طريقة ربح التطبيقات المجانية:
كيفاش كيربحوا المبرمجين ديال التطبيقات المجانية.. ربما بزاف منكم راودو هاد السؤال ومالقاش ليه اجابة.. وفهاد المقال غادي نجاوبك..
فـ Play Store كاين تقريبا 3 دالمليون تطبيق.. وفـ Appstore كاين تقريبا 2 دالمليون تطبيق.. وعند وينداوز كاينة تقريبا 700 ألف تطبيق. كاين فيهم تطبيقات لي كتشرى بالفلوس يعني قبل ماطيليشارجيها كيقولك خاصك تخلص واحد القدر من المال.. وكاين تطبيقات لي مجانية كتجي نتا كتكليكي على آنصطالي وكطيليشارجيها بلا ريال بلا جوج..
التطبيقات لي كتشرى.. كتسمى Paid Mobile Apps بمجرد انك كتشريها راه مولاها ربح الفلوس مباشرة.. هذا شيء طبيعي.. تقدر تقول مع راسك وايلي تانتا شكون غايشري تطبيق.. غانقولك بلي كاينين ناس لي كيشريو التطبيقات مهما كان ثمنها.. حيت كاين لي كتهموا جودة التطبيق وماكيهموهش الفلوس، وكاين لي كيبغي يستخدم التطبيق بلا إعلانات.
الطوف لتحت راه فيها الإحصائيات ديال شراء التطبيقات المدفوعة والتطبيقات المجانية ف 2021، بالنسبة لل IOS و Android
لكن التطبيق لي ماكتشريهش.. كيفااش مولاه غايربح منو ؟ هذا هو لي غانتكلموا عليه دبا.. هاد النوع من التطبيقاات سميتو Free Mobile Apps هاد النوع من التطبيقات هو الاكثر.. وحتى هو ربحي.. وطرق الربح منو عديدة أولها:
√ إعلانات الـ Banner Ads وهاد النوع من الاعلانات هو داك المستطيل لي كيطلع ليك فالتطبيق وكيكون عبارة عن اعلان كيبقاو يطلعو ليك فيه مثلا هل انت وحيد ويديرو ليك شي طوف ديال شي درية.. هاد الاعلانات طريقة الربح منهم يا اما المشاهدة ولا تدخل ليه ولا غير بمجرد انك تآنيليه..
√ كاين نوع تاني سميتو Native Ads هذا كيطلع على شكل فيديوات ولا تصاور ولا مقالات.. كيكونو مرتابطين مع موضوع التطبيق.. وهاد النوع من أفضل الاعلانات.. بحيث انه ماكيشكلش إزعاج بالنسبة للمستخدم.. وحتى المعلن كينعاكس عليه بالرباح..
√ ثالث نوع Video Ads هذا من سميتو باين.. هما دوك الاعلانات لي فيهم فيديوات كيبقاو يطلعوا ليك مثلا فشي ابليكاسيون غصبا عنك وكيعطيوك فيه شي 30 ثانية كتبقى تسناه حتى يحبس راسو..
√ رابع نوع Interstitial Ads هذا من بين أخيب الاعلانات لي كلكم كتعنيو منو وكيكرهكم.. ولي هو الاعلان لي كيغطي ليك الباج كاملة وخاصك حتى تكليكي على فيغمي عاد كيحايد.. وفديك الكليك ديال فيغمي كيدخل اللعاقة هو.
√ خامس نوع Incentivized Ads هاد الاعلانات ماكديروش الطيارة.. هو اعلان اختياري.. كيكون بزاف فالالعاب.. الناس لي كانو كيلعبو لعبة Parchisi ملي كانو كيكملو ليكم الكوانز كنتو كتلقاو واحد الاعلان كيقولك تفرج فهاد الفيديو وربح 500 وكتبقى تفرج فيه لمدة شي 30 ثانية.. وكاين حتى فدوك الالعاب ديال الالغاز كيقولك الى بغيتي نعاونوك تفرج فالفيديو..
هاذو بالنسبة للربح من الاعلانات.. كاينين طرق اخرى للربح منهم:
√ In-Ap Purchases
كتعني تشري من وسط التطبيق.. مثلا لعبة فري فاير كيقولك الى بغيتي تشري هاد السلاح ولا هاد اللبسة خاصك تخلص 20 درهم مثلا.. تقدر تقول ليا وايلي تانتا من نيتك بنادم غايشري هاد التخربيق وخا لعبة.. غانقولك أن الناس لي كيبرمجوا هاد الالعاب راه خطيرين.. كيلعبوا على الجانب النفسي ديال المستخدم وكيخليوه يدير بزاف دالحوايج.. واللعبة الى لاحظتوا أنها متاحة من 16 لعام يعني شوف الفئة لي مستهدفين.. الدراري مزال صغار كيخليوهم يعيشو حب المغامرة.. وحتى الدراري الكبار تا هما كيشريو باش يبداو يعيقو على صحابهم وكذا.. وراكم كتشوفو كولشي بعينيكم، لمهم عملية الشراء داخل التطبيقات كاينة وبكثرة.. وماشي غا فالالعاب كاينة حتى فتطبيقات اخرى بحال بيكس ارت مثلا كيقولك شري الخطوط والطيمات وبزاف دالبلانات..
√ Subscriptions
الاشتركات.. مثلا كتلقى شي تطبيق كيقولك اشترك معانا لمدة شهر وخلص هاد المبلغ باش تستافد من هاد الميزة.. كتكون بزاف فالتطبيقات ديال الديزاين..
√ Sponsorship
وهذا كيشبه ل Native كيعني انهم كيديرو شي راعي رسمي عندو علاقة مع موضوع التطبيق.. ملي كتدخل للتطبيق كتقرا المحتوى ديالو كيطلع ليك حتى الاعلان ديال لي داير مول التطبيق وكيكون عندو علاقة بالمحتوى..
كيفاش كيربحو المواقع الإلكترونية؟
طرق الربح ديال هاد المواقع مختلفة.. والبعض منها مشتركة.. مثلا معظمهم كيربح من الإعلانات.. كيفااش كيربحو من الإعلانات؟
نعطيك مثال كيف العادة.. لأنه بالمثال يتضح المقال..
لنفترض نتا صاوبتي موقع ديالك بهدف الربح.. كتصاوب الموقع ديالك وكتحط فيه المقالات والصور وما الى ذلك.. لحد الآن نتا مزال ماكتربح والو.. ملي كيكون الموقع ديالك جاهز.. كتدفع لكوكل آدسنس باش تولي تعرض الإعلانات ديالها فالموقع ديالك.. ومن خلال هاد الاعلانات غاتولي نتا تربح الفلوس..
مثلا الموقع ديالي darijatec الى لاحظتي ملي كتدخل تقرا شي مقال كيطلع ليك وسط المقال بعض الاعلانات، دوك الاعلانات هما لي كنربح منهم انا، وخا فالحقيقة ماكنربح والو، والسبب راجع لأنه الطرافيك لي كيجي للموقع جد جد ضعيف، وهذا بسبب أن الموقع موجه للمغاربة فقط. والمغاربة كما هو معروف عليهم ماكيحملوش شي حاجة سميتها القرايا. زائد الموقع فقط مخصص لفئة معينة أكثر الناس لي مهتمة بمجال المعلوماتية وعددهم قليل جدا، وعدد لي مهتمين يقراو أقل بكثير. لذلك المقال ماكيفوتش 100 مشاهدة، وهذا يالاه كيدخل شي 0.1 درهم. ولك أن تتخيل كمية الأرباح لي كندخل. وأعتذر إلى برزطوك هاد الإعلانات أثناء القراءة. كنظن راك غاتعذرني دبا.
لكن كيفاش غاندير نربح من هاد الإعلانات انا ؟
اوكي.. نبقاو مع كوكل ديما لأنها هي أكبر منصة للاعلانات فالعالم.. فهاد كوكل كاينين جوج بلانات.. كاينة كوكل ادسنس لي هي مديورة غير للناشرين يعني الناس لي عندهم مواقع كتخدم فيها..
وكاين كوكل ادووردز لي هي مديورة للناس المعلنين.. الناس لي عندهم شركات مثلا وكيبغيو يروجو المنتوجات ديالهم.. فكيجيو عند كوكل كيعطيوها الفلوس وكيقولو ليها ديري لينا اعلان للمنتوج ديالنا.. وهنا كوكل كتحط المنتوج ديال دوك الاشخاص فالموقع ديالك وكتبقى تعطيك واحد النصيب من داكشي لي ربحات من عند المعلن.. ولكن كتربح الفلوس على قد الناس لي دخلو للموقع ديالك وشافو الاعلان.. عموما هاذي فكرة بسيطة باش تفهم كيفاش كيتم الربح من خلال الاعلانات.. ومن بعد غانشرح هاد الموضوع فمنشوور خااص.. لأنه فيه مايتقال..
