من أكثر الأشياء لي كنعانيو منها كــــاملين وخصوصا الناس لي كيقراو. هو عدم تنظيم الوقت. كل مرة كتبغي تنعس كتبقى تفكر شنو درتي فنهارك وشنو استفدتي وشنو لي مادرتيش, وكتبقى تفكر شنو غادير غدا ملي تفيق الصباح حتى تبغي تنعس. (طبعا كل شخص كيدير هادشي فراه مهتم بحياته ولو بنسبة قليلة, أما لي ماكيديرش هادشي فراه هاد الكلام غير موجه ليه. وخاصو يمشي يراجع نفسو فأقرب وقت حيت راه غادي فالخسران).
من بعد تفكير كبير وطويل كتلقى راسك كتعيش نقدرو نقولو حروب فكرية, بحيث عقلك ما منظمش الأفكار, باغي دير بزاف ديال الحوايج لكن ماعندكش بلانينغ منظم لي غايقدر ينظم حياتك ويخليك مكونطرولي كل كبيرة وصغيرة. كتبغي تلقى حد لهادشي وكتفكر أنك تبقى تحط بلانينغ فشي دفتر ولا شي ورقة. ولكن كتلقى داكشي ما مخرجكش, ما كيعطيكش واحد الجرعة تحفيزية تخليك تواكب داك النظام. لآن داكشي كيكون عشوائي وما كتعرفش شنو تقدم وشنو تأخر, وأيضا كيكون بشكل سطاتيك. نتا خاصك شي حاجة ديناميكية لي غاتخليك تواكب داكشي بواحد الوثيرة منتظمة واستمرارية, من هنا جات فكرة
تطبيق Notion
غايكون فيكم لي كيعرف هاد التطبيق وكاين لي أول مرة سمع الاسم ديالو.
هذا تطبيق لتنظيم الوقت. كيف كنعرفو كاينين بزااف ديال التطبيقات لي كينعاونوك فتنظيم وقتك, وعلى رأسهم الكالوندري ديال الطيلي ديالك. لكن داكشي كيكون محدود وما كيشبعش. تطبيق نوشن هو تطبيق متكامل ومثالي, بحيث غاتلقى فيه كووووولشي, وكولشي المقصود بها هي كولشي بدون إستثناء !
غاتنظم فيه وقتك بالشكل لي بغيتي وتقدر دير فيه قواعد بيانات تربطها مع بعضها البعض وتولي تخدم بشكل ديناميكي بلا التدخل ديالك نتا, هي تفكرك بكولشي. هي غا تقولك إمتى خاصك دير لي طاش ديالك, شحال باقي ليك, تقدر تحط فيه الملاحظات ديالك. تقدر تحط فيه تصاورك, فيديوهاتك, صفحات ويب.
أنا كنقتارح عليكم تجربو هاد التطبيق الجميل, سواء على وينداوز ,لينكس, أندرويد أو أجهزة آبل.
غايبانليك فالأول على أنه تطبيق غير مفهوم بمرة, وأنه صعيب فالخدمة, ولكن غير غاتفهموا, غايولي يبان ليك ســاهل, وغاتولي تعامل معاه بطريقة جد سهلة.
إلى كان شي إقبال على التطبيق نقدر ندير عليه شي فيديوات تعليمية أساسية.
رابط الموقع: كليكي هنا
بالمناسبة تقدر تفتحوا حتى من البراوزر وتخدم فيه من تم دون الحاجة لتحميله.
نخليكم مع بعض الصور من داخل التطبيق:
