بعض الشركات الكبيرة كتدير شي ميزاجور جديد وكتطلقو غير لشي ناس محدودين ماكتطلقوش لكولشي.. ودوك الناس كاين فيهم لي كيقول انا متميز لأن الشركة طلقات ليا الميزاجور انا الاول. هاد الميزاجورات كتسمى ب:
Canary Deployment
تسماو هاكا حيت عمال المناجم فالقديم كانو كيطلقو الكناري فالمناجم باش يعرفو واش كاينين غازات سامة. الى مات الكناري راه ماكيدخلوش، إلى بقى حي كيزيدو يحفرو.
كنظن فهمتي الفكرة !
ديما بعد من البرامج لي كيكون فيهم نسخة الكناري لأن بها مخاطر كبيرة، لأنها كتكون نسخة أولى تجريبية، من طرف المطورين ديال داك البرنامج وكيكونو فيه خاصيات وميزات مامجربينهاش وإلى خدمتي هاد البرنامج فالجهاز ديالك غايكون معرض للخطر.
كتجي من موراه نسخة Dev لي كتكون تجربات فيها بعض الميزات من طرف المطورين ديال داك البرنامج.. وأيضا كتعرض حتى للمطورين الاخرين الى بغاو يجربوه. لكن حتى هاد النسخة لا ينصح باستخدامها.
كتجي من موراها نسخة البيتا "Beta"
لي كتكون أقل خطورة من سابقاتها.. وخا ماكتكونش مزيانة 100% لكن تقدر تستعملها إلى كنتي باغي تكون من الأولين لي غايستخدمو البرنامج وتعرف على ميزاته الجديدة.
من بعد كتجي نسخة ال RC لي كيكون من المفترض فيها البرنامج يكون كمل، لكنه مزال ما ولاش Stable
عاد من بعد كتجي Stable لي هي النسخة الآمنة. وهاذي هي النسخة لي تقدر تخدم بها ونتا مرتاح حيت كتكون كاملة مكمولة.
ديما ملي تبغي طيليشارجي شي برنامج حاول تاخذ النسخة لي سطابل.
