المعالج | Processeur

 

Adresse IPV6

 الهدف من هاد التقنية هو تزيد فعدد Les adresses ips حيت تقنية ipv4 مابقاتش خدامة.. فيها غير 32 بت.. ويالاه كتعطينا أقل من 5 مليار.. يعني عدد قليل مقارنة مع بنادم لي عايش فالكرة الارضية طبعا .. ومع التطور السريع ديال التكنولوجيا وكثرة الاجهزة لي كتخرج كل نهار.. غايكملوا هاد 5 مليار.. وهنا فين غاتجي تقنية ipv6 لي فيها 128 بت.. ولي كتعطينا اكثر من 340 انديكليون أيبي !! يعني 340 موراها 36 صفر.. عدد كبير وهائل.. ولا بغينا نفرقوها على هاد 7 المليار ديال بنادم لي عايشين.. غاتجي لكل شخص فوق من 5000 سبتيليون آدريس.. يعني موراها 24 صفر..
 يعني راه كاافيين وفايتين من لهيه گاع.. وغاينفعوا بشكل كبير فهاد تقنية الأشياء لي غاتخرج.. ومنعرف منها لواحد الوقت يقدروا مايبقاوش كافيين وتخرج شي تقنية اخرى.. ولكن هادشي مستحيل لحد الان..  لمهم نرجعوا لموضوعنا وداكشي لي كنقراو..

الفيرزيون الاولى ديال الـ ipv4 كنا كنكتبوا فيها غا ربعة ديال لي أوكطيط.. وكنا كنكتبوا غا الارقام.. يعني كنخدمو غا بالديسيمايل.. كمثال:
192.168.23.56

تقدر ترجع تقرا المقال ديال Adressage B'Darija
أما هاد الفيرزيون الجديدة ديال الـ ipv6 غانوليو نكتبوا ثمنية ديال لي كاز.. وغانوليو نكتبوا بالهيگزاديسيمال..
كمثال:

2001:00AB:1234:05B6:06CD:0078:0001:08F7

هاذي هي الادريس ديال الـ ipv6 هاكا كتكتب.. الى قارنتوها بالاولى غادي تلقاو ان الاولى فيها غا ربعة ديال الأوكطيط.. والثانية فيها ثمنية ديال الـ Segment.. فكل Segment تقدر تكتب ربعة ديال الـ Chiffre.. وكل رقم كيعبر على ربعة ديال لي بت.. يعني المجموع كــامل ديال لي بت لي فهاد الادريس ipv6 هو 128 بت. (عاود قرا هاد الفقرة حيت عارفك مافهمتي والو)

2001: Segment

2: Chiffre / 0: Chiffre / 0: Chiffre / 1: Chiffre

 

طبعا حتى هاد الادريس راه فيها البارتي ديال الريزو والبارتي ديال الأوت (partie machine)
البارتي ريزو كنقولو ليها فلادريس فيرزيون 6 : Prefixe 

البارتي ماشين كنقولو ليها : ID Interface

إختزال الـ Adresse IPV6

نهضروا على الأساسيات بعدا.. ولي هما كيفاش نختازلو الكتابة ديال هاد الادريس.. والاختزال كيكون عبارة عن أننا نحايدو الأصفار.. ولكن ماشي أي صفر.. فقط غير الأصفار لي كيكونوا قبل الارقام.. مثلا:
001
هاد الرقم كيعني 1 يعني نقدرو نحايدو دوك الاصفار ونختازلوا الكتابة.. نعطيو أدريس كمثال باش تفهموا..

00FE:0100:6500:0001:FABC:6700:0080:0100

هاد الادريس غادي نختازلوها وغاتولي بهاد الطريقة:

FE:100:6500:1:FABC:6700:80:100

حايدنا الاصفار لي كتسبق الاعداد وهاكا قدرنا نختازلوا الادريس شويا..
نعطيو أدريس أخرى وناخذوا مثال مختلف هاد المرة على الاول:

000F:0000:0000:0000:0000:0FBA:0000:0000

شوفوا دبا ملي غاتختازل كيفاش غاتولي:

F::FBA:0:0

ولات قصيرة بزااف.. تقدروا تردوا البال لدوك الاصفار كاملين لي طاروا وعوضناهم بـ ::
فين ما يكونوا عندنا بزاف الأصفار حدا بعضياتهم كنطيروهم ونعوضوهم بدوك جوج نقط جوج مرات.. ولكن تقدر تطرح سؤال وتقول وعلاش دوك الاصفار اللخرين مادرتيش فيهم جوج نقط.. الاجابة هي ملي كيكون عندنا بحال هاكا.. مايمكنش نديرو فالادريس جوج نقط جوج دالمرات.. بل كتكون غا فجهة وحدة.. وطبعا غانديروها فالجهة لي كيكون فيها عدد من االاصفار كثير.. وفالاخرين كنديرو غا صفر واحد.. علاش هاشي؟
حيت ملي غانبغيو نرجعوا للادريس الاصلية ماغانعرفوش فين كانوا الاصفار.. داكشي علاش كنديروها غا فجهة وحدة.. والجهة الاخرى كنديرو فيها صفر واحد.. باش هاكا تبان لينا الادريس ديالنا.

EUI-64

دبا غاندوزوا لبلان اخر ولي كيتسمى الـEUI-64

هاد التقنية كتختصر لينا الادريس IPV6 إلى جينا نعطيو لشي جهاز ادريس من نوع IPV6 خاصنا نعطيوه 128 بت وهاد الادريس اتكون طويـــلة, هنا جات هاد التقنية باش تسهل العملية شويا. غانححدو لادريس بريفيكس (أدريس ريزو) لي غاتكون فيها 64 بت, والبارتي لاخرى لي بقات ديال الـ ID Interface أناخذوها من لادريس مـاك ديال الجهاز لي باغيين نعطيوه هاد لادريس.
لكن عن طريق استعمال واحد العمليات حسابية بسيطة. تبع معايا.
مثلا فبعض التمارين غايعطيوك الادريس مقسمة.. البارتي بريفيكس بوحدها وبارتي ID Interface بوحدها..
البارتي Prefixe كتكون على هاد الشكل.. وكيكون فيها 64 بت:

FE80::/64

ويعطيك البارتي ديال الـ ID Interface (الماك) مثلا:

E2:57:AF:04:70:01

  باش نحصلوا على لادريس خاصنا نطبقوا واحد الخاصية سميتها EUI-64
وهاد الخاصية كتقول لينا بلي خاصنا نزيدو FFFE وسط الادريس ماك.. الى حسبنا الادريس ماك غانلقاو فيها 6 ديال ليكاز..   يعني هاد الـ FFFE لي غانزيدو خاصها تكون الوسط.. على هاد الشكل:

E2:57:AF:FFFE:04:70:01

دبا بعد ما زدنا الـ FFFE بقات لينا قاعدة ثانية.. ولي هي غادي نحولوا الرقم السابع فالادريس ماك.. ولكن حتى نحولوها للبنير.. تقدر تقول وايلي نحولوها كااملة للبينير.. لا. غادي تحول غا الرقم الثاني فيها.. ولي هو رقم 2 لي حدا حرف E فالبداية ديال الادريس.. ولكن كيفاش هاد البلان ديال غانحولوا الرقم السابع ؟ تبعوا معايا مزيان..
بالنسبة لقضية التحويل.. كيف كتعرفوا فالبينير عندنا يا إما رقم 1 ولا رقم 0..
الى كان 1 غادي نبدلوه لـ 0 والى كان 0 غانحولوه لـ 1 .. القضية ساهلة بزاف..
غانطبقوها دبا:
حنى غانحولوا حتى حرف E للبينير باش تفهموا اكثر.. وغايكون عندنا على هاد الشكل:

E => 1110

2 => 0010

هادشي خاصكم تكونوا عارفينوا ولي هو كيفاش نحولوا من الهگزاديسمايل للبينير.. لمهم الارقام هاكاك غايوليو عندنا.. دبا نشوفوا الرقم السابع فين جا:

1110 0010

الرقم السابع هو لي درتوا بالأحمر.. ولي هو 1 يعني غانبدلوه ونرجعوه 0 وغايولي على هاك الشكل:

1110 0000

ولي غايساوي لينا:

E0

وفالاخير غانحصلوا على هاد الادريس ملي نجمعوا داكشي:

E0:57:AF:FF:FE:04:70:01

وقبل مانجمعوها مع البارتي ديال الريزو.. خاصنا نقادوا الكتابة بعدا وغاتولي على هاد الشكل:

E057:AFFF:FE04:7001

ودبا غانزيدو عليها الادريس ريزو وغاتولي عندنا على هاد الشكل:

FE80::E057:AFFF:FE04:7001

ولي كتكتب فالاصل بهاد الشكل:

FE80:0000:0000:0000:E057:AFFF:FE04:7001

ولكن ملي اختاصرناها حايدنا دوك الاصفار وعوضناهم بالنقطات.. كيف شفنا فالاول..
لمهم هاكا كيفاش كنحسبوا هاد العالم..

Configuration IPV6

بقات لينا واحد اللعيبة اخيرة.. وخا طولت عليكم.. كيفاش ندخلوا ادريس من نوع ipv6 فالروتور عن طريق سيسكو باكيط طبعا..
غانستعملوا هاد لي كوموند:
باش نصاوبوا ليزانطيرفاص كندخلوا للوضع ديال config وكنكتبوا هادشي بالترتيب:

(config)#ipv6 unicast routing

(config)#interface gigabite ethernet 0/0
(config-if)#ipv6 address hna kandiro l'address li bghina mtbo3a bl'massque 3la had chekl /64 wla ch7al ma3tawna homa
(config-if)#no shutdown
(config-if)#exit
.

كاينين بزاف ديال الحوايج غانهضرو عليهم فيما بعد. 

المقال على شكل PDF 

Adresse IPV6 Darija

تعديل المقال