علاش نظام لينيكس صعيب ؟

فهاد التدوينة غانهضر على بعض المشاكل لي كيرتاكبوها المستخدمين الجدد لنظام لينكس ولي كيخليهم يرجعو بزربا للوينداوز..
إلى كنتي أول مرة متسمع بهاد الإسم فكنصحك تمشي تقرا هاد المقال نظام التشغيل لينكس ومن بعد تقدر ترجع تكمل هاد المقال

التحديثات وتثبيت البرامج 

خاصك تعرف يا صديقي أن نظام وينداوز ماشي هو لينكس.. والفرق بيناتهم كبير.. فمثلا فوينداوز التحديثات إجبارية على عكس اللينكس مستحيل تكون التحديثات اجبارية.. والبرامج فالوينداوز الى بغيتي تآنصطاليهم خاصك تمشي للمواقع الرسمية ديالهم وطيليشارجيهم بصيغة exe ولا msi عاد باش تآنصطاليهم..

فلينكس لا هاد الامر غير محبب.. الى باغي شي برنامج طيليشارجيه عن طريق الطيرمينال او من السوفتوير مانتجر ديالو..

برامج الحماية

كما هو معروف الأنترنت مليئ بالفيروسات وخلال تصفحك تقدر تصادف الكثير من البرامج الخبيثة لي ممكن تدمر الحاسوب ديالك ولا تعرض الحاسوب ديالك للخطر.. الاونتي فيروس ما غاتحتاجوش فلينكس وهاذي اكثر نقطة كتحببني فهاد النظام انا شخصيا.. بحيث يتميز بنظام حماية قوي إضافة الى جدار الحماية ديالو الرائع.. على غرار نظام الوينداوز لي بمجرد ما أنك كتبث شي نسخة منو على الحاسوب ديالك.. أول حاجة خاصك ديرها هي تبث برنامج حماية.. الشيء لي كيخليك ديما مبرزط مع داك الاونتي فيروس وخصوصا الى ماكنتيش شاريه وكتستعمل نسخة مجانية.. أما إذا بغيتي تشريه فغايخصك مبلغ مهم باش تشريه.

إدارة الملفات

فالوينداوز خاصك ديما تبقى تابع الديسك دير وتنيطوايي فيه باش مايبقاش يثقال لك البيسي مع الوقت.. وهادشي فاللينكس ماكاينش.. حيت اللينكس كيخدم بأنظمة جد متقدمة مثل EXT4 و Btrfs ماشي بحال الوينداوز لي كيخدم بال NTFS و FAT لي كتعتابر أنظمة قديمة وسيئة فإدارة الملفات..

إختيار التوزيعة المناسبة 

كاين الناس لي كيختارو التوزيعة الخاطئة ملي كيبغيو ينتاقلو للينكس.. فاللينكس كاين بزااااف ديال التوزيعات وكل توزيعة لاياش صالحة.. الواحد ملي يالاه كيبغي يبدل الوينداوز باللينكس كيبقى يقلب على احسن توزيعة.. وهذا خطأ حيت خاصك تختار التوزيعة لي غاتنسابك نتا كمبتدأ فهاد النظام باش تفهم كيفاش كيخدم.. ماشي تاخذ على تجارب الاخرين.. فمثلا كاين لي كيشوف Deepin على أنها توزيعة جميلة.. وكيشوف أن الكالي لينكس واعرة فالاداء.. وكيمشي لوحدة من هاذو.. وملي غايخدم بيهم غايلقى مشكلة فالتعامل معاهم.. لذلك خاصك تختار التوزيعة لي غاتنسابك كمبتدأ مثل Linux Mint لي كتعاونك فبزاف دالحوايج منها تثبيت بزاف دالحوايج لي غايخصوك وتختاصر عليك بزاف دالمشاكل.. ومع المدة بقى تعلم دقة دقة.. عاد بدل التوزيعة الى بغيتي..

تثبيت برامج اللينكس

كاين عوتاني لي كيبقى يأنصطالي البرامج بطريقة خاطئة.. وذلك عن طريق الدخول الى الرووت عاد كيبدا يآنصطالي البرامج عن طريق الرووت.. وملي غايبغي يدخل ليهم من بعد ماغايبغيوش يدخلو لأسباب أمنية حيت غايخصو تا يرجع للوضع ديال الرووت عاد غايخدمو ليه.. لذلك خاصك تبقى تآنصطالي البرامج عن طريق الأمر sudo وانت فوضع الإلتيليزاطور..

تشغيل برامج وينداوز على لينكس

كاين لي كيبقى يخدم البرامج ديال الوينداوز على لينكس وهذا خطأ وماعمرك غاتبغي لينكس بهاد الطريقة.. الى كتستعمل الاوفيس فالوينداوز استعمل الاوبن اوفيس فاللينكس.. الى كتستعمل الفوطوشوب فالوينداوز استعمل الـ GIMP فاللينكس.. طبعا غايجيك داكشي صعيب فالاول ولكن الى بقيتي كتخدم بيهم مع المدة غاتعلم وغايعجبوك..

اللينكس جميل خاصك غاتعرف ليه.