الأنتر فيلان ، من الاسم ديالو كيبان على أنه عندو علاقة مع ال VLAN ، والدور ديال هاد ال inter vlan هو يكومينيكي لينا ال Vlans لي عندنا فشي سويتش او سويتشات مع بعضياتهم.
السؤال لي غايتبادر للذهن ديالك دبا هو : شنو استافدنا الى شدينا واحد السويتش وقسمناه مثلا على جوج ديال VLAN ومن بعد جبنا روتور ودرنا فيه الانتر فيلان باش يعاود يكومينيكي لينا دوك البياسات لي قسمناهم عن طريق ال VLAN ؟؟؟
العملية كتبان منطقيا غير منطقية ياك ! ولكن راه وخا هاكاك حنى محتاجين لل VLAN لأنه عندو بزااف ديال المزايا ، كيقلل لينا من الاجهزة، فمثلا الى انا عندي 60 بيسي وبغيت نقسمهم 30 يكونو فزون وحدة ويهضرو مع بعضياتهم. وندير 15 يهضرو مع بعضياتهم وندير حتى لل 15 الاخرين بوحدهم. الى جيت نستعمل الطريقة العادية غادي يخصني ثلاثة السويتشات ! هنا غانكون زدت التكلفة عليا لأن ثمن السويتش غالي. وغانكون زدت بزاف ديال لي زيكبمون.
لهذا كيجي ال VLAN وكيحل ليا هاد المشكل، وكنقدر نشد سويتش واحد ونكريي فيه 3 ديال ال VLANs وندخل فالفيلان الاول 30 بيسي ، والفيلان الثاني 15 والفيلان الثالث 15 وهاكا كنكون جمعت كاع لي بيسي فستويش واحد ولكن مايقدروش يهضرو مع بعضياتهم رغم أنهم فنفس السويتش.
لكن هنا كيتخلق مشكل اخر. الى انا بغيت شي بيسي من دوك 30 يهضر مع شي بيسي من دوك 15 لاخرين. مايمكنش حيت ماداخلينش فنفس الفيلان. إذن هنا كيجي الدور ديال inter vlan لي كيخليني نقدر نكومينيكي بين الفيلان. ولكن هنا نيت راها مشكلة اخرى. حيت الانتر فيلان كيخلي الفيلان كااامل يعني ديك 30 بيسي كلها تولي تكومينيكي مع ديك 15 بيسي الاخرى. ماشي غير بيسي واحد. وهنا كتجي مسألة اخرى لي كتحل هاد المشكل ولي هي ال ACLs ولي غانهضرو عليهم فيما بعد.
هاذي فقط كانت واحد الصورة شاملة على شنو كيوقع وعلاش كنحتاجو الفيلان والانتر فيلان. ونتمنى تكون وصلات الفكرة.
باش ندير الانتر فيلان، خاصني روتور ضروري. لأن الكونفيكيراسيون ديال الانتر فيلان كتكون فالروتور ماشي السويتش. ولكن السؤال هنا، فرضا لو كان عندي 50 فيلان. واش غايخصني 50 روتور ؟ حيت ماكاينش شي روترو غايعطيني 50 بورت باش نكومينيكيه مع ديك 50 فيلان. الجواب هنا غادي نحتاج روتور واحد فقط. وغانحتاج أنترفاس فيزيك وحدة. وفديك الانترفاس غانكريي 50 sub interface
يعني كيف ما انا درت 50 فيلان فسويتش واحد غادي ندير 50 انترفاس وهمية فداك الروتور.
انا هنا كنتعامل فقط مع الوهمي وليس الفيزيائي. ونرجعو للمثال ديالنا دبا لي كان عندنا فيه VLAN فيه 30 بيسي. و VLAN فيه 15 وفيلان فيه 15
غادي نمشي للانترفاس ديال الروتور لي مربوطة مع السويتش. وغادي نكريي فيها 3 ديال Sub interface
غاناخذو ال VLAN لي فيه 30 بيسي ونسميوه: VLAN10،
ونعطيوه لادريس ديال: 192.168.1.0/25
وناخذو ال VLAN لي فيه 15 نسميوه : VLAN20،
ونعطيوه لادريس ديال: 192.168.2.0/25
والثالث لي حتى هو فيه 15 نسميوه : VLAN 30،
ونعطيوه لادريس ديال: 192.168.3.0/25
انا خذيت لي زادريس بشكل عشوائي وصافي. غير باش نشرحو.
لنفترض عندنا لانطيرفاص ديال السويتش لي ملاصقة مع الروتور هي G0/1
اول حاجة خاصني ندير هي نمشي نعطي لهاد الانطيرفاص المود ديال Trunk باش تقدر تاخذ لي دوني من عند الروتور وتفرقهم على ال VLANs ، وذلك عن طريق الكوموند :
S1(config)#interface g0/1S1(config-if)# switchport mode trunk
ونمشي دبا للروتور وندخل للانطيرفاص ديالو لي مربوطة مع الروتور ولتكن مثلا: G0/0/0
أول حاجة غاندير هي نآكتيفي لانطيرفاص عن طريق الكوموند :
R1(config)#interface g0/0/0R1(config-if)#no shutdown
ونمشي دبا نكريي أول sub فنفس الانطيرفاس طبعا، وذلك عن طريق الكوموند:
R1(config)#interface g0/0/0.10R1(config-subif)#encapsulation dot1Q 10R1(config-subif)#ip address 192.168.1.1 255.255.255.128
الشرح:
هنا اول حاجة درت هي الكوموند:
R1(config)#interface g0/0/0.10
هنا قلت لو غادي تكريي ليا واحد الانترفاس لوجيك وسط هاد لانطيرفاس فيزيك وعطيتها 10 حيت هي لي غاتكون كتنتامي للفيلان 10
من بعد حولني للمود الاخر، ودخلت فيه:
R1(config-subif)#encapsulation dot1Q 10
هنا شنو كتعني ديك encapsulation dot1q ؟
السويتشات مع بعضياتها كتكونيكطا عن طريق Frame كيف شفنا فالموديل OSI , وهاد الفريم الشكل ديالها هو Ethernet طبعا كيف ما قرينا فال OSI ، هاد الفريم باش تنتاقل من سويتش لآخر خاصها شي بورتوكول يعاونها باش تنتاقل وهاد البروتوكول هو : IEEE 802.1Q هاد البروتوكول كيدير Tagg لأي Frame كتخرج من شي سويتش متجهة لشي سوتيش آخر من خلال ال Trunk. يعني كيعرفها ديالمن وفين غادية. والسويتشات نورمالمون كتبادل المعلومات مع بعضها على شكل: Ethernet frame 802.3
داكشي علاش ملي هاد الفريم كتوصل للبورت ديال سويتش لي حددناه باش يكون Trunk غادي يدير ليها Encapsulation وكيرجع على هيئة IEEE 802.1Q ماكيتبدل واالو فهاد العملية، سوا أنه كيتزاد واحد الحقل جديد فيه Tag لي قلنا الفوق أنه كيكون فيه المعلومات ديال السوتيش.
داكشي علاش كنديرو ليه هاد الكوموند.
ومن بعد كنعطيوه لادريس انا هنا عطيتو البروميير ادريس،
R1(config-subif)#ip address 192.168.1.1 255.255.255.128
نفس الشيء كنديروه مع جميع الفيلانات الاخرين. ماغاديش نكمل الشرح ديال لاخرين باش ديروه نتوما راسكم. وتشوفو واش غاتفهمو ولا لا.
