بما أننا ديجا دوينا على البلوكتشين لي هو بداية موضوع البيتكوين.. وإلى ما شفتيهش خاصك ترجع تشوفو باش تقدر تفهم هادشي..
الببتكوين هي واحد العملة.. بحالها بحال الدرهم والاورو والدولار والريال الهندي وكولشي.. لكنها مميزة ومختلفة عليهم بكونها عملة رقمية إلكترونية.. قلت واحد المصطلح تم حساس شيئا مــا ! ولي هو "مميزة"
أمم اشنو لي مخلي هاد العملة مميزة على العملات الاخرى ولي هي اصلا عملات ملموسة وليست رقمية.. شنو هي رقمية بعدا؟ رقمية المقصود بها هي أنها عملة ما كايناش فالواقع كاع. ما كاين منها لا وراق لا شقوفا.. عملة كدور غا فالانترنت صافي غير ملموسة..
ايوا كيفاش هاد العملة مميزة على العملات لاخرين وهي ماشي حتى واقعية؟ خاصك تعرف أن حتى الفلوس لي كنخدمو بيهم فحياتنا الواقعية براسهم راهم عملات رقمية.. تقريبا غا شي 10% لي حقيقية ومتواجدة فالواقع.. أما شي لاخور راه غا رقمي.. يعني الى كاع سكان الارض مشاو للبنوك لي فالعالم كامل.. وبغاو يخرجو فلوسهم كاش.. ماغايلقاوهمش وماغايقدوهمش.. داكشي علاش الدول كيفرضو على الناس لي كتبيع الاراضي الكبار بزاف ولي كتوصل المبالغ ديالها لعشرات الملايين.. أنهم يبيعوهم عن طريق الشيك وماشي عن طريق الكاش.. وكاينين دول لي ماكيخليوش المواطنين ديالهم يبيعو حتى طوموبيلات بالكاش.. هادشي كامل حيت الى بقاو الناس كيتعاملو بالكاش را غاكيملو الفلوس لي نسبتهم غا 10% وهدا رااه بروبليـــم..
لمهم اصلا حتى المعاملات ديال بزاف دالناس ولات غا رقمية.. فمثلا كنشوفو الناس كتخلص البيي ديال الطيارة غا بلاكارط بونكير.. كتخلص المازوط والتثدية ديال السوبير مارشي غا بلاكارط بونكير وزيــد وزيد..
ولكن لحد الآن را مزال ماعرفناش علاش عملة البيتكوين مميزة.. فين هو التميز هنا؟
وخا وخا هانا غانشرح ليك علاش مميزة..
أولا: هي عملة قيمتها طالعة بزاف.. حاليا فهاد اللحظة بيتكوين واحد كيساوي 96.840,71 درهم مغربي.. سمحليا ماغانقولكش شحال كتساوي من سنتيم خليك تحسبها راسك..
ثانيا: هي عملة موحدة فجميع أنحاء العالم.. تا را ما فيهاش ديك القضية ديال شحال ثمن البيع والشراء.. لا حكا هذا بيتكوين أمريكي غايكون ساوي أكثر من بيتكوين مغربي.. هادشي ما كاينش.. البيتكوين ما ديال تا شي دولة.. ديال العالم كامل..
ثالثا: ما كاينش وسيط بين الناس لي كتخدم بهاد العملة.. يعني نتا عندك البيتكوين بغيتي تصيفطو ليا.. راه غاتصيفطو نشان ماكايناش ديك اللعيبة ديال خاصها دوز عند البنك الشعبي ولا البنك الدولي ولا شي جهات معينة.. وهادشي هو لي شرحناه فالبلوكتشين هدا هو الدور ديال البلوك تشين..
ومزال كاينة مزايا اخرى غانتعرفو عليها فموضوعنا نيت وحنى كنزيدو نتعمقو فيه..
غانطرحو واحد السؤال مهم ولي هو كيفاش هاد الملايين من الناس لي كتخدم بهاد العملة حاليا دايرين الثقة فهاد العملة لي غا مسركلة فالانترنت وليست تحت رقابة أي جهات حكومية او ما إلى ذلك.. يعني شي واحد غا يضمنك فرزقك .؟
من بين الحوايج نيت لي مخليا الناس يثيقو فهاد البيتكوين هي هاد النقطة لي كيبان فيها الجدل.. ولي هي أنه ما تحت الرقابة ديال حتى واحد.. الاستعمال ديالو كيكون فاص افاص بــير تو بيـر..
