فمقال سابق لي كيحمل إسم Model OSI Darija عطيت واحد النظرة شاملة ومختصرة على الموديل أوزي وجميع الطبقات ديالو. وفهاد المقال غادي نهضر على الطبقة الأولى من هاد الموديل ولي هي طبقة التطبيقات Couche Application ولي غاتكون ضمن سلسلة جديدة غانشرح فيها جميع الطبقات بالتفصيل.
هاد الطبقة هي المسؤولة عن نقل البيانات بين الأجهزة ولي كيكون فيها النقل عن طريق إشارات كهربائية بالنسبة للكابلات من نوع Paire Torsade أو عن طريق إشارات ضوئية بالنسبة للفايبر أوبتيك أو الالياف البصرية. وهاد الإشارات كيكونو عبارة عن سلسلات مكونة من الــ Bits .
الـ Bits هو العنصر الأساسي لي خدامين بيه الشبكات, حيت أي عملية كنديروها من إرسال بيانات (صور, فيديوات, موسيقى, مقالات.. إلخ) وكيتم ترجمتها حسب تخصص كل قطعة جهاز. مثلا ملي كتكون عندنا إشارات كهربائية منقولة فالكابل من نوع Droit فهنا غايتم ترجمته لـ 1 و 0
نشوفو دبا كيفاش كيتم نقل هاد الـبتات بين جهازين. وليكن مثلا الـ PC1 باغي يرسل شي معلومات للـ PC2
الإتصال الأحادي: Single
فهااد النوع من الإتصال غايكون غير الـ PC1 لي قادر يصيفط المعلومات للـ PC2 , ولكن الـ PC2 ماغاديش يكون قادر يجاوب. هاد النوع من الإتصال كاين بزاف, مثلا التلفاز لي فداركم كيعرض عليك الصورة والصوت ولكن نتا ماتقدرش تجاوبو وهذا كيتسمى اتصال أحادي أي من طرف واحد. وكذلك مثال آخر بحال الكلافي ديال البيسي كتقدر تكتب وكيبان ليك داكشي لي كتكتب فالشاشة, لكن مايمكنش تكتب من الشاشة ويخرج لك داكشي فالكلافي.
الإتصال الثنائي بالدور: Half Duplex
فهاد الحالة غايكون الإتصال بين الحاسوبين مختلف على الأول, بجوج غايقدرو يتجاوبو لكن حتى يصيفط الـ PC1 داكشي لي باغي عاد غايصيفط الـ PC2 داكشي لي باغي تا هو. مثال واقعي على هاد النوع من الإتصال, التولكي وولكي لي كيكون عند البوليس, فهاد الراديو كيخدم بهاد النوع من الإتصال, فمايمكنش لجوج بوليسيين يهضرو فنفس الوقت, حيت تا واحد ماغايسمع الاخر اش قال. لذلك كتلقى الأول هضر وقال فالأخير كلمة "حول" أي أنه كيقصد بلي ساليت الهضرة قول أش عندك.
الإتصال الثنائي في آن واحد: Full Duplex
فهاد الحالة الحاسوبين غايقدرو يهضرو بجوج دقة وحدة, يعني الـ PC1 غايصيفط شي معلومة, يقدر الـ PC2 حتى هو يصيفط المعلومة فنفس الوقت ماغايكون تا مشكل, مثال واقعي كنستخدمو فيه هاد التقنية, الهواتف النقالة لي كنهضرو فيها خدامة بهاد النوع من الاتصال, بحيث أنك ملي كتكون كتهضر فالطيلي كتقدر تهضر نتا والشخص الاخر دقة وحدة بدون أي مشكل.
من بعد ما تعرفنا على أنواع الإتصال لي كاينين, غانشوفو كيفاش كيتم الإنتقال ديال هاد البيانات لي هي عبارة عن Bits ونبداو مع شنو هما أنواع السينيال لي كاينين !
عندنا ثلاثة الأنواع ديال الإشارات المختصة فنقل البينات, فضلت نحطهم ليكم على شكل صورة مختصرة توضح شكلهم وأسماءهم باش تكون الرؤية واضحة أفضل:
عن طريق هاد الإشارات كيتنقلو البنيانات, وكيكون النقل عن طريق واحد الوضع متزامن synchronous mode , كيحددوه الأجهزة لي غاتبادل نقل المعلومات مثلا إلى تافقو على ثانية وحدة, فكيتم إرسال Bit فكل ثانية. وكاين أيضا الوضع الغير متزامن Asynchronous mode , وهنا الاجهزة ما كتافقش على وقت معين. فكيتم تحديد الوقت عن طريق إرسال الـ Bit الاول والـ Bit الاخير. وهاكا كيتحدد الوقت Par defaut بيناتهم.