هاذي هي الطريقة المشهورة ديال ربح المواقع.. لكن كاينة طرق اخرى لي كيكون فيها الربح بدون اعلانات..
هنا غانسلطو الضوء على مواقع التواصل الاجتماعي خصوصا فايسبوك وواتساب.. طريقة ربح واتساب ديجا دويت عليها فمقال مفصل هــنا
ف 2016 مارك شرا الواتساب ب 19 مليار دولار ! مبلغ خيالي رغم أن قيمة التطبيق فداك الوقت كانت يالاه مليار ونص دولار.. ويالاه كانو مطيليشارجينو حوالي 500 مليون..
فعلاش فنظرك مارك خلص هاد المبلغ الخيالي على قبل هاد التطبيق ؟
لأنه ببساطة بان ليه هذا هو التطبيق المربح ولي غايدخل ليه الزباابل دالفلوس.. والطريقة كاملة تكمن فبيانات المستخدمين..
كيعرفك معامن كدوي وشنو كتبغي وعلاش وكيفاش أي لعبة ذكرتيها فالشاط كيعرفها مارك..
هنا كيبدا اللعب الصحيح.. كيهز بياناتك يبيعها للمعلنين هاذي الأولى.. ويعاود يبيعهم لشركات اخرى مختصة فالذكاء الاصطناعي وما الى ذلك.. ويبيعها لجهات حكومية.. ورابع حاجة كيديفلوبي الابليكاسيون ديالو عن طريق بياناتك.. شفتي شحال من حاجة كيدير بالبيانات ديالك !
كاين منكم لي غا يتساءل كيفاش كيديفلوبي الابليكاسيون بالبيانات ديالي؟
يعني كيشوفك علاش كدوي كيفاش طريقتك فالحوار.. شنو الصعوبات لي كتلقى باش تكونيكطا شنو الحوايج لي كتبغيهم ومكتلقاهمش وشنو الطرق السهلة لي كتخليك تستعمل دوك التطبيقات. وهو كيزيد يديفلوبي اكثر التطبيقات ديالو باش يبقى مواكب التطور وماتجيش تطبيقات اخرى بمزايا اخرى وتدي ليه بلاصتو..
نفس الشيء كتعتامد عليه شركة كوكل.. غير هو شركة كوكل هربات حيت أي واحد كيستعمل نظام اندرويد راها كتعرفو فين كيمشي وشنو كيدير.. كتعرفك كثر من واليديك وصحابك. لأن أولا النظام ديال اندرويد هو ملك لشركة كوكل.
والبلاي سطور هو ملك لها أيضا.. وتطبيقات جيمايل ويوتيوب ودرايف وكروم وكوكل فوطو وهانكوس ومابس ديال الخرائط وبلاي ميزيك لي كتمزك بها فطيلي وبلاي فيديو والغراق ديال الابليكاسيون.. وعاد زيد عليها المواقع لي كتسجل فيهم بجيمايل كلهم كتكون عندهم الاطوغوزيسايون باش يوصلو ليك المعلومات ديالك وسط داك الموقع.. ويشوفوك اش كدير تم..
وكذلك العكس كيوقع ملي كتبغي تسجل فشي موقع بجيمايل ديالك.. كيقولك وافق على الشروط ومن بين دوك الشروط هو الوصول الى معلوماتك لي مرتبطة مع داك الجيمايل.. يعني حتى هما كتعطيهم الاوطوغيزاسيون باش يوصلو لكولشي.. وهما ايضا كياخذو بياناتك ويستغلوها يا اما فبيعها لجهات اخرى او يستغلوها فتطوير مواقعهم نيت..
وكاينين طرق اخرى للربح ولي هي الشراء من داخل المواقع او التطبيقات.. بحال المواقع لي كتبيع الضومينات او الهوستينغ.. او لي كتقدم خدمات مختلفة.. بحال VPN, VPS..
هاذو هما أهم الاشياء والطرق لي كيربحوا بها الناس اصحاب التطبيقات المجانية، والمواقع الإلكترونية.
نتمنى تكونوا استافدتوا.
