فهاد سطاتي غانهضروا على les ports USB بالعربية منافذ الـ USB بالدارجة هما هاذوك البلايص لي كيكونوا فالبيسي وكتخشي فيهم الكابل دياال الكلافي ولا لاصوري ولا شي كلي USB.. ربما غاتقول مع راسك وايلي علاه اش غايكون فيهم تاغاندويو عليهم.. ياك گاع البيسيات فيهم نفس لي بورط بنفس العبار وكذا..
وي فعلا فيهم نفس العبار وهادشي علاش سماوهم USB وهاد الكلمة هي إختصار لـUniversal Serial Bus وكتعني الناقل التسلسلي العام.. يعني فالعالم كامل فين ما مشيتي غادي تلقى نفس البورط بنفس الحجم والقياس.. غير هو الاختلاف يكمن في قوة كل نوع من هاد لي بورط.. رغم أنهم كلهم بحال بحال إلا أنهم كيختالفوا فالفولطاج وسرعة نقل البيانات..
باش مانطول بزاف ونعطي شرح مختصر غادي ندخل فصلب الموضوع..
ملي تبغي تشري شي بيسي جديد.. غادي تقرى فالمواصفات ديالو (البروسيسور والرام والكرافيك وما الى لك) غادي تلقى مكتوبة USB 2.0 ولا USB 3.0 تقدر ماتفهم تا لعبة.. وطبعا نتا غاتختار لي فيه 3.0 غا حيت غاتبان ليك هي الاكبر وغاتقول مع راسك هي الاحسن..
اجي تفهم شنو كيعنيو هاد الأرقام.. قبل 2 و 3 كان 1 طبعا.. ولي هو البداية ومزال غادي يستمر التطور من هنا لقدام..
ملي اول مرة خرجوا لي بورط USB
كانت USB 1.0 وكانت سرعة نقل البيانات فهاد البورط كتوصل لـ 12 ميگا فالثانية.. كانت آنذاك سرعة خيالية.. وجات من موراها فيرزيون اخرى ولي هي USB 1.1 لي ولا هو المعتمد وكانت نسبة الفولطاج فيه هي 2.5 فولت و 500 mA سنة 1998
من بعد تطورات وولات USB 2.0 وكتوصل السرعة ديالها لـ 480 ميكا فالثانية والفولطاج 2.5 فولت و 1.8A سنة 2000
موراها بثمنية السنوات جات USB 3.0 ولي كتوصل سرعة نقل البيانات فيها 5 جيكا فالثانية.. والفولطاج 5 فولت 1.8A سنة 2008
وجات اخرها USB 3.1 بسرعة نقل بيانات 10 جيكا فالثانية.. والفولطاج 20 فولت و 5A سنة 2015
.
تقدر تتسائل كيفاش هاد نقل البيانات والفولطاج !
غانقولك بلي نقل البيانات هما مثلا ملي كتربط الطيلي ديالك مع البيسي كتبدا تلوح فيه الضواسا كتختالف سرعة نقل البيانات الى كان البيسي فيه لي بورط ديال 3.0 غايتلاح داكشي بزربا.. الى كان 2.0 غايتعطل داكشي.. ولا كتبغي تشارجي الطيلي من البيسي.. الى كان 3.0 راه غايتشارجا بزربا والى كان 2.0 راه غايتعطل..
وغانتكلموا أيضا على الانوع ديال لي كابل لي كاينين.. باش تعرفهم وتفهم اكثر.. كاين ثلاثة ديال الأنواع:
USB type-A :
وهاد النوع من لي كابل هو ديال لاصوري والكلافي مانيطة ديال اللعب.. ومثل هذه الاشياء.. يعني تايكون عندها غا جهة وحدة فقط.. تقدر تقول ليا كيفاش نعرف واش كدعم USB 2.0 ولا USB 3.0 .. ببساطة الى شفتي فالداخل ديال الكابل وبان ليك زرق عرفوا كيدعم 3.0 الى كان ابيض راه كيدعم غا 2.0
USB type-B :
هاد النوع من لي كابل هو ديال ليزامبريمون والاوطيجي والسكانير وزيد وزيد.. يعني أي حاجة كتربطها بالبيسي مع شي حاجة اخرى.. الكابل كيكونو فيه جوج ديال الريوس.. وبالنسبة للأجهزة كيتسمى Mini type-B وكاين أيضا فهاد النوع الكابل لي كنشارجيو بيه الطيليفونات.. وكيتسمى Micro type-B .
USB type-C :
هاد النوع هو اخر ماوصلات ليه التكنولوجيا.. هاد البورط سهل الخدمة بزاف.. مثلا فالبورطات القدام مثلا لابغيتي تبرونشي فيه شي حاجة خاصك تبقى تخشي وتقلب وتعاود تخشي تا كتبقى منوي وتبقى طل على البورط عاد فالمحاولة الثالثة ولا الرابعة كتقدر تبرونشي داكشي ديالك.. هاد التقنية الجديدة لي خرجاتها شركة Intel ومن لا يعرفها.. ولي كتمكن تخشي الكابل أو الكلي بأي طريقة بغيتي يعني وخا يكون مقلوب كيتخشى بكل سهولة.. بالإضافة للاستمتاع بالسرعة ديال نقل البيانات والشحن.. كيف ذكرنا الفوق.
وهذا ما كان نتمنى تكونوا ستافدتو