بروتوكول مشهور وكنستعملوه فحياتنا بزاف.. ولي هو بروتوكولDHCP إخصتارا لــ:
Dynamic Host Configuration Protocol
أي جهاز باش يتكونيكطا ضروري خاصو أدريس أيبي.. وهاد الادريس كتكون يا إما Statique يا إما Dynamic
Statique:
يعني غاندخلوا الأدريس بيدينا ونديرو لي بغينا.. وهاذي غالبا كنديروها فشي ريزو
لوكال.. يعني شي ريزو لي صغير وكنخدموا بيه غا حدانا.. بحال شي قاعة
مثلا..
هذا مثال من داخل إعدادات نظام لينكس UBUNTU
هنا مشيت للاعدادات ورجعتهم سطاتيك ودخلت لادريس لي بغيت طبعا أدريس بريفي لأنني خدام داخل ريزو لوكال. وعطيت الماسك ديال الكلاس C وعطيت الباسريل باش نقدر نخرج للأنترنت.
Dynamic:
ولي هنا فين كيحضر البروتوكول DHCP وكيدير خدمتوا.. كيبدا يفرق لي زادريس
أوتوماتيك بلاما تدخل نتا ودير شي حاجة.. وفطيليفوناتكم حاليا راه هاد
البرتوكول هو لي عاطيكم لادريس.. ولادريس لي كيعطيكم كتكون على حسب الدولة
لي نتا فيها.. كل دولة عندها لي زادريس لي كينتاميو ليها.. باش تفهموا
اكثر.. مثلا نتا دبا الى مشيتي لشي سيت كيوريك لادرس ديالك بحال السيت
ديال: What is My Address
غايقولك ها الايبي لي عندك دبا.. وها اشمن دولة نتا فيها.
وبعض الأحيان كيكونوا مواقع محجوبين مثلا فالمغرب.. وماكتقدرش تدخل ليهم..
حيت الموقع كيعرفك بلي عندك أيبي مغربي.. داكشي علاش الى بغيتي تكونيكطا
فالموقع خاصك VPN .
الطريقة كيفاش كيخدم الـ DHCPملي
يالاه كتشعل البيسي ديالك ولا الطيلي وكتكونيكطيه مع الانترنت.. كيكون ديك
الساعة ماعندوش IP.. كيصيفط هو واحد الروكيط ولا دوموند بهاد الأيبي 0.0.0.0 لهاد العنوان 255.255.255.255
هاد الروكيط كيكون فيها الإسم ديال الجهاز ولادريس ماك ديالو..
باش السيرفر DHCP يتعرف عليه.. ويرد ليه على الطلب ديالو.. وهاد الخطوة سميتها:
Descover (Ip Request)
ومن بعد كيرد عليه الـ DHCP وكيقتارح عليه أيبي والماسك ديالو.. وكتسمى هاد الخطوة:
Offer (Ip Offer)
من بعد كيرد عليه الجهاز تاني وكيقوليه صافي المعلم راه وصلاتني ديك الادريس
في أمان الله وحفظه.. وراني ختاريتها.. وكتسمى هاد الخطوة:
Request (Ip Selection)
كينوض الـ DHCP كيصيفط ليه واحد اللعيبة سميتها Ack وكيقوليه صافي اسيدي راني كونفيرميت ليك لادريس باش تخدم.. مبروك عليك..
ويقدر بعض المرات كيصيفط ليه unsuccessful ack وهاذي كتعني بلي ديك لادريس راها
ماخداماش ليك.. وتم عوتاني الجهاز كيعاود العملية من الاول حتى كيعطيه الـ DHCP الادريس باش يخدم..ونتا راك گاعما مسوق لآش طاري فالكواليس.. كتعرف غا تدخل تكونيكطا فالفايس والواتساب وتبدا تعنب.
لمهم ببساطة هذا هو الـ DHCP وحتى هو فيه ipv4 و ipv6 غير هو حنى فالمغرب مزال كنستعملوا الـ ipv4نتمنى تكونوا ستافدتوا.
ومن بعد غانهضرو على هادشي فالوينداوز سيرفر, وأيضا راني ديحا حطيت شرح على كيفاش نقدرو نديرو الكونفيكيراسيون فاللينكس.
موضوع يقدر يكون من بين الإهتمامات ديالك: