كاملين كنكرهو المتصفح ديال ميكروسوفت لي كان سميتو أنترنت اكسبلورر. ملي كنفورماطيو البيسي كنلقاوه هو الوحيد لي كندخلو منو باش نطيليشارجيو المتصفحات الاخرى. وما كنطيليشارجيو داكشي لي بغينا حتى كيشحفنا. متصفح جد سيء ولا علاقــة. بقات ميكروسوفت على هاد الحال لمدة من الزمن حتى لمؤخرا عاد حاولات تنفض شويا دالغبار عليها وتطور داك المتصفح الغبي ورجعاتو سميتو إيدج ولي ولا شويا مقارنة مع سابقه. لكن رغم ذلك ميكروسوفت ماقدراتش دير متصفح ينافس أشهر المتصفحات حاليا مثل كرووم وفايرفوكس وبريف. علاش ؟ كاينين أسباب من بينهم:
- تطوير متصفح من الصفر أمر معقد ومكلف, وهاد المشروع كان بمتابة خسارة لميكروسوفت في القدم. حيت كان مزال ما بانش البلان ديال الربح من الإعلانات لي كتخاذ من عند المستخدمين وتباع للمعلنين باش يتم عرضها على هاد المتصفحات من بعد.
- باش تواكب التطور السريع ديال التكنولوجيا خصوصا فمجال الانترنت خاصك ديما تكون أجور وديما على القرص وهادشي حتى هو مكلف, وميكروسوفت ما قدراتش تواكب التطور حيت عندها بزاف دالمشاريع أخرى.
- كيقولو أنها كانت حرب باردة بين ميكروسوفت وكوكل, الشيء لي كان كيخلي كوكل ديما تبقى دير ميزاجورات للخدمات ديالها وميكروسوفت ما كانتش كتقدر تواكبها ودير ميزاجورات للمتصفح ديالها, الشيء لي خلا المتصفح يكون جد بطيئ فالتصفح خصوصا مع خدمات كوكل.
ملي ميكروسوفت شافت هادشي كامل ما مخرجهاش قررات دير خطوة جيدة.
إذا لم تستطع القضاء على عدوك، تعايش و تشارك و إنضم له. هاذي هي الخطة الإستراتيجية لي مشات عليها ميكروسوت. خذات متصفح كروميوم لي كتبنيه كوكل نيت وبعض المبرمجين الآخرين حيت هو متصفح مفتوح المصدر. وبنات عليه متصفح إيدج لي كاين دبا فالوينداوز 10. هاكا قدرات دير واحد القفزة للأمام حيت فهاد الحالة كوكل ماتقدرش دير شي مشكل فالكروميوم حيت ماغايكونش فصالحها حتى هي. بهذا غايوليو المستخدمين يخدمو بإيدج نيشان ملي يأنصطايو الوينداوز دون الحاجة لتثبيت كرووم.
ندوزو للسؤال الثاني, شنو هو المتصفح الآمن ؟
أنا شخصيا لا أنصحك باستخدام كرووم أو إيدج أو أوبيرا ولا حتى سفاري وماكثون. لأنها متصفحات كتنتاهك الخصوصية ديال المستخدم بواحد الشكل كبير بزاف.
استخدم متصفح بريف، أو فايرفوكس، او فيفالدي، أو إيريديوم، الخ.. (كلها مفتوحة المصدر) و التي ايضا تسرق معلوماتك لكن ماشي بديك الدرجة ديال لاخرين. على الأقل غاتكون خففتي على راسك شويا. وحاول ما تبقاش تسجل كلمات المرور الحساسة بحال ديال البنوك أو حسابات مهمة بالنسبة ليك. وأيضا ما تستخدمش دوك الإضافات على المتصفحات, حيت حتى هي كتسرق معلوماتك.
كن حذرا خلال تصفحك.
