فهاد الموضوع غاندويو على واحد الموقع مهم جدا..
لينكد إن LinkedIn
هاد الموقع لي كاين منكم لي كيعرفو وكاين لي ماعمرو سمع بيه وكاين لي كيسمع بيه وماعارفوش لاش صالح..
ناخذو واحد النبذة مختصرة على هاد الموقع.. هو موقع شبيه بالفايسبوك تقريبا من ناحية الديزاين ديالو.. غا هو موقع للتواصل المهني.. ماشي كنشرو فيه تصاورنا والضحك واللعب.. كنشرو فيه كل ما له علاقة بالعمل.. هاد الموقع تم إنشاءه سنة 2003 من طرف شي وحدين كانو خدامين مع بايبال.. من بعد شراتو ميكروسوفت ف 2016 ب 26 مليار دولار !!
طبعا من الوهلة الأولى لي غاتشوف فيها هاد الثمن الخيالي غاتقول أنه موقع مهم هذا.. حاليا عندو قاعدة مستخدمين قرابة 500 مليون مستخدم.. فكل ثانية كيتسجلوا عضوان جديدان.. و 25 مليون صفحة ديال الاشخاص كتم مشاهدتها يوميا..
و41% من المليونيرات ديال العالم كيستخدموا هاد الشبكة.. وفيه الرجال اكثر من النساء..
من خلال هاد النبذة كيبان لينا أن هاد الموقع راه محرك وسط هاد المجموعة من مواقع التواصل الاجتماعي المشهورة.. وأنه حتى هو عندو مكانتوا الخاصة..
السؤال هو فاش يقدر ينفعني هاد لينكد ان؟
اذا كنتي حاصل على ديبلوم أو مهني سابق أو حتى طالب يمكن لك تدخل لهاد الموقع.. وتنشأ الحساب الخاص بك.. وتدير فيه شنو قريتي وفاش قريتي ولا فاش خدام ولا شنو كتعرف دير.. أي حاجة عندها علاقة بالعمل.. صفحتك الشخصية هي السيفي ديالك..
فالواقع كنصاوبو سيفي وكنبقاو نديبلاصاو للشركات وندفعوا ليهم.. فلينكد ان لا.. السيفي ديالنا هو حسابنا.. كنديرو فيه كولشي لي درنا ولي كنعرفوا نديروا والناس كيدخلوا يشوفوا السيفي ديالنا.. ولا كان شي واحد مهتم بداكشي لي كنديرو راه كيقتارح عليك شي خدمة..
وتقدر أيضا تقلب على أشخاص مهتمين بنفس المجال لي كتهتم به أنت.. وتواصل معاهم وتعلم منهم..
من المميزات لي فيه أنه كيقولك شكون الاشخاص لي زارو البروفايل ديالك.. وكيقتارح عليك عروض عمل قريبة من الميول ديالك على حسب المعلومات لي داير فبروفايلك..
وفيه مكان لنشر تدوينة أو صورة أو فيديو غا هو خاصك تلوح شي حاجة داخلة دائما في نطاق العمل او الموتيفاسيون شي حاجة بعقلها وعندها معنى.. باش ما طيحش من قيمتك وصورتك..
كيف قلنا بروفايلك هو وجهك.. لذلك خاصك تقادو مزيان.. صورة شخصية تكون محترمة ماشي لابس فيها شورط وكتبحر.. ومعلومات شخصية حقيقية وماتبالغش.. دير غا داكشي لي كتعرف ولي دزتي منو.. دير الاهتمامات ديالك شنو كتعرف دير شنو عزيز عليك دير..
ودير نبذة مختصرة عليك تقدر تدخل لبروفايلات أشخاص وشوف الطريقة لي كاتبين بها وخوذها منهم وبدل المعلومات الشخصية.. وهاكا غاتكون درتي بروفايل بروفيسيونيل وفينما دير شي حاجة جديدة زيدها فيه.
لينكد ان فيه نسخة بريميوم ولكن الاغلبية كيخدمو غا بالمجانية.. ماكاينش شي فرق كبير غير لاخرى زايدة عليها فشي أوبسيون وكتعاونك أكثر.. ولكن لي باك فيها غاليين بزاف.. لذلك اكتفي غير بالمجانية بحالك بحال الأغلبية.
ودير نبذة مختصرة عليك تقدر تدخل لبروفايلات أشخاص وشوف الطريقة لي كاتبين بها وخوذها منهم وبدل المعلومات الشخصية.. وهاكا غاتكون درتي بروفايل بروفيسيونيل وفينما دير شي حاجة جديدة زيدها فيه.
لينكد ان فيه نسخة بريميوم ولكن الاغلبية كيخدمو غا بالمجانية.. ماكاينش شي فرق كبير غير لاخرى زايدة عليها فشي أوبسيون وكتعاونك أكثر.. ولكن لي باك فيها غاليين بزاف.. لذلك اكتفي غير بالمجانية بحالك بحال الأغلبية.