مرحبا بك فهاد المقال لي غايكون على طريقة تحميل وتثبيت الاوبنتو على جهازك. سبقلي وتكلمت على نظام لينكس وعلى المزايا ديالو فهاد المقال نظام التشغيل لينكس وأيضا تكلمت علاش أغلب المستخدمين ما كيخدموش بيه فهاد المقال علاش نظام لينكس صعيب .
بما أنك جيتي تقرا هاد المقال إلا وعندك نظرة مسبقة على شنو هو لينكس عامة. وشنو هو نظام الأوبنتو. غير هو غانقولك علاش الأوبنتو بالضبط ؟
لأنني كنشوفها أكثر نسخة مستقرة وعندها مجتمع كبير كيدعمها وغاتلقى بزاف ديال الحلول فالانترنت في حالة خدمتي بهاد النسخة الجميلة وطحتي فشي مشكل. نعم جميلة وبسيطة وسهلة الاستخدام وخفيفة على الحاسوب وآمنة. هادشي كامل هو لي خلاني نختار أوبنتو بعد تجريبي للكثير من أنظمة التشغيل ديال لينكس.
إذن باش تحمل نسخة من هاد النظام غايخصك توجه للموقع الرسمي ديال أوبنتو لي غانخلي ليك الرابط ديالو هنــا
من بعد ما تفتح الموقع غا يطلع ليك هادشي, وهنا كيقولك بلي خاصك هاد المواصفات يكونو فالجهاز ديالك باش تقدر تخدم بهاد الفيرزيون لي كتعتابر هي آخر فيرزيون لحد كتابة هذه الأسطر.
ختار الفيرزيون لي بغيتي فهاد جوج. وإلى كانو مواصفات جهازك ناقصين, تقدر تقلب على الفيزيون ديال 14 ولا 18 غايخدمو ليك مزيان. من بعد ماتكليكي على Download لي باللون الأخضر, غادي ياخذك لصفحة أخرى لي غايتم التحميل فيها بشكل مباشر. وغايطلب منك المسار فين بغيتي يطيليشارجي النسخة. وفي حالة ما طيليشارجاش بشكل أوتوماتيكي كليكي على الجملية لي بالأزرق download now
من بعد ما يتم التحميل ديال النسخة وداكشي غايبقى راجع لسرعة الأنترنت ديالك طبعا. غاتحتاج فلاشة أو كلي USB باش تحط فيها النسخة ديالك وتبوتي بها للحاسوب ديالك وبعدها تقدر تآنصطالي التوزيعة.
الطريقة باش تحط التوزيعة فالكلي سبقلي وشرحتها ففيديو توضيحي دقة دقة وبطريقة جد مبسطة مع باستخدام برنامج سهل جدا. ها الفيديو يمكن ليه تفرج ليه.
من بعد ما دير هاد العملية أدوز للخطوة التالية. ولي هي تخشي الكلي فالبيسي طبعا. وغايخصك تقلع بالكلي. كيفاش غادير؟ غاتشعل البيسي والكلي راكبة طبعا. وغاتبقى تكليكي باستمرار وبسرعة على
F2 أو F9 أو F10 أو F12
هاد الأمر كيختالف من حاسوب إلى اخر. لكن لي شائعين بزاف هما: F2 و F12 إذن جرب هاذو هما الاولين. من بعد إلى مانجحاتش ليك العملية تقدر تفرج فالثلاثة دقايق الأولى من هاد الفيديو راني حطيت فيه الطريقة كيفاش تقاد الإعدادات ديال البيوس باش يبقى يقلع اوتوماتيك من الكلي.
من بعد مادير هادشي أيدخلك للواجهة ديال التثبيت لي غاتطلع بهاد الشكل:
هنا كيطلع ليك اللغة لي بغيتي الجهاز يكون بها اختر لي بغيتي نتا. وكيعطيك جوج اختيارات. تجريب التوزيعة Live يعني بلاما تآنصطاليها, إلى بغيتي هاد الخيار غاتكليكي على Try Ubuntu
الخيار الثاني هو ديال التثبيت, وهو لي غانختار فهاد الحالة. من بعد ماتكليكي على هاد الخيار, غايدوزك للصفحة الثانية.
هنا كيقولك واش بغيتي تآنصطالي التثبيتات وحتى البرامج لي غاتمكنك من تشغيل الموسيقى والفيديو وبعض التعريفات ديال الكارت كرافيك والويفي لي غاتنساب جهازك. تقدر دير هاد الخيارات لا بغيتي تنقص عليك الخدمة من بعد. وطبعا خاصك تكون متصل بالأنترنت فهاد الحطوة.من بعد ايدوزك للخطوة التالية.
هنا كيقولك شنو الطريقة لي بغيتي تآنصطالي بها السيسطيم فالديسك دير ديالك. واش غاتآنصطاليه بجانب الوينداوز مثلا. فهنا غايخصك تختار الخيار الأخير وتقسم الديسك دير وتحط الاوبنتو فبارتيشن تكون خاوية. حيت لا أنصحك بتثبيتهم بجوج على نفس البارتيشن. غايتخربقو الضواسا ديال السيسطيم وغاتطيح فالمشاكل. أما لا بغيتي تمسح الوينداوز وتبقى خدام بيه غير هو بوحدو. وأنا أنصحك بهاد الخيار لأنك ما غاتندمش على استخدام هاد النظام الجميل. فهاد الحالة اتختار الخيار الأول. ولي كيعني أنه غايمسح الديسك دير كامل. أي أنه غايفورماطيه.
في حالة كنتي داير جوج ديال لي بارتيشن واحد C لي حاط فيه السيسطيم ديال وينداوز والاخر D لي حاط فيه لي دوني ديالك. ملي غاتختار هاد الخيار غايطلع ليك لي بارتيشن ديالك. سيليكسيوني C وفورماطيه وحط فيه السيسطيم. من بعد ايطلع ليك الخطوات التالية
تحدد الدولة لي نتا فيها على قبل التاريخ والساعة. وتحدد لغة الكلافي لي عندك. وتدخل المعلومات ديال الحساب. الاسم لي بغيتي. والمودباص لي كيكون إجباري عليك ديرو وتعقل عليه ﻷنك غاتستعملو بزاف ملي تكون خدام فالطيريمينال.. لذلك دير مودباص لي تعقل عليه.
وكلي على كونتيني وخليـه يآنصطالي السيسطيم على خاطرو غاياخذ شي 15 دقيقة ويكمل. من بعد أيطلب منك دير روديماري للبيسي ديرها. وبصحتك الاوبنتو.
وغانشرحو السيسطيم أكثر فمقالات اخرى ان شاء الله.
{rightSidebar}