل حتى هي فيها البروسيسور وفيها الرام.. وهاد المسائل حتى هما مهمين.. فخاصك تشوف قوة البروسيسور ديالها وحجم الرام ديالها والسرعة ديال الرام وسرعة المعالج لي كتقاس بالهرتز فمثلا فالبروسيسور كنلقاو السرعة ديالو مثلا 3.0 Ghz حتى فالكارت كرافيك كنلقاو السرعة دالمعالج 1700Mhz مثلا.
وخاصك تشوف أيضا الريزوليسيون ديالها واش كتناسب مع الشاشة لي عندك. وخاصك تشوف المعمارية ديالها لي الدور ديالها هو سرعة نقل البيانات.. فشحال ما كانت القيمة ديالها أكبر كتكون أحسن.. غاتلقى هاد الخاصية فكارط الشاشة عند Nvidia بإسم CUDA وعند AMD بإسم Opencl
مسألة أخرى مهمة عند ذكر الحجم ديال الكارت كرافيك.. إلى سمعتي 4Go سول على آشمن نوع واش GDDR1 ولا GDDR2 ... حتى ل GDDR6 لي هي الأقوى.. وشحال ما كان العدد أكبر شحال ما كانت الكارط أقوى..
نقطة أخرى مهمة أنواع الكارت الكرافيك ثلاثة:
Shared:
هاد النوع هو الأضعف بحيث كياخذ من الرام ديال البيسي حيت مافيهش رام خاصة وهاكا كيتقل ليك البيسي وخاصك تبقى ترفع من عدد الرامات عندك عاد باش تإيكليبريهم..
Dedicated:
هاد النوع مستقل بذاته.. عندو رامات ديالو كولشي ديالو ماكياخذ ليك والو من البيسي ديالك.. لكن من العيوب ديالو هو أنه كيدير حرارة كبيرة عند كثرة الاستخدام وكيستهلك الكهرباء.
Switchable:
هاد النوع كيكون فالبيسي بورطابل.. بحيث كيكونو جوج ديال لي كارط كرافيك وحدة كتكون صانعاها intel وهي الكارط كرافيك لي دوينا عليها الفوق كااع لي كتكون لاصقة فالبيسي وجاية معاه من المصنع.. وهاذي كيكون الدور ديالها مقتصر على عرض الشاشة وتشغيل البرامج الصغيرة.. والكارط كرافيك الثانية لي كتكون من صنع Nvidia او AMD داكشي علاش غاتبغي تشري بيسي بورطابل غايبقاو يقولو لك راه فيه دوبل كارط كرافيك. هذا هو بلان ديك الدوبل كارط كرافيك. هاد الكارط الثانية الدور ديالها هو تشغيل الالعاب والبرامج الكبيرة لي ماكتقدش عليهم الكارط الكرافيك الاصلية.. والهدف من هادشي هو تقليل الحرارة واستهلاك الطاقة..
حاجة اخرى مهمة تا هي قبل ماتشري الكارط كرافيك. خاصك تشريها حسب متطلبات الحاسوب ديالك.. فماشي نتا عندك بروسيسور على قد الحال وغاتشري ليه شي كارط كرافيك مفركعة هادشي ليس منطقي. وماخدامش.. خاصك تمشي على قد الحاسوب ديالك.
وأيضا ترد البال للمنافذ لي فيها مثلا واش باغي فيها ال HDMI , DP والمتطلبات لي باغي نتا.
وخاصك تشوف أيضا هاد الكارط واش كتدعم آخر التعريفات خصوصا ديال DirectX وتعريفات أخرى أيضا مثل Shader و OpenGL
وأخيرا خاصك تشوف واش الكارط كرافيك لي كتناسب المنفذ لي فالكارط مير ديال PCI Express والموديل ديالو.. أو AGP على حسب شنو عندك نتا..
سؤال أخير واش يمكن لينا نديرو أكثر من كارط كرافيك فالحاسوب ديالنا؟
الجواب هو نعم يمكن لينا إذا كانت المنافذ متوفرة لدينا.. فشركة Nvidia عندها تقنية خاصة بها ولي كتسمى بال SLI وأيضا كاينة تقنية خاصة ب AMD لي كتسمى بال Crossfire
هذا ما كان الموضوع خذا مني وقت كبير للكتابة وغانكون نسيت شي حوايج ما ذكرتهمش.. حاولت نجمع جميع المعلومات لي كتخص هاد الموضوع.. وأخيرا راه ماكاينش هاذي حسن من هاذي.. وإنما كتشوف نتا الكارت لي غاتنسابك وبالثمن لي غايناسبك.
أما بخصوص الأثمنة فمايمكنش ليا نقولكم الأثمنة لأن كل كارط والمواصفات ديالها وثمنها. لكن ديال ATI ناقصين شويا مقارنة مع NVIDIA.
