فهاد المقال غانعطيك بعض المعلومات لي تقدر تنفعك فالحفاظ على بطارية هاتفك الذكي، باش يبقى معاك لأطول مدة ممكنة. فكيف كنعرفو أكثر مشكل كنواجهوه رغم أننا فعصر التكنولوجيا هو مشكل الباطري. مكنكرهوش داك الباطري ما ينقصش ويبقى شاد 24 ساعة كاملة وخا نديرو لي درنا.
لكن هادشي مايمكنش، لأن الهواتف صغيرة الحجم وبالتالي سعة البطارية حتى هي غاتكون صغيرة لذلك خاصنا نعرفو نتعاملو مع الهاتف ديالنا باش نستافدو من بطاريته أكثر وقت ممكن.
إذا يالاه شريتي طيلي جديد، خليه يتشارجا حتى يوصل ل 100% فأول مرة ليه. من بعد خدم بيه عادي. وماتخليهش يوصل لتحت من 20% ، ملي يوصل لهاد النسبة ديرو يتشارجا وملي يوصل ل 80% حايدو وتقدر تخليه حتى ل 99% ماشي مشكل.
علاش كنقولك هاكا بالضبط، باش تحايد منك ديك القضية ديال تا نبغي نعس وندير الطيلي يبات فالشارج باش يصبح ناضي عامر 100% هاذي هي الخطوة لي غاتكون السبب فنفاذ البطارية بسرعة وماغاطولش معاك بزاف.
الباطريات عندهم واحد المدة معينة من دورات الشحن. ملي كيتسالاو دوك الدورات كتكون سالات المهمة ديال الباطري. داكشي علاش كيولي يبان ليك الباطري فيه 80% كتخدم به 10 دقايق كتلقاه 10% هنا الباطري انتهت صلاحيته. لأنه صافي نفذات منو عدد الدورات لي كيتشحن فيها ويشد فيها الشارج. وملي نتا كتخليه يبات فالشارج وكيوصل ل 100% كيوقف الشحن اوتماتيكيا، لكنه كيبدا يستهلك فالشارج لأنه طبعا خدامين فيه بزاف ديال لي سيرفيس لي كيستهلكو الشارج.فبذلك فكل مرة كينقص فيه شويا. كيعاود يتآكتيفا الشارج اوتوماتيكيا وكيبدا يتشارجا وكيوصل ل 100% وكيعاود يوقف اوتوماتيك. وكيبقى يتعاود نفس البلان طيلة الليل وفكل مرة كتنقص منو دورة ديال الشحن من دوك الدورات لي محددين ليه. إذن هاكا نتا كتساهم فنفاذ الدورات ديال الشحن لي تقدر تستافد منهم بزاف دالوقت. لذلك حط طيليفونك يتشارجا لمدة ساعة او ساعة ونص وحايدو. إلى كان مديشارجي وباغي تنعس ريكل الريفيي وخليه يتشارجا ملي يصوني حايدو من الشارج ودير مود آفيون ونعس. ولا حتى تقرب تفيق بشي ساعة ونص وديرو يفيقك ونوض ديرو يتشارجا.
خوذ شارجور دوريجين يكون فيه لومبيراج طالع أو يكون كيساوي لومبيراج لي مطلوب للهاتف ديالك، حيت الى كان مثلا طيليفونك كيبغي 1.5 أومبير، ونتا كتشارجيه بشارجور فيه 0,5 اومبير، فراه ما كياخذش داكشي لي باغي وماكيتشارجاش بكفاءة مزيانة. الى كان لومبيراج طالع فالشارجور راه ماشي مشكل، حيت الطيلي اياخذ داكشي لي باغي فقط. هادشي كينطابق على كاع الاجهزة الالكترونية.
أيضا حتى الكابل كيلعب دور مهم. الى كان الكابل عيان ذو جودة ناقصة، راه ماغاينقلش التيار بشكل جيد. لذلك خوذ كابل دوريجين باش يكون داكشي متكامل.
ماتخدمش بالطيلي وهو كيتشارجا، هاذي هي الضربة القاضية للباطري. لأنك ملي كتكون خدام بيه وهو كيتشارجا. كتهلكو ديال بصح. خلي الطيلي يتشارجا على خاطرو عاد خدم به.
هاذو كانو أهم الحوايج لي خاصك دير باش تحافظ على الباطري ديالك.
درتي هادشي كما ينبغي، شارجتي الطيلي ديالك وخدام به، كيفاش تقدر تخلي الباطري يدوزك معاك النهار مزيان؟
إلى كنتي فبلاصة خارج التغطية مافيهاش الريزو. دير مود آفيون، لأن السيرفيس لي كيقلب على الريزو كيولي يكونصومي الشارج بزاف حيت كيدير مجهود كبير باش يقلب على أبعد الأبراج يجيب منهم الريزو. لذلك باش تفادى هاد المشكل دير مود آفيون.
إلى كانو عندك تطبيقات بزاف وماكتخدمش بهم ونتا خارج. ديزاكتيفيهم باش مايبقاوش يكونصوميو الشارج فالخلفية ديال السيسطيم. تقدر دير ليهم فورصي لاغيط من الباراميطر ولا استعن بشي تطبيق كيدير هاد المهمة.
آكتيفي المود ديال الكونصوماسيون دشارج. راه كاين فمعظم الهواتف الذكية الجديدة.
إلى كان حداك الويفي تكونيكطا به فبلاصة ما تكونيكطا بالكاط جي. لأن الويفي الاستهلاك ديالو للبطارية كيكون قليل.
ديزاكتيفي لي نوتيفيكاسيون ديال التطبيقات الغير مهمة بالنسبة ليك. لأن النوتيفيكاسيون حتى هما كيكونصوميو الشارج.
كاين ناس ديما مآكتيفيين ال GPS ديزاكتيفيوه راه كيشرب الشارج هو والبلوثوت. إلى ساليتي من الكيت بلوثوت ماشي طفي لكيت. وتخلي الطيلي مآكتيفي فيه. حتى هو طفيه.
حاول ما تخدمش بطيليفونك فالشمس حيت السخونية كتخرج على الباطري فيزيائيا ماشي غير لوجيك.
وأخيرا. قلل من استخدامك للهاتف وسرح عينيك وريحها شويا من الأشعة الإلكترونية ملي تكون برا.
