الأمر cd
هاد الأمر كيعني Change Directory يعني بدل ليا الملف لي أنا فيه.
هو من الأوامر لي مهمة ولي كيتسعنمل بكثرة, حيت كيعاوننا باش نتاقلو بين الملفات ندخلو نخرجو نرجعو. لكن غير فالملفات فقط ماشي فالفيشيي.
طريقة عمل الأمر:
الأمر يمكن ليك تكتبو بوحدو بالإضافة لإسم الملف لي باغي تدخل ليه مثلا. أنا هنا غاندخل للملف ديال Desktop. غادي نكتب الأمر بهاد الشكل:
cd Desktop
إذن هنا غانلاحظو أن المكان ديالي فين كنت تبدل وولا هو Desktop
ملاحظة: فاللينكس خاصك تحتارم الحروف. حيت هو كيفرق بين الححروف الصغيرة والحروف الكبيرة. فمثلا فهاد الحالة إلى درنا الأمر : cd desktop ماغاديش يدخل.
عندنا الأداة الأولى هي "تيلد" ~ هاذي هي تيلد هي هاد العلامة. والامر كيتكتب بهاد الطريقة:
cd ~
هاد الأمر غايرجعني للملف ديال الـ home
هنا كيبان ليا أنني كنت فالملف ديال Desktop وملي درت الأمر رجعني للملف ديال الهوم لي هو الملف لي كنفتح فيه الطيرمينال وكيطلع ليا بار ديفو.
هاد الأمر كيسهل عليا الخدمة إلى كنت داخل لبزاف ديال الملفات وبغيت نرجع للهوم ديالي.
كاينة الأداة الثانية لي هي .. جوج نقط أفقية. كيتكب الأمر بهاد الطريقة:
cd ..
بين cd و .. كاينة مسافة.
هاد الامر الدور ديالو هو يرجعنا للملف لي قبل الملف لي حنى فيه حاليا.
إذن ببساطة هذا هو الدور ديال هاد الامر.
الأداة الثالثة هي / كيكتب الأمر بهاد الطريقة:
cd /
هاد الامر كيديني للملف ديال الرووت. يعني الجذر ديال النظام كاع. ماشي كيدخلني للمود ديال الرووت لا. بل كيعطيني الضواسا لي تم. نقدر نشوفهم وخا أنا ماشي رووت لكن مانقدرش نموديفي فيهم.
بقات لينا مسألة وحدة أخيرة, إلى بغينا ندخلو لشي ملف فالإسم ديالو كاين إيصباص. مثلا عندي هاد الملفات بغيت ندخل للملف ديال les TP
cd les TP
ما غاديش يعطيني لأن الطيرمينال كيعرف غا الملفات لي كتكون مكونة من كلمة كاملة مافيهاش ايصباص.
إلى لاحظنا أن الطيرمينال كيحاول يعاوننا وحاط لينا الضواسا لي فيهم إيصباص بين هاد ' ' إذن كيقول لينا لا بغينو تفتحو هاد الضوسي كتبوه كيف ما كاتبو ليكم. يعني انكتبو الأمر التالي:
cd 'les TP'
وهنا كيدخل عادي بلا مشاكيل. هادشي لي كاين فالأمر cd نتمنى يكون الشرح خفيف ومفهوم.
