 |
آآشنو كيعني هاد العجب.. هاد البلوك تشين كتعني بالعربية سلسلة من البلوكات.. يعني بلوك حدا بلوك حدا بلوك.. لمهم هاد التقنية خرجات ف 2009.. هي مجرد قاعدة بيانات.. غا هي لا مركزية.. كيفاااش لا مركزية؟ يعني غير تابعة لشي جهات معينة.. لا حكومات ولا أشخاص ولا شركات.. هي قاعدة بيانات فملك الجميع.. باش تفهمو البلان أكثر بحالها بحال سيسطيم ديال لينكس (أوبن سورس) يعني داكشي ماكيتحكم فيه حتى شي واحد..
غاادي نزيد نتعمق باش تفهمو أكثر.. دبا فالانترنت ملي كتصيفط شي تصويرة ولا شي ميساج ولا أي لعبة كيف ما كانت.. راك ماكتصيفطهاش باش جاية باش مصيفطا.. بل كتصيفط غير نسخة منها.. كيفاااش البلان؟
البلان هو أن الموقع أو التطبيق لي صيفطتي منو التصويرة عندو لاباز دوني "مركزية" ولي حتى كتوصل ليها الطوف ولا أي معلومة صيفطتي وكيشوفوها هما الاولين عاااد كيصيفطوها لداك الشخص لي صيفطتيها ليه.. وطبعا كتبقى مسجلة عندهم فلاباز دوني..
أما فالبلوك تشين هي قاعدة لامركزية كيف قلنا قبل.. يعني ماكاينش داك الوسيط لي بينك وبين داك الشخص لي غاتصيفط ليه المعلومة.. يعني كتكون نتا وياه فاص آ فاص.. لي كتسمى بلغة الأنترنت Peer To Peer
حتى لدبا ومزاال القضية معقدة ومعنكشة وما مفهوماش.. نزيدو عوتاني نتعمقو مزيااان..
هاد البلوك تشين لي قلنا هي عبارة عن بزاف ديال البلوكات.. دوك البلوكات مفرقين على الملاييين ديال عباد الله.. وهناا فين كاين السر فهادشي كامل.. يعني يصعب اختراقها أو تزوير شي معلومات فيها.. حيت مايمكنش تستهدفها لأنها ماكايناش فمكان واحد ومحدد.. الاختراق ديالها مستحيل وتا را مستحيييييييل.
نعطيك مثال باش نساليو هاد صداع الراس كاع وتفهم مزيان.. وغانعطيك مثال حي بالبيتكوين لي غاندويو عليها فموضوع آخر..
دبا فهاد البيتكوين كاينين الملاايين ديال الناس كيتداولو العمل ديالهم (لمهم من بعد وغانشرحو هادشي بالتفصيل) ومن بين دوك الناس نيت كاينين وحدين كيتداولو وفنفس الوقت كيخدمو فدوك قواعد البيانات.. ولي كيتسماو
Bitcoin Miners
والخدمة ديالهم هي يقيدو المعلومات ديال الناس فالقواعد ديال البيانات لي هما "البلوك تشين"
كيفااش كتم هاد العملية.. مثلاا نتا عندك المحفظة ديالك ديال البيتكوين (تا هادي غانشرحوها من بعد غا بلاتي) باغي تصيفط البيتكوين لشي صاحبك.. غادي يتم نقل العملية فواحد الكتلة جديدة ولي طبعا مشفرة بالجهد..
وغايتم الارسال ديال ديك الكتلة لكــاع دوك الـ Bitcoin Miners
وكل واحد فيهم كيقيد ديك العملية فالقاعدة دالبيانات لي عندو..
ومن بعد كتدخل الكتلة فسلسلة الكتل.. وهاكا كتكون سالات العملية..
وا شفتي داكشي شحال معقد.. وبسبب هاد التعقدات باش صعيب تختارق هاد التقنية..
