غانتعرفو على أهم أنواع أجهزة الشبكات والفرق بينهم. وغاديين نتعرفو على كل
جهاز منهم بالتفصيل.
والأجهزة لي غانشرحوها هي:
HUB - SWITCH - ROUTER
طبعا هاذو كاملين أجهزة باش نقدرو نكونو شي شبكة. الإختلاف بينهم يكمن في
طريقة التعامل ديال كل واحد فيهم مع الـ DATA
نبداو مع الـ
HUB :
هاذ الجهاز البسيط، الدور ديالو هو يربط مجموعة من الأجهزة مع بعضها في شبكة
داخلية LAN.
كيكونو عندو عدة مداخل فين غايركبو الـ Cables وكيخدم بتقنية الـ Ethernet.
الطريقة باش كيخدم هاذ الجهاز، هو كيستقبل الـ Data من جهاز معين، وكيعاود
يصيفطها لجميع الأجهزة لي مكونيكطية معاه.
الـ HUB ماكيعرفش شنو هي الـ Packet وماكيعرفش حتى شكون لي غايستقبل الـ
Data. كل ما يفعله هو كيشد المعلومة لي باغي الشخص يصيفطها. وكيصيفطها لجميع
الأجهزة لي متصلة فنفس الشبكة على الـ HUB.
مثال:
عندنا واحد الشبكة مكونة من 4 حواسيب: PC1 - PC2 - PC3 - PC4
ومتصلين مع بعضهم عن طريق الـ HUB.
نفترض أن الـ PC1 بغى يصيفط واحد الميساج للـ PC2 فهاذ الحالة الـ HUB
غاياخذ داك الميساج وآيصيفطو للـ PC2 وكذلك حتى للـ PC3 و PC4. والـ PC3 و
PC4 غايشوفو الميساج وغايعرفوه بلي ما موجهش ليهم. وغايتم الرفض ديالو. والـ
PC2 غايوصلو وغايشوف أنه هو المعني بالأمر وغايقبل الميساج.
وهذا طبعا غايخلف بزاف ديال المشاكل متعلقة بالـ Security لأن الـ Data
ماغاتكونش محمية بشكل جيد وماغاتبقاش الخصوصية وكولشي ايولي يشوف الـ Data
ديال الآخرين.
وأيضاً مشكل الـ Traffic لي آيولي كثير داخل الشبكة ولي غايأثر على الـ
Bandwidth وغايخلق مشاكل فالشبكة.
إذن من خلال هاذشي لي قرينا، غانستنتجو أنه الـ Hub ماكيعرفش يتعامل مع الـ
Mac Adress ولا مع IP Adress. الدور ديالو هو يريبيتي الـ Data لي كتوصلو
والسلام.
إذن الـ Hub غايتصنف من بين الأجهزة لي كتخدم فالـ Physical Layer.
وأيضا الـ Hub كيخدم بالـ Half-Duplex مما يعني أنه مايقدرش يصيفط ويستقبل
الـ Data فنفس الوقت. فقط خاصو يصيفط، ويتسنى حتى توصل الـ Data عاد يعاود
يستقبل.
ومنه نستنتج أن الـ Hub جهاز ضعيف وماشي ذكي كفاية للتعامل مع الشبكات
الكبيرة والحساسة. فهو كيتعتابر تقنية قديمة وماكيتعامدش عليه حاليا داخل
الشبكات.
الجهاز الثاني لي هو البديل ديال الـ Hub ولي هو الـ
SWITCH
هاذ الجهاز الشكل ديالو شبيه بالجهاز لي قبل منو. غير هذا ذكي على الآخر،
وزايدين فيه بعض الخيارات المتقدمة مثل تقنية الـ PoE لي هي تقنية كتمكن
الأجهزة المتصلة على بورتات السويتش بالتزود بالكهرباء والـ Data وأيضا ذكي
لأنه كيتعامل بالـ Mac Adress مما يعني أنه كيعرف الأجهزة المتصلة على
البورطات ديالو، وملي شي جهاز كيرسل شي معلومة كيعرفو لمن راسلها وكيوصلها
ليه بوحدو.
ناخذو مثال للتوضيح:
عندنا الـ PC1 والـ PC2 متصلين عن طريق سويتش. الـ PC1 متصل على البورت رقم
1 والـ PC2 متصل على البورت رقم 8
الـ PC1 عندو الـ Mac Address هي :
AA-AA-AA-AA-AA-AA
الـ PC2 عندو الـ Mac Address هي :
BB-BB-BB-BB-BB-BB
السويتش عندو واحد الـ Table سميتها
Mac Address Table
هي بحال شي جدول كيبقى يحط فيها لادريس ماك ديال كل جهاز مربوط مع شي بورت.
يعني فهاذ الحالة أيحط لادريس:
AA-AA-AA-AA-AA-AA
قدامها البورت 1
BB-BB-BB-BB-BB-BB
قدامها البورت 8
وكذلك شحال ما زدنا ديال البيسيات ربطناهم مع السويتش. ايبقى ياخذ لادريس
ماك ديال كل واحد ويحطها قدام البورت لي مكونيكطي فيه.
تخيل نزيدو شي 6 الـ PCs آخرين لهاذ السويتش.
كيفاش بعدا السويتش غايقدر يعرف لادريس ماك ديال كل بيسي ؟
فالأول الطابل ديال السويتش راها كتكون خاوية وما كيكون عارف والو. ولكن باش
يعرف ليزادريس ماك ديال البيسيات لي مكونيكطيين فيه. كيرسل واحد الميساج
Broadcast بمعنى كيصيفط ميساج لجميع الأجهزة لي مكونيكطيا معاه !
يعني ولا كيدير نفس الخدمة ديال الـ Hub. ولكن السويتش كيدير هاذشي غا مرة
وحدة هي لي كيخزن فيها ليزادريس كاملين ديال البيسيات، باش من بعد أي بيسي
بغى يراسل شي بيسي معين. غايقلب عليه السويتش فالطابل وغايصيفط ليه بووحدو
بلاما يسيقو الآخرين الخبار.
إذن السويتش كيخدم بالماك آدريس مما يعني أنه كيخدم فالـ Layer 2 أي فالطبقة
ديال الـ Data Link.
أيضا كيستعمل تقنية الـ Full Duplex مما يعني أنه كيرسل ويستقبل فنفس الوقت.
كيحافظ على الـ Bandwidth مما يقلل من الـ Traffic فالشبكة.
وكيطلع من الليفل ديال السيكيريطي.
الجهاز الثالث هو الـ
Router
الجهازين لي قبل كنا كنشوفو أنهم كيخدمو فشبكة داخلية. الأول كيخدم فالطبقة
الأولى، والثاني كيخدم فالثانية. وهذا يعني أنهم بجوج مايقدروش يخرجو
يتكونيكطاو مع شبكة أخرى خارجية عليهم.
وهذا هو دور الراوتر، كيقدر يخرجك من شبكة لشبكة أخرى، يعني يربطلك شبكة
داخلية مع شبكة داخلية أخرى في مكان ما. أو أكثر من شبكة طبعا. لأنه هو لي
عندو القدرة يخدم بالـ Adress IP مما يعني أنه كيخدم فالطبقة الثالثة Layer
Network
الراوتر حتى هو عندو واحد الطابل كتسمى Routing Table فيها فين كيحط نمرة
البورت ولا الانطيرفاص ديال الراوتر لي متصل فيه الجهاز. وأيضا الآدريس IP
ديال الجهاز لي متصل فديك الانطيرفاص.
بحالو بحال السويتش غا هذا كيحط لادريس IP فبلاصة الـ MAC
الطريقة باش كيخدم الراوتر عن طريق بروتوكولات لي كدير الروتاج، بمعنى كتبقى
تختار المسارات المناسبة لنقل الداتا بين الشبكات. وأي شبكة داخلية باش تقدر
تخرج للخارج خاصها راوتر لي ايكون هو نقطة العبور.
مثال بسيط. فديوركم عندكم راوتر لي كتكونيكطاو بيه. باش تدخل للفايسبوك خاصك
ضروري دوز على الراوتر، لي كيحطك فالطابل ديالو، وكيمشي يربط الاتصال مع
الراوترات ديال مشغل الخدمة لي داير معاه نتا اشتراك، وكذلك راوترات مشغل
الخدمة بدورها كتكونيكطا مع راوترات أخرى حتى كتوصل للسيرفر ديال فايسبوك،
وكتعاود ترجع لك Request عن طريق نفس الطريق لي دازت منها. حتى كتوصل ليك.
هذا غا شرح بسيط جدا. باش تتخيل البرانسيب كيفاش داير. أما راه ما وراء
الكواليس شيء أعمق بكثير. غانعرفوه فيما بعد.
هذا كان الشرح ديال 3 أجهزة مهمة في الشبكات. كاينين أجهزة أخرى أيضا مهمة.
غانهضرو عليها فيما بعد ان شاء الله.
لتحميل الـ pdf:
