كاين منكم لي كيعرف هاد جوج.. وكاين لي أول مرة غايشوفهم.. وطبعا حنى هنا كنشرحو من الصفر باش لي مافاهمش يفهم ويعرف.. قبل مانبدا الشرح بغيت نقول شي هضرة مهمة.. تقدر تديها وتخليها معاك ولا دخلها من ودن وخرجها من ودن أخرى.. ولا تقدر تنقز هاد الباراكراف وتدوز للشرح نيشان لمهم مانطولش..
خاصك تعرف بلي حنى فعصر الرقمنة.. بمعنى أن جميع المؤسسات وجميع الشركات وأيتها حاجة ولات وغاتولي تخدم غا بالمجال الرقمي.. يعني ماغايبقاااوش الوراق من هنا لواحد عشر سنين ولا خمسطاش العام.. كوولشي غايولي خدام بالانترنت والبيسيات والسوشل ميديا وما الى ذلك..
حنى فالمغرب "ولحسن حظنا" وسطر ليا مزيان على هاد لحسن حظنا.. جينا فالوقت لي يالاه بادية فيه هاد الرقمنة.. يعني هاذي فرصتنا باش نندامجو مع هاد العالم ونضربو يدينا ونديرو بلاصتنا.. نعطيك مثال بسيط باش تفهم.. علاش دبا فهاد الفايسبوك نيت كتلقى شي وحدين مضاربين على فايسبوكات قديمة مصاوبة ف 2010 مثلا.. ولي عندو داك الفايسبوك راه ناضي. حيت هذاك الفايس زايد نغزة على هاد الجداد.. حيت ماكيطيحش وخا تسينياليه.. لأنه موثوق من عند فايسبوك وكيثيقو فيه.. وسطاتيات لي فيه كيطلعو للأغلبية مقارنة مع الفايسبوكات جداد.. وملي كدير منو شي انونص كيتقبل بزربا وبزاف دالمزايا.. الأمر كامل راجع لأنه قديم وتصاوب فبدايات الفايسبوك.. الفكرة ببساطة ملي كتدخل نتا الاول لشي حاجة يالاه بانت.. مع المدة كتولي عندك مكانة خاصة فيها وشحال ما طوالت ديك المكانة شحال ما كتكبر قيمتك اكثر.. داكشس علاش انا كنقولكم خاصكم تستغلو الفرص..
مثال اخر نيت بزااف دالمواقع كانو كيقدمو خدمات واعرين ومجانا.. حيت كيكونو يالاه باديين وملي كيتشهرو كيحولو الخدمات ديالهم للفلوس.. وكيبقاو الناس لي مسجلين الاولين هما لي كيستافدو مجانا ولا كيصعاب التسجيل فداك الموقع ولا كيدار شي ميزاجور كيخربق الموقع لمهم بزاف دالبلانات.. يعني فين ما تلقى شي موقع كيقدم شي خدمة زوينة وخا ماكتهمكش غير تقيد فيها بجيمايل ديالك ونساها.. حيت من بعد غاتحتاجها وغاتلقى راسك ديجا عندك فيها كومط.
لمهم طولت بزاف ولكن غير بغيت نبين هادشي.. ماتخليوش الفرصة تفوتكم وتبقاو تندمو من بعد.. كنقول هادشي عن تجربة.. حيت ف 2011 كنت كنشوف عملة البيتكوين كتربح فبعض الألعاب اونلاين وماكنتش كنتسوق ليها.. ودبا ملي ولات قيمتها كبيرة عرفت بحقها وندمت حيت ماضيعتش من وقتي 5 دقايق وربحت بيتكوين واحد.
.
نبداو فموضوعنا.. الووردبريس وبلوجر.. هما منصات للتدوين.. يعني فبلاصة ماتصاوب موقع ديالك بوحدك بلغات البرمجة :
Html css javascript bootstrap php mysql ...
هاذو كاملين غايخصك تعلمهم باش تصاوب موقعك.. كيجيو بلوجر ووردبريس كيسهلو عليك الأمر.. يكفي تجيب الضومين ديالك وتحطو عندهم وهانتا عندك موقع..
بلوجر: تابعة لشركة كوكل وهذا هو الجميل فالامر ولكن فنفس الوقت ما جميلش هههه.. جميل لأنه كيكون الموقع ديالك فالرعاية ديالهم ومحمي بالجهد مستحيل يوصل ليه شي واحد.. وما جميلش لأنك ماتقدرش تحكم فالخبايا ديالو..
زوين عوتاني حيت يكفي تدخل غير جيمايل ديالك غاتفتح بزربا مدونة فبلوجر وغاتبقى تدخل ليها انطلاقا من جيمايل ديالك.. وتحكم فيها بكل سهولة..
.
ووردبريس: هي منصة نقدرو نقولو عليها اوبن سورس.. كتحكم فيها من الجذر ديالها.. والموقع ديالك كتكون عندك جميع الصلاحيات باش تحكم فيه.. ولكن الخايب فالامر هو انه الى ماكنتيش مجهد فالسيكيريطي يقدرو يخوروك فالموقع ديالك بكل بساطة.
لأنك خاصك تحمي الموقع ديالك ماكاينة حتى جهة غاتحميك. كولشي بين يديك..
.
.
شكون زوين واش بلوجر ولا ووردبريس؟
كيف العادة القاعدة العامة كتقول أن كل حاجة عندها سلبيات وايجابيات..
ووردبريس زوين لأنك كتقدر تحكم فالموقع ديالك كيف ما بغيتي.. تزيد وتنقص لي بغيتي.. والأرشفة ديالو مجهدة مقارنة مع بلوجر.. يعني كيطلع فمحركات البحث اكثر من بلوجر..
السلبيات ديالو.. انه ما محميش يعني الحماية ديالو كترجع لك نتا.. الى كنتي مجهد راك غاتحميه الى كنتي ناقص راه يقدرو يزربو عليك.. وأن معظم الاضافات والقوالب ديالو مدفوعة يعني خاصك تخلص عليها وتشريها.
.
بلوجر زوين لأنه محمي من طرف كوكل.. سهل التحكم بالنسبة للكود ديال القوالب وما الى ذلك.. والاضافات والقوالب كتكون معظمها مجانية..
الخايب فبلوجر أنها ما كتطلعش فمحركات البحث إلا بعد خدمة طويلة ومزيانة.. يعني خاصك تعرف كيف تخدم فال Seo باش طلعها فمحركات البحث. وأنها ماعندهاش ضومين ثابت تلقائي خاصك حتى تقاد الباراميطر ديال الضومين باش يولي نيشان..
.
بالنسبة ليا انا. كنشوف أنه إلى بغيتي دير موقع بالعربية إستعمل بلوجر لأنه العرب محسادة والى شافوك غادي مزيان غايبغيو يطيحوك بأي طريقة.. وحتى القوالب العربية موجودة فبلوجر بزاف والمدونات العربية كتصدق فبلوجر مزيان..
الى كنتي غادير موقع أجنبي ديريو فالووردبريس.. حيت غايخصك تحكم فبزاف داللعيبات والووردبريس غايسهل عليك الخدمة.
