فهاذ المقال غادي نفصلو تفصيلا فهاذ الكلاود، ووخا تكون أول مرة غاتسمع هاذ الكلاود غادي تفهمو إن شاء الله.
تخيل معايا واحد المدرسة قررات أنها دير واحد النظام بحال شكل نظام مسار.. يعني التلاميذ يقدرو يشوفو النتائج ديالهم والدروس والمواد واي حاجة متعلقة بيهم..
فهاذ الحالة المدرسة غاتكلف شي ديفلوبور يصمم ليها الموقع مزيان. وملي غايسالي غايخصهم يشريو سيرفورات فين يهوستيو هاذ الموقع وخاصهم يريزيرفيو آدريس IP تكون Public باش يقدر أي واحد يدخل للموقع. وبما أنهم غا يجيبو سيرفرات فراه غايخصهم واحد لاصال خاصة بهاذ السيرفورات وخاصهم يديرو ليها وحدة تبريد وهاذشي طبعا غايكونصومي الكهرباء بزاف. وفوق هاذشي كامل غايخصهم واحد الادمن لي يبقى مقابل دوك السيرفرات باش يموديفي ويقاد لي خاصو يتقاد. زائد هاذ السيرفرات اتحط عليها معلومات شخصية ومهمة ديال التلاميذ فراه خاصها تكون محمية بشكل كبير. إذن غايخصهم على الأقل واحد خبير فالحماية تاهو يقابل هاذ السيرفرات. اذن هاذ المدرسة غايتقام عليها هاذشي كامل ببزاف ديال الفلوس.
فهنا كتجي تقنية الكلاود وكتحل لينا هاذ المعضلة، بحيث غاتوفر لينا داكشي لي بغينا وبثمن رخيص. كيفاش؟
باش نفهمو مزيان غانديرو مقارنة بين On-premise Computing وبين Cloud Computing. وهاذ المقارنة غانشوفو فيها الفرق، و Scalability & Cost و Server Storage و Accessibility و Security و Customization and Control و Data Protection و Maintenence.
الفرق:
On-premise Computing:
هو السيناريو لي ذكرنا الفوق، كيكون عندك الهاردوير والسوفتوير كولشي فمكان واحد وعندك اتصال مباشر وفيزيائي ليه. تقدر تحكم فكولشي كيف ما بغيتي، وفنفس الوقت خاصك توفر الادمينسطخاسيون والسيكيريطي ديالك.
Cloud Computing:
هنا الداتا ديالك كلها فالانترنت، باش تآكسيدي ليها غاتحتاج فقط جهاز كومبيوتر إنترنت، وتقدر تدخل ليها من أي مكان بالعالم.
بمعنى السيرفرات ديالك ماكايناش عندك بشكل فيزيائي كما فالحالة الأولى. بل فداتا سانطر ديال شركة أخرى.
وهاذ الشركات كيكون سميتها Cloud Provider. هاذو عبارة عن شركات كبيرة عندها داتا سانطر ضخمة عامرة بلي سيرفر كتكريهم لشركات أخرى.
وأشهر الشركات فهاذ المجال هما:
AWS, Microsoft AZURE, Google Cloud.
Scalability & Cost:
المقصود هنا بالـ Scalability هي أنك تتحكم فالخدمة ديالك. واش باغي توسع لازون دالخدمة ولا تصغرها..
فالـ On-prem كتكون عندك الداتا سانطر ديالك نتا. مثلا هاذ المدرسة لي ذكرنا الفوق فوقت النتائج كيولي الضغط على الموقع لأن كولشي باغي يدخل دقة وحدة. اذن خاص سيرفرات اكثر باش يخفاف الـ Load, اذن خاص الشركة تشري سيرفرات جداد وتآنصطاليهم وتكونفيغيرهم الخ.. ولكن ملي غايمشي الضغط ماغاتعرفش كيفاش تنقص من الحجم ديال الداتا سانطر. وغايبقاو ليها السيرفرات لي زادت غا ضايعيين..
فالـ Cloud عندنا واحد الميزة زوينة سمييتها Pay as you go, هاذ الميزة كتخليك تخلص على قد داكشي لي كتستهلك. مثلا هاذ المدرسة فهاذ الحالة ولا عليها الضغط بزاف ومحتاجة السيرفرات . فراها غاتزيد تطلب سيرفرات وغاتزيد تخلص أكثر. وملي يتسالا الضغط عليها ممكن أنها دير Skil down بمعنى تسحب دوك السيرفرات لي زادت وبهذا غايكون الـ Cost نزل تاني.
Server Storage:
فالـ On-prem غايخصك ايصباص كبير فين تحط السيرفرات ديال السطوكاج. وغايخصك أيضا تشري السيرفرات لي تصطوكي فيهم الداتا وأيضا غايخصك فريق لي يتكلف بالصيانة وفريق آخر ديال الحماية.
