الأغلبية فينا كيفورماطي البيسي ديالو بشي نسخة من نسخ الوينداوز.. وكيطلبو منو باش يآكتيفي الوينداوز.. فطرق التفعيل كتختالف من واحد لآخر، كاين لي كيمشي يشري key من شي محل تجاري.. وكاين لي كيشريه من الأنترنت.. وكاين الفئة لي كيدخل يطابي فكوكل
key Activation Windows
ويدخل يبدا يجرب فدوك الكي كاملين حتى كيتقبل ليه، ولا كيطيلشارجي شي بروكرام يديدكتي ليه الكي لي غايناسبو اوتوماتيك.. لمهم الطرق تختلف..
حتى لهنا كولشي عادي، لي ما عاديش هو أن معظم الناس ماعارفينش الأنواع ديال هاد مفاتيح التفعيل شنو هما.
عندنا ثلاثة الأنواع:
النوع الأول: Retail
هاد النوع هو الأفضل والأقوى، لأنه مديور باش يتباع للشخص الواحد فقط.. وكيكون الثمن ديالو غالي كيوصل حتى ل 2000 درهم.. من المزايا ديالو أنه كيبقى معاك ديما في حالة بدلتي الحاسوب يكفي تفورماطي القديم وتدخلو فالحاسوب الجديد بشرط أنه يخدم فجهاز واحد فقط ماشي جوج أو أكثر.. إضافة للدعم السريع ديال ميكروسوفت، ملي كتراسلهم كيجاوبوك بزربا. وأفضل مكان ممكن تشري منو هاد الكلي هو الموقع الرسمي ديال ميكروسوفت، حيت حتى بعض المحلات كيكونو كيكذبو، كيقولك أنه Retail وكيبيع ليك شي نوع آخر.
.
النوع الثاني: OEM
هاد النوع كيجي فالمرتبة الثانية، العيب ديالو أنه ملي كتدخلو أول مرة فالبيسي كيلصق فاللوحة الأم، ومايمكنش تنقلو لبيسي آخر وخا تفورماطي كيبقى ديما فداك البيسي.. لكن الثمن ديالو رخيص كيتراوح ما بين 140 حتى ل 200 درهم. أو كيكون جاي مع البيسي من المصنع ديال الشركة. كاينين بيسيات كيجي معاهم وكاينين بيسيات كيكونو محايدينو منو.
كاينين بزاف دالمواقع لي كيبيعو هاد الكي. ولكن لا ينصح باش تشري منهم وهذا هو السبب علاش ما خاصكش تشري منهم.
بالنسبة للفرق ما كاينش شي فرق بينو وبين Retail من ناحية الخصائص، لكن الدعم ديال ميكروسوفت فين كاين الفرق.
.
النوع الثالث: Volume
هاد النوع هو الخايب ولا ينصح به، حيت هذا كيكون كيتباع للشركات فقط، ومن خلاله كيقدر الادمن يراقب كاع الأجهزة لي فيهم هاد الكي.. لذلك الى كان البيسي ديالك فيه هاد النوع غير حايدو حيت راك معرض للاختراق والتجسس.. وهاد الأنواع هما الأكثر انتشارا فالأنترنت وهما لي كتلقاوهم فلي سيت بزاف وكتبقاو تآكتيفيو بهم..
.
.
كيفاش نقدر نعرف آشمن نوع عندي فالبيسي؟
غاتمشي لابار روشيرش كتب cmd فتحها ك Administrateur كتب هاد الكوموند:
slmgr -dli
كليكي اونطخي غاتخرج ليك فونيطخ صغيرة فيها آشمن نوع عندك..
بحالي فهاد الحالة عندي RETAIL.
