VTP
بروتوكول VTP .. لمهم هاد البروتوكول غا ديال سيسكو بوحدها.. يعني كيخدم غا فليسيويتش ديال سيسكو فقط.. شنو الدور ديالو؟ الدور ديالو هو كيسهل علينا الكونفيكيراسيون ديال ال VLAN فالسويتشات.. مثلا عندنا بزاف ديال السويتشات.. وخاصنا نكريو فكل سويتش شي 100 VLAN مثلا.. الى جينا ندخلو لكل سويتش بوحدو ونبقاو نكريو فيه فراه غايخصنا وقت وجهد كبييير.. لذلك سيسكو دارت لينا هاد البروتوكول باش تسهل علينا الخدمة.. يكفي نديرو الكونفيكيراسيون غا فسويتش واحد وغادي تدار اوتوماتيك فكاع السويتشات لي بغينا نكونفيكيريوهم..