فالـ Cloud كتهنى من هاذشي كامل الشركة لي نتا واخذ من عندها الاشتراك هي لي كتكلف بالتخزين والصيانة وأي حاجة اخرى. بهذا كتكون موفر عليك بزاف الخدمة وبزاف الفلوس.
Accessibility:
فالـ On-prem نتا عندك الداتا كلها فالسانطر داتا وكتقدر توصل ليها بشكل فيزيائي. يعني خاصك تكون حداها باش تشوفها. وتقدر أيضا توصل ليها Remotely لكن غايخصك توفر حماية أكثر باش تقدر تأكسيدي ليها.
فالـ Cloud تقدر تآكسيدي للداتا ديالك فأي وقت ومن أي مكان بغيتي، فقط تحتاج كومبيوتر وإنترنت.
Security:
فالـ On-prem خاصك توفر الحماية لراسك، غايخصك تجيب فريق متكامل واحترافي باش يقدر يوفر ليك حماية وهاذشي غايتقام عليك غالي، ودائما غاتبقى عندك نسبة احتمال الاختراق كبيرة.
فالـ Cloud الشركات كتوفر فريق كبير ومتكامل الشغل ديالو كامل مركز على حماية السيرفرات من أي اختراق، وكتخسر فلوس كثيرة باش توفر حماية أقوى. إذن الكلاود غايتفوق.
Customization and Control:
فالـ On-prem عندك كااامل التحكم فالبيئة ديالك. تقدر تطفي وتشعل لي بغيتي، تحايد وتزيد كيف ما بغيتي عندك Full Control على أي حاجة.
فالـ Cloud العكس، ماعندكش التحكم الكامل فالبيئة ديالك. لأن السيرفرات محطوطة عند شركات أخرى بعيدة عليك.
Data Protection:
فالـ On-prem ضروري على الشركة أنها دير سيرفر خاص بالـ Backup وخاصها تشري ليصنص لأي Backup Software وعاد خاصها تشري السيرفرات لي غاتسطوكي فيهم هاذ الـ Backup.
فالـ Cloud نتا كتخرج هاذ السوق بمرة. وهما كيتكلفو بكولشي. والداتا ديالك كتكون محمية في أمان الله.
Maintenance:
فالـ On-prem غايخصك ضرووري فريق لي غايتكلف ليك بالصيانة ديال السيرفرات وديال أي حاجة متعلقة بيهم.
فالـ Cloud نتا غاتنعس على جنب الراحة وماتهز هم لحتى حاجة. الشركة هي لي كتكلف بكولشي.
وبهذا من هاذ المقارنة كاملة لي دازت. غانستنتجو أن الكلاود كيتفوق على الـ On-prem فبزاف ديال الحوايج. وكيوفر فلوس أكثر أيضا.
Cloud Deployment Models
ولي هما علاياش كيتبازا الكلاود. عندنا ثلاثة الأنواع:
1. Public Cloud:
تخيل معايا نتا باغي تمشي من الدار للخدمة، والوسيلة لي متاحة ليك هي الطوبيس. الطوبيس كيف ما كنعرفو كيقدر يهز جميع الناس بدون شروط، يكفي تخلص التعريفة ديالك وطلع شد بلاصتك. نفس المسألة كتنطابق على الكلاود بيبليك.. كولشي يقدر يدير اشتراك فيه بتكلفة صغيرة لأن الريسورس لي كيستغل كيكون قليل والخلاص كيكون تا هو قليل كيبقى على حسب شحال المدة لي بغيتي تستخدم هاذ الريسورس..
من بين الشركات الكبار لي كيقدمو هاذ الخدمة.
aws, Microsoft Azure, IBM Cloud.
2. Private Cloud:
طلع ليك زحام الطوبيس فراسك، وبغيتي تشوف شي وسيلة بديلة ومريحة باش تمشي للخدمة. فكرتي فطوموبيل، طبعا خيار جيد. لكن هنا غايخصك تحط فلوس كثيرة باش تشري الطوموبيل فالأول، وهنا غاتولي عندك طوموبيل ديالك بووحدك تمشي بها مرتااح. ونفس المبدأ كينطابق على البريفات كلاود. كتدفع مبلغ كبير باش كاع الريسورسز تكون ديالك بوحدك مايشركها معاك حد. وطبعا كتكون طالعة فالكونفيغ وغاتكون عندك تيم لي غاتكون مكلفة باش تجيري Cloud Infrastructure ديالك.
من بين الشركات لي كيقدمو هاذ الخدمة:
VMware, aws.