وأيضا أنه ماكايناش فيها ديك القضية ديال الاقتطاعات وتخلص باش نصيفطو لك وكذا.. وكذلك نفس النقطة لي دوينا عليها قبل فالمميزات ولي هي كيلغي الحدود ديال انك ميريكاني ومغربي وما الى ذلك.. البيتكوين عندو كوولشي سواسية..
والنظاام باش مصاوب هاد البيتكوين وكيفاش كيتخدم وكيفاش كيتنقل.. محمي بزاف وكيف قلت ليكم. مستحــــــيل يتختارق ولا يتسرق..
سالينا مع هاد السؤال.. آرى نشوفو السؤال الموالي.. ولي هو كيفاش نقدرو تا حنى نفتحو كومط ديال هاد البيتكوين؟
المسألة ساهلة بزاااف ما غاتحتاج لا لاكارط ناسيونال لا جوج تصاور لا 100 درهم تحطها فالكومط ههه.
كل ما عليك فعله هو تتحه الى شي موقع ديال البيتكوين او البلوكتشين.. وراهم مشهورين كتب غا فكوكل بيتكوين غايطلع لك الموقع الرسمي.. وغاتدخل غايقولك وصاوب المحفظة ديالك.. هاد المحفظة هي الكومط ديالك فين غاتبقى تخبي الفلوس ديالك لي هما البيتكوين.. وهاد المحفظة عندك بزاف ديال ليشوا فين تقدر تحطها.. تقدر تحطها فشي سيت ويب.. تقدر تحطها فالبيسي ديالك ولا فالطيلي ديالك على شكل تطبيق.. ولا تقدر تكون عندك على شكل جهااز صغيور كتهزو معاك فجيبك..
وكيكون عندك واحد الأي دي هو لي كتبقى تصيفط بيه وتستقبل بيه البيتكوين.. صــافي هادشي لي كاين..
كيفاش غانقدرو نصيفطو البيتكوين لناس آخرين ويكون داكشي مضمون ؟
ركز معايا مزيان هنـا.. نتا عندك بيتكوين باغي تصيفطو ليا.. كنعطيك داك الأي دي ديالي باش تصيفطو ليا.. كتشد نتا داك الأي دي ديالي وكتزيد عليه الآي دي ديالك.. وكتزيد عليهم واحد الساروت.. داك الساروت كيكون عند كل واحد عندو محفظة بيتكوين.. وهو فمثابة الساروت ديال المحفظة ديالك.. هاد الساروت كيلعب الدور ديال الكود ديال لاكارط بونكير ديالك مثلا.. ماخاص تا واحد يعرفو باش مايسرقوش ليك الفلوس..
لمهم كتشد نتا داكشي كامل وكتصيفطو لكااع المعدنين لي فالعالم كـــامل.. ولي سميناهم "Bitcoin Miners" وباش هاد الناس يثيقو بلي نتا نيت هو مول دوك الفلوس بصح. كيخصك تخلي الامضاء ديالك فديك العملية.. والإمضاء كيكون عن طريق واحد التقنية لي كتسمى بالـهاش .. هاد التقنية دايرة بحال الكريبطاج حتى هي.. لكن ماشي كريبطاج حيت هي تقنية كتخلينا نحميو المعلومة ونأكدو بلي المعلومة لي بين يدينا هاكاك خرجات من عند مولاها الاصلي وأنها حقيقية وماتمش التعديل فيها.. ملي غاتصيفط للمعدنين داكشي غاتزيد الامضاء ديالك بهاد الطريقة ديال الهاش.. ومن بعد هما غايشوفو ان داكشي بصح نتا هو مولاه وهنا غاتبدا الخدمة ديالهم تاني لي فشكــااال.. (بزااف منكم لي ماغايفهم هاد البارتي ديال الهاش.. لذلك غا دير راسك فهمتي وكمل معايا.. حتى لمن بعد ونعاود نحط موضوع مفصل على شنو هو الهاش)
خذ نفس عميـــق اوكي دبا نكملو.. من بعد ما المعدنين وصلهم الطلب ديالك وتأكدو بلي راك ماشي نصاب.. غايخصهم ياخذو الطلب ديالك ويحطوه فالبلوك تشين باش يوصل ليا البيتكوين لي مصيفط ليا..
هاد المعدنين لي هما الملااايين فجميع أنحاء العالم.. كيشدو بزااف ديال الطلبات بحال لي صيفطتي ليهم نتا.. وكيبداو يفاليديو.. وكل عشرة دقايق كيفاليديو بلوك واحد فيه 2400 طلب.. فظرف 10 دقايق فقط..
كل واحد فدوك المعدنين كيشد مجموعة من الطلبات وكيبدا يفاليدي.. وباش يفاليدي الطريقة ما ســــاهلاش.. كيخصو يطيح على واحد الكود لي هو أصلا ماعارفوش.. وباش يطيح فداك الكود غايخصو وقت.. وغايخصو حاسوب بمواصفات قوية جدا.. باش كيبقى يدير ليه الماكسيمون دالعمليات فظرف قصير.. باش سلقى الكود هو الأول.. علاش زعما خاصو يلقى الكود هو الأول ؟
حيت ملي كيلقى الكود هو الاول وكيفاليدي الطلب كيربح 12 البيتكوين.. كتخلق على قبلو حيت فاليدا داك الطلب وهذا هو الخلاص ديالو.. لمهم ملي كيتفاليدا الطلب ديالك وكيدخل لشي بلوك.. فراه غايوصلوني الفلوس ديك الساعة..
غاتقول ليا مربووحة هاد القضية.. غانمشي نتقدا شي بيسي مليح.. ونخربها بيتكوين.. غانقولك تشا ريح بلاتي فيناوا غادي.. واش يصحابلك داكشي غا اجي وفاليدي.. هيهات ثم هيهات..
عرفتي فاللحظة لي كيكونو كيقلبو عليها فالكود.. وتاا واش عرفتي شحال من واحد فالعالم كيدير ديك العملية فنفس اللحظة.. وتا را موصيبة ديال بنادم والغرااق.. يعني لا كنتي بوحدك وباغي تانتا تولي تفالدي مع هاد الناس.. فراك غاتبان بحال شي نميلة وسط مليون ديال بنادم.. تخيل المنظر باش تقدر تفهم هههه..
ونزيد نقطع لك الأمل بمرة.. إلى جمعتي جميع الحواسيب ديال شركة كوكل وجمــــيع الحواسيب يالاه كتقدر القيمة ديالهم وسط داك الكم الهائل ديال المعدنين بـ 0.2% زيـــد تخايل المشهد ههههه
والنظام ديال هاد التعدين.. هو أنهم خاصهم يلقاو الكود باش يقدرو يفاليديو فظرف 10 دقايق فقط.. الى كانو المعدنين قلال راه الكود كيكون ساهل شويا.. الى كاانو كثار كيكون الكود صعــيب.. هادشي كامل باش يبقى المعدل هو 10 دقايق..
دااكشي علاش كتلقى التعدين كيديروه شركات كبار عندهم بزاااف ديال الحواسيب.. ولي كيخسرو عليهم اموال طاائلة.. حيت خاصهم يراقبوهم ويصلحوهم وعاد زيد عليها الفاتورة ديال الضو لي كتجي مكمحة.. حيت البيسيات كيستهلكوا طاقة كبيــرة ديال الكهرباء خلال عملية التعدين..
عييت بالكتابة وحتى نتوما غاتكونو عيتو بالقرايا وحتى بقوة التركيز حيت هادشي كيتطلب تركيز باش تقدر تفهموا.. بغيت نزيد نهضر على الموقف ديال المغرب من هاد العملة.. ولكن صافي عييت.. لمهم المغرب راه مانع تداول عملة البيتكوين فالمغرب.. وكيعاقب عليها بواحد القوانين لي فريمون غريبة لدرجة كبيرة.. وغانستاعنو بالمقولة الشهيرة ما دمت في المغرب فلا تستغرب وغانسدو هاد الموضوع هنا.. ونتمنى تكونو فهمتو شويا.
