كتعريف للشبكات، هي 2 أجهزة متصلة مع بعضها أو أكثر. تقدر تكون عندي غير طابعة متصلة بحاسوب فراه هاذي كتعتابر شبكة.
وفعالم الشبكات الحاسوبية، كاينين بزاف ديال أنواع الشبكات. لي كتقدر تكون عبارة عن مجموعة من الأجهزة متصلة مع بعضها سواء سلكيا أو لا سلكيا، والشيء لي كيخلي هاذ الأجهزة تتواصل فيما بينها هي بروتوكولات لي تعرفنا عليها بشكل سطحي فالشرح ديال OSI Model ولي مزال غانتعرفو عليها فيما بعد بشكل مبسط أكثر.
وغانهضرو فهاذ المقال على أشهر أنواع الشبكات.
شبكة الـ PAN:
Personal Area Network
كتعتابر أصغر أنواع الشبكات وأقلها تعقيدا. وكيف ما كتشوفو فالإسم ديالها كيدل على معناها، ولي هي شبكة مخصصة لشخص واحد كيتعامل بها مع الأجهزة الخاصة به. والإستعمال ديالها كيكون محدد فاستخدام حاسوب شخصي أو أكثر متصلين مع بعضهم فنطاق جغرافي صغير ماكيفوتش بضعة أمتار. أو مع الطابعات أو أنترنت الأشياء والهاتف أيضا. وغالبا كيتخدم بالتقنية ديال البلوثوت أو NFC أو الكابل إيثيرنت. وغالبا كتتراوح مسافة الإتصال بين الأجهزة بين 5 حتى 10 أمتار.
من المزايا ديالها: أنها كتكون محمية نظرا لصغر حجمها وعدم اتصالها مع الكثير من الأجهزة. وأيضا لأن فالغالب كيكون شخص واحد فقط هو لي مسؤول عليها.
من العيوب ديالها: اذا كان المكان لي كتنشط فيه كبير بحال شي منزل كبير وفيه جدران كثيرة. فراه ماغاتخدمش بشكل جيد اذا بعدتي على الأجهزة. وأيضا تقدر تتأثر بإشارات أخرى كتخدم بنفس الترددات.
شبكة LAN:
Local Area Network
هاذي شبكة كتجي فالمرتبة الثانية من حيت الحجم، بحيث أنها تقدر تخدم فطابق كامل او فمنزل كامل بدون مشكل. وتقدر تخدم فيها الكثير من الأجهزة تقدر تتصل مع بعضها عن طريق الـ Switch أو الـ Hub. وغالبا المسافة ديال الإتصال كتوصل لـ 100 متر.
من المزايا ديالها: محمية من أي هجوم خارجي، كتسهل الوصول للمعلومات بحيث يمكن للمستخدمين لي فيها يبارطاجيو المعلومات مع بعضهم بشكل سهل وسريع وآمن. أيضا لا بغينا نكونيكطيو الأجهزة بالانترنت يكفي يكون عندنا جهاز راوتر واحد، انربطوه مع جميع الأجهزة ونقدرو نخدمو عادي.
من العيوب ديالها: التكلفة ديالها كتكون غالية من ناحية توفير الأجهزة. بحيث أنك خاصك توفر لكل شخص حاسوب شخصي ديالو وطابعة شخصية إذا دعى الأمر، كيف ما يمكن ليك تتفادى شراء الكثير من الطابعات وتعتامد على واحدة فقط تبارطاجيها مع كولشي. لمهم داكشي كيبقى راجع لطريقة العمل وشنو الشركة غاتحتاج.
أيضا من العيوب، خاصك تقني لي غايبقى يراقب الأجهزة ويحل المشاكل لي كتوقع خاصة فالبارطاج وما يتعلق بالريزو، لأنه كيكونو الكثير من المشاكل فهاذ الجانب.
وأيضا المستخدمين ماغاتكونش عندهم الخصوصية الكاملة فالحواسيب ديالهم. لأنه دائما الأدمن غاتكون عندو الصلاحيات باش يقدر يدخل لأي جهاز ويشوف اش كيوقع فيه.