3. Hybrid Cloud:
مالقيتيش الفلوس باش تشري طوموبيل خاصة بيك لأنها غالية بزاف. ولكن مابقيتيش باغي حتى الطوبيس لأن الخِدمة ناقصة. هنا عندك حل ديال تبقى تاخذ طاكسي وتمشي مرتاح وخا غايتزاد عليك شويا الثمن. هنا نتا غاتولي تستخدم جوج حوايج Public Cloud و Private Cloud. بحيث غايكون عندك قسط من Private خااص بيك بوحدك. ولكن الـ Buckup ديالك كيتحط فالـ Public Cloud.
Service Model
فالـ On-prem Model كتقدر دير المانجمانت ديال الـ Infrastructure ديالك بووحدك. بمعنى كيكون عندك تحكم كامل فالـ Applications وفالـ Data والـ Virtualization والـ Storage والشبكة وأي حاجة تقدر ديرها رااسك وبيديك.
لكن فالـ Cloud كيكون مختلف. عندنا 3 الآشكال ديال هاذ Services
Infrastructure as a Service : IaaS
فهاذ الحالة نتا كمشترك فهاذ الخدمة، غاتستافد من الشركة لي عاطياك الاشتراك كولشي لي بغيتي، بمعنى اتاخذ من عندهم الـ Storage و Servers و Networking وتقدر تكريي لي ماشين Virtualization لي بغيتي. وتتحكم فالـ Infrastructure ديالك كيف ما بغيتي عن طريق الـ IT Team ديالك. هاذ السيرفس كيمنحك تحكم كبير فالبيئة ديالك ولكن غايخص يكون عندك فريق محترف باش يتعامل مع هاذشي.
Platform as a Service: PaaS
فهاذ الخدمة الشركة ديالك ماغايكونش عندها الحق فالاستفادة من الماناجمنت ديال الهاردوير.. عندك الحق فقط تآبلودي شي آبليكاسيون كتخدم بها وغايكوم عندك التحكم فقط فالـ Application و Data. وما تبقى كيكون على عاتق Cloud Provider لي مقدمة ليك الخدمة. وهاذ السيرفس كيتم استخدامو ملي كتكون شي شركة محتاجة غير بلاطفورم فين تحط شي تطبيق ديالها باش تخدم.
Software as a Service: SaaS
فهاذ السيرفس نتا ماغاتحتاجش حتى شي حاجة من هاذشي كامل لي فات. وماغايكون عندك الحق تماناجمي حتى شي حاجة.
هاذ السيرفس كيتم الاستخدام ديالو فحالة مثلا شي شركة بغات تكريي الايميلات للموظفين ديالها، فهنا غاتحتاج غير دير Hosting عند هاذ Cloud Provider وغاتكريي العدد ديال الايميلات لي بغيتي.. ممكن تستخدم Gmail ولا Outlook مثلا، وهنا غاتكون شركة أخرى هي لي صنعات الـ Application يعني نتا غادي غاتخدم بها فقط.
ربما تقدر الفكرة ماتكونش واضحة انا انزيد نبسط ليك شويا بمثال حي.
تخيل معايا غاتعرض على صحابك.
الخيار الأول لي عندك هو أنك تجيبهم للدار ولكن هنا غايخصك توجد ليهم الماكلة بيديك. يعني اتمشي تقدا الدجاج والزيتون والبطاطا وباقي المكونات وغاتنصب ليهم شي دغميرة وتحمر ليهم الدجاج وتجيب المانض والعواصر. وهذا هو ما يسمى بالـ On-prem.
الخيار الثاني: هو تمشي لشي سناك تجيب دجاجة محمرة واجدة وعاد تجي للدار تنصب شي مريقة وتزيد شي شليضات وتستيكي القضية شويا وهذا هو مايسمى بالـ IaaS. بمعنى Cloud Provider عطاك الهاردوير ونتا كتكلف بالباقي انصطالي اش بغيتي وكونفيغيري كيف بغيتي.
الخيار الثالث: تريح فالدار مرتاح مع راسك. تهز الطيلي تدخل لـ Glovo ودير دوموند للدجاجة مع دغميرتها مع شلايضها مع مانضها. ملي يجيب لك الليفرور الكوموند. اتحط الطباسل وتوجد الطبلة والسلام عليكم. هذا هو الـ Paas.
الخيار الرابع: اتقولك لصحابك أنا عارض عليكم فمشواة الأخوين اليوم. تديهم تم ياكلو تم وتخلص كولشي تم وتهنى من الصداع. وهذا هو الـ SaaS. يعني الـ Cloud Provider عطاك كولشي وااجد باش تخدم بلاما دير حتى شي مجهود.
هنا غاتكون نهاية الشرح. أتمنى تكونو استفدتوا.