فهاد العمليات ديال النقل نيت, كاينين بزاف ديال الميطود ديال الـ Codage كيتم إستعمالهم, حتى هما غادي نحطهم على شكل صورة كتوضح كل نوع أشمن ميطود كيستعمل.
دبا الإشكال الكبير لي واجه هاد التقنية ديال نقل المعلومات بما فيها من عمليات. هو انقطاع هاد الإشارات, ملي كيكونو غاديين منتقلين من بلاصة لبلاصة أخرى, كيفاش؟
دبا ملي غانكون كندوي أنا وياك مع بعضياتنا فالواقع, غاتكون كتسمعني عادي, لأن الصوت الصادر من عند الإنسان التردد ديالو كيكون بين 20 هرتز و 20000 هرتز, لكن لنفترض أنني بديت كنبعد عليك كل شويا وكنزيد نبعد شويا بشويا. غاتولي تسمع الصوت ديالي غير بشويا من بعد اتولي تسمعو بصعوبة. من بعد ماغانبعد بزاف, ماغاتقدرش تسمعني, ﻷن الصوت ديالي غايفقد التردد ديالو باش جاي لعندك وماغايوصلكش.
راه نفس المبدأ حتى مع الإتصالات الشبكية, مثلا ملي غانكون كنهضر معاك أبيل فالطيليفون, علاش كيوصلك الصوت هو هذاك بحال الى راني معاك, وبنفس الجودة وبنفس التردد لي كنهضر بيه, يعني إلى كنت كنهضر غير بشويا غاتحس بيا بلي كنهضر غير بشويا, والى غوت بأقصى جهد غاتحس بيا بلي غوت بزااف. والسؤال المطروح دبا هو كيفــــاش هاد الصوت كينتقل بهاد التفاصيل كــاملة, من الرباط حتى لاوطاط الحاج ! (مسافة 400 كلم تقريبا) .
هنا جات تقنية التضمين أو التعديل أو بالفرنسية الــ Modulation, هاد التقنية بفضلها باش كيوصل الصوت أو الفيديو أو الصور أو أي حاجة كيتم إرسالها, لأنه فالأخير هادشي كـامل عبارة عن سينيال كيف قلنا فالأول. الطريقة باش كيخدم هاد التضمين, فالاول كيكون عندنا السينيال عادي ديال داكشي لي باغيين نصيفطو, وغاناخذو مثال بشي أوديو مثلا, ولنفترض أن التردد ديالو على هاد الشكل:
دبا نورمالمون إلى صيفطت هاد الأوديو بهاد الشكل ماغايوصلش لداك الشخص لأن غايفقد التردد ديالو مع طول المسافة لأنه تردد ضعيــف, فهنا كيخدم التضمين, بحيث أنه كيتم إنشاء ما يسمى بالـ Onde Porteuse لي كيكون التردد ديالو قوي وكبير, ونمثلوه بهاد الشكل مثلا:
وكيتم إنشاء تردد آخر لي خاصو يكون كامل فوق الصفر ومايكونش فيه شي قيمة تحت الصفر, لانه الطرف الآخر فعملية الـ Demodulation كيمسح ديك القيمة لي كتكون تحت الصفر, وكيخلي غا القيمة الموجبة, وباش تفهم أكثر غانعطيك حتى الشكل ديال هاد التردد :
فدبا كتجي المرحلة الأخيرة لي كيتم فيها دمج هاد الترددين معا, التردد ديال الـ Onde Porteuse و (التردد ديال الصوت الأصلي لي عندنا + التردد لي زدنا فالأخير ) , كيفاش كيتم الدمج ديالهم عن طريق واحد السيركوي أنطيكري, كيكونو فيه جوج ديال المداخل وكيكون فيه مخرج واحد:
من بعد ما كيتجمعو هاد لي سينيال, كيوليو على شكل سينيال واحد:
وهاكذا كيتم إرسال هاد الأوديو أو هاد المعلومة للطرف الآخر بواحد التردد لي طالع, ولي كيكون وسط منو التردد الضغيف ديالنا, وحتى إلى وقع شي تشويش فالتردد كيتقاس غير التردد لي حنى مغلفين فيه التردد الأصلي, وملي كيوصل عند الطرف الآخر كيدير ليه الـ Demodulation وهاكا كيقرا الأوديو أو المعلومة كما هي تماما.
بقات لينا نقطة أخيرة ولي متعلقة بالـتصادم أو الـ Collision , فمثلا داخل الشبكة الـ PC1 صيفط شي معلومة, والـ PC2 تا هو صيفط شي معلومة, ووقع شي تصادم فغايوصلو المعلومات مخربقين, هنا شي جهاز كيكتشف الخطأ وكيرد عليه بلي راه كاين شي مشكل, وكيعاودو يتافقو على شي مدة معينة لي غايصيفطو فيها وكتعاود هاد العملية, وباش نتفاداو هاد المشكلة كنعتامدو على واحد التقنيتين لي كيتسماو الـ CMSA/CD و الـ CMSA/CA لي ماغانشرحهمش فهاد المقال , غانشرحهم فالمقال الجاي لي غايكون على الطبقة الثانية لي هي طبقة الـ Liaison de donnee
وأخيرا غانشوفو أنواع الكابلات المستخدمة فنقل هاد البيانات, كنلقاو الكابل Cuivre لي كينقسم لجوج أنواع,
Droit : ولي هو الكابل لي كيتم استعمالو فربط الأجهزة المختلفة. مثلا سويتش مع بيسي, روتور مع بيسي, روتور مع سويتش, وكيكون عندو الراس ديال الــ Rj45
Croise : هو الكابل لي كيتم إستعمالو مع جوج ديال الأجهزة بحال بحال, مثل بيسي مع بيسي, وهو نوع الكابل لي درت باش نربط هاذوك لي بيسي لي عطينا بيهم المثال فالأول, لأنه كن درت الكابل Droit ماغاديش يتأكتيفياو لي زانطيرفاص ديالهم,
طريقة التركيب ديال هاد النوعين تختلف طبعا, كل واحد عندو سيري خاصة بيه, بالنسبة للكابل Droit كيخدم بالسيري B والكابل Croise كيخدم بالسيري A
هاد الصورة كتبين الترتيب ديال لي بران (دوك الخيوط ديال الكابل) كيفاش كيركبو فالكونيكطور Rj45
هذا هو الكابل ريزو ولي بران لي وسط منهم, وكيتسماو أيضا بالـ Paire حيت كل لون عندو أب وهاد الألوان كيتحطو بالترتيب على حسب السيري المطلوبة.
السيري A أو الكابل Droit كيتم التركيب ديالها بالطريقة لي شفنا الفوق فالصورة, وإلى مافهمتيش أنا غانشرح ليك هنا بشويا, فهاد الترتيب كناخذ الـ Plug أو داك الكونيكطور Rj45 هاذي كلها مصطلحات كتقال ليه, كنحاول نعطيك جميع المصطلحات باش ماتلفش الى سمعتي شي حد كيقول شي مصطلح, مهم كتاخذ هاد الكونيكطور وكتوجه الجهة لي فيها الاسنان ديال النحاس يوليو يشوفو لجهتك نتا, وكتحط لي بران بهاد الترتيب بالضبط, كيف ما كيبان فهاد الصورة:
هاد العملية غاديرها فالجهة الأولى من الكابل وأيضا نفس الشيء فالجهة اﻷخرى ديال الكابل, وهاكا غاتكون صاوبتي كابل Droit
أما السيري A او الكابل Croise فله ترتيب آخر, جهة كيكون فيها نفس الترتيب ديال السيري B لكن الجهة الأخرى غاتكون مختلفة عنها, بحيث غايكون الترتيب كالتالي:
إلى لاحظتي غايبان ليك بلي اللون الأخضر هو والكومان ديالو بدلو البلاصة مع البرتقالي والكومان ديالو. المسألة بسيطة.
وكنلاقاو أيضا من بين أنواع الكابلات المستعملة فنقل البيانات الكابل Coixial هاد الكابل هو لي كيخدم فالـ Satellite لي كتركبو فديوركم (البارابول), أو لي كيخدمو بيه الكاميرات Analogique هاذي صورة له:
وكاين أيضا الفايبر أوبتيك لي كتعتابر أكثر سيبورط كينقل البيانات بسرعة, لأنه كيخدم بسرعة الضوء, بسينيال ضوئي.
غانختم هاد المقال بمقارنة بين الفايبر أوبتيك والـ Cuivre من ناحية سرعة نقل البينات وأيضا المسافة.
نتمنى المقال ينال إعجابك, وتكون استفدتي منو.
شكرا على القراءة.