شبكة WLAN:
هي نفس الشبكة LAN الإختلاف الوحيد لي كاين هو أن هاذ الشبكة كتخدم بالـ Wireless مثل الـ WI-FI والشبكة ديال LAN كتخدم بالـ Cables Ethernet.
شبكة CAN:
Corporate Area Network
أو
Campus Networks
حيت كيتم إستخدامها بكثرة فالجامعات، وهي كتستخدم فربط الإتصال بين عدة مباني فحدود مسافة 5 كلم. بمعنى هي أكبر من LAN وأصغر من MAN.
من المزايا ديالها: سرعة نقل بيانات كبيرة، بحيث كتخدم بتقنية Gigabyte Ethernet أو الألفيات البصرية. مستويات عالية من الحماية، لي كتخلي جميع المعلومات محمية من جهات خارجية.
من العيوب ديالها: أنها مكلفة من ناحية البنية التحتية.
شبكة MAN:
Metropolitan Area Network
هاذي شبكة أكبر من سابقتها، وهي عبارة عن بزاف ديال الشبكات من نوع LAN متصلين مع بعضهم عن طريق كابلات الألياف البصرية (Fibre Optique) وكتتراوح المسافة ديالها بين 50 حتى 100 كلم.
من المميزات ديالها: سرعة نقل بيانات عالية بين الشبكات LAN بحيث أنها كتخدم بالفايبر اوبتيك لي كتقدر توصل السرعة ديالو لـ 200 ميغا فالثانية. كتخدم بتقنية Full Duplex وأيضا كيكون متوفر فيها دعم تقني متقدم، من طرف شركات الإتصال.
من العيوب ديالها: غير آمنة بشكل كافي من الهجومات الخارجية، لأنها خرجات لنطاق جغرافي واسع. وأيضا التكلفة الباهظة ديالها.
شبكة WMANs:
هي نفس شبكة الـ MAN غا هي كتخدم بالـ Wireless عن طريق إشارات الميكروويف والمدى ديالها كيوصل حتى لـ 3 كلم.
شبكة WAN:
Wide Area Network
هاذي هي أكبر شبكة كاينة، بحيث هي لي كتربط العالم كامل مع بعضو. وبها باش خدامة الأنترنت. وأيضا كتستخدم حتى فربط الشركات مع بعضها من مدن الى اخرى اول دول الى الأخرى.
من المزايا ديالها: كتغطي نطاق جغرافي كبير.
أيضا سرعة نقل البيانات كبيرة نظرا لاستخدام الألياف البصرية.
من العيوب ديالها: تكلفة ضخمة من ناحية توفير الموارد.
صعوبة الصيانة في حالة وقع مشكل، بحيث خاص الفنيين يبقاو يبحثو فبزاف دالبلايص باش عاد يعرفو المشكل.
وأيضا صعوبة فإجراءات الحماية.
شبكة WWANs:
مثلها مثل WAN غا هي خدامة بالـأقمار الصناعية وكتقدر تغطي مساحة مداها حوالي 20000 كلم.
شبكة SAN:
Storage Area Network:
هاذي عبارة عن شبكة للتخزين. كتكون مكونة من بزااف ديال وحدات التخزين (Hard Disks) لي كيكونو مربوطين بالـ FiberChannel باش كيخدمو بسرعة كبيرة فنقل البيانات داخل الشبكة.
كاين أيضا بعض الشبكات الأخرى مثل الـ EPN اختصارا لـ Entreprise Private Networks ولي كتكون دايراها شركات خاصة بها. باش تحمي البيانات ديالها الحساسة، بحيث أن حتى واحد ماكيقدر يدخل معاهم للشبكة.
أيضا كاينة شبكة VPN، اختصارا لـ Virtual Private Network. هاذي شبكة لي كتخليك تتخفي وسط الأنترنت، ولي هي شبكة وهمية كتعطيها ليك شركة من الشركات لي كتكون كتقدم هاذ الخدمة. الهدف منها هو الاتصال بالانترنت بشكل آمن خوفا من التجسس.
هاذشي لي كاين مع أنواع الشبكات الأكثر شهرة واستخداما.
رابط تحميل المقال على شكل PDF: من هنــا