بزاف منا لي كيفقد البيانات ديالو سواء بالخطأ أو عن قصد بعدما كيفورماطي الهاتف او الحاسوب أو الفلاشة USB وكيتفكر أنه عندو شي معلومات لي باغيها. فكيفكر كيفاش يرجع هاد المعلومات لي ضاعو منو.
فهاد المقال غانتعرفو على كيفاش كيتم مسح البيانات و واش يمكن لينا نرجعهم وكيفاش؟
قبل مانهضرو على واش يمكن ليك ترجعهم وكيفاش ترجعهم، خاصنا نفهمو آلية العمل ديال هاد البرامج لي كترجع لينا البيانات لي تمسحو.. ونفهمو أيضا كيفاش كيتم تخزين هاد البيانات وكيفاش كيتم الحذف ديالها..
بلاما نطولو وندخلو نيشان فالموضوع.. وغا ناخذو القرص الصلب Hard Disk بالإنجليزية أو Disque Dur بالفرنسية.. ونشوفو كيفاش كتم العملية فيه.
هاد ديسك دير الى حليناه غانلقاوه على شكل الجهاز دالموسيقى القديم الفونوغراف
هذا هو الفونوغراف
فالديسك دير نفس الفكرة غا هي مصغرة.. تا هو فيه واحد ديسك وإبرة ودينامو صغير.. بالإضافة لقطع إلكترونية صغيرة.. هذاك الديسك كيقرا لينا الشحنات الكهروميغناطيسية لي هي 1 و 0 صافي هذا هو الدور ديال ديك الإبرة وداك الديسك لي كيدور عليها.. ومن بعد هاذوك الشحنات الكهروميغناطيسية كتشدهم ديك القطع الإلكترونية وكيحولوهم لبيانات. لمهم هاد العملية معقدة وهاذي غا نظرة من بعيد على كيفاش كيخدم وماغانتعمقوش فيها.. وقلت هادشي غا باش يدير لينا الطريق للموضوع ديالنا حيت ماعرفتش منين نبداه. عموما هاد الديسك دير الدور ديالو هو يقرا ويكتب وهاذي هي الطريقة باش يكتب ويقرا.
فمرحلة الكتابة: كيجي الأمر من البروسيسور للديسك دير باش يخزن شي معلومة عندو.. وهادشي هو لي كيعني الكتابة يعني غايبدا يكتب عندو باش يخبي لينا دوك المعلومات.. دبا هنا كيفاش كتم العملية ديال هاد الكتابة.. بعدما دوك الدوائر الإلكترونية كيترجمو البيانات لشحنات كهروميغناطيسية.. الديسك دير فيه بحالا تقول مكتبة كبييييرة فيها بزااف ديال الرفوف.. هاذوك الرفوف كيتسماو Clusters كيبدا يقلب على شي Cluster خاوي باش يكتب فيه دوك البيانات على شكل شحن كهروميغناطيسية.. وهاكا كتم العملية.
فعملية القراءة: نفس الشيء تاني غا هو بالعكس.. كيتعطى الأمر من البروسيسور كيمشي ديسك دير يوجه ديك الإبرة لداك ال Cluster لي طلب منو البروسيسور يعطيه.. كيهزو على شكل شحنات كهروميغناطيسية وكيعطيه للدوائر الإلكترونية باش تحولو للبيانات وكيتصيفطو للبروسيسور..
وكاينة العملية الثالثة لي هي الحذف. ولي هي موضوعنا، دبا الى فهمتي هادشي لي ذكرنا الفوق وفكرتي منطقيا غايبان ليك أنه ملي كيصدر الأمر من البروسيسور باش يتم حذف هاد البيانات.. منطقيا خاص الديسك دير يمسح دوك الشحنات الكهروميغناطيسية.. لكن هنا فين كاين البلان ناضو المصممين ديال هاد ديسك دير لقاو أن هاد العملية ديال توجيه الإبرة نحو الـ Clusters لي فيهم البيانات وحذف دوك الشحنات لي فيهم كيهلك الديسك دير من ناحية البنية الفزيائية ديالو. وكيخلي عملية الحذف تاخذ وقت كبير الشيء لي غايخلي الجهاز يولي تقيل كذلك.. قالك اسيدي ماغانديروش هادشي.. ولا ملي كيتعطى الأمر ديال الحذف.. الديسك دير كيدير واحد العلامة على داك الملف بأنه صافي تمسح من عندو.. وكتبقى ديك الـ Cluster هاكاك، ولكن كيكون قادر يكتب فيها مرة أخرى.. ومن هنا خرجات الفكرة ديال البرامج لي كترجع لينا البيانات المحذوفة.. لكن إلى عوتاني فكرنا منطقيا فغايبان لينا أنه كاين واحد المشكل تاني.. كيفاش غايقدرو يرجعو لينا دوك البيانات وهو تكتب من فوق منهم شي بيانات أخرى ؟
هذا هو البلان مايمكنش يرجعو..
باش ما دوخش وما تدهشش.. غاتشوف فالصورتين
غاناخذو هاد الورقة على أنها شي Cluster من الديسك دير ديالنا.. حنى حاطين فيه هادوك المعلومات لي مكتوبين تم. جينا ومسحنا المعلومة ديال: الفرنسية والعربية, كيفما كتشوفو فالصورة الأولى:
إلى لاحظتو راه مزال كيبان الآثار
ديالهم.. تنادم معانا الحال وجبنا شي برنامج يرجعهم لينا.. البرنامج غايدخل
غايلقى دوك الآثار فغايتعرف عليهم وغايرجعهم لينا.
لنفترض أننا مسحناهم وكملنا الخدمة ديالنا تا دازت سيمانة عاد تنادم معانا الحال وبغينا نرجعوهم.. الديسك دير ديجا قلنا ليه خبي لينا المعلومة ديال: الإنجليزية والروسية.. ناض هو حطها فداك الـ Cluster لي ديجا أمرناه باش يمسحو.. جبنا البرنامج يرجع لينا المعلومات، البرنامج غايدخل غايلقى معلومة أخرى فداك الـ Cluster، يعني ماغايقدرش يرجع لينا المعلومة لي مسحنا. الصورة الثانية:
صااافي هاكا كتم الخدمة ديال هاد التطبيقات.. هما فقط كيمشيو غير لدوك الـ Clusters لي خاويين وكيقلبو واش كانت فيهم شي حاجة قبل. الى كانت راه كيرجعوها، كان الـ Cluster خاوي مافيه والو راه ماكيلقاو فيه والو.. أما لي عامرين راه ماكيوصلش ليهم. حيت الخدمة ديالهم هي كيقلبو على لي خاويين فقط.
يعني شنو غاتستنتج من هادشي كامل؟ هو أنك لا مسحتي شي حاجة وبغيتي تردها ماخاصكش تخدم بالجهاز ديالك من بعد ماتمسح داكشي.. حيت بمجرد ما كتمسح وتعاود تخدم راه كيتقيدو معلومات أخرى فوق دوك البلايص لي مسحتي.
وغانستنتجو عوتاني أنه ماكاينش شي حاجة سميتها الحذف.. كاين غير الكتابة فوق البيانات القديمة..
وكاينة إمكانية باش يرجعو البيانات حتى وإذا تكتبو فوق منهم بيانات أخرى.. ولكن هاد الإمكانيات كاينين غير عند الأجهزة الحكومية. حيت عندهم برامج خاصة بهم فقط.. مصنوعة ليهم هما وماشي للعامة. وكيتشراو بثمن غالي وكيخدمو بيهم ناس مختصين فمجال تحليل البيانات..
بعض منكم غايتسائل ويقول، كيفاش نقدر نمسح هاد البيانات بمرة كاع ومايقدر تا حد يرجعهم.. كاينين تطبيقات لي كتموديفي دوك البيانات فعوض مايكنو عبارة عن 1 و 0 كترجعهم كاملين أصفار باش كتخسر البنية ديالهم وماكيقدروش يتعرفو عليهم البرامج ديال الإستعادة. من بين هاد البرامج برنامج Erase.
واحد النقطة يقدر شي واحد يتسائل عليها.. دبا هادشي لي ذكرنا كيخص الديسك دير ديال الحواسيب وخصوصا الديسك دير من نوع HDD حيت هو لي فيه الإبرة..
حتى الديسك دير SSD كتنطابق عليه نفس الحالة.. وحتى الهواتف لأنها كتخدم بنفس تقنية تخزين ال SSD
كولشي عندو طريقة عمل بحال بحال كيتبدل غير الشكل الفزيائي وصافي. نتمنى تكون بانت لكم الفكرة شويا..
هاذو بعض البرامج لي مشهورين ويمكن ليهم يقدرو يعاونوكم فاسترجاع البيانات ديالكم ولو بنسب قليلة:
البرنامج الأول : Recuva
هاد البرنامج هو واحد من أكثر البرامج شعبية وبسيط. كل ماتحتاجه هو تمشي للموقع الرسمي ديالو وتطيلشارجيه.
طريقة التثبيت ديالو راها ساهلة غير Next تا تسالي.
رابط التحميل: كليكي هنا
البرنامج التاني : RS File Recovery
هذا برنامج حتى هو يقدر يكون بديل لـ Recuva حتى هو ساهل أنصطالي دخل واختار القرص الصلب لي باغي.
رابط التحميل: كليكي هنا
البرنامج الثالث : Coolmuster
هذا بالنسبة للناس لي تمسحو ليهم النماري ورسائل الـ SMS .. كيخدم فأجهزة الهواتف لي فيها نظام الـ Android وكيخدم حتى فالوينداوز والماك.
رابط التحميل: كليكي هنا
البرنامج الرابع : Wondershare Dr.Fone
هذا خاص بالهواتف ديال الاندرويد كيرجع كاع الـ DATA كاملة.
رابط التحميل: كليكي هنا
البرنامج الخامس : GT Recovry
هذا أيضا خاص بالهواتف ديال الـ Android وينصح به.
رابط التحميل: كليكي هنا
البرنامج السادس : DiskDigger
هذا تطبيق على Play Store وهو مشهور ويقدر ينفعك حتى هو
رابط التحميل: كليكي هنا
فالأخير صديقي القارئ غانقولك أن هاد التطبيقات ماتعولش عليها 100% حيت نتا وزهرك وصافي.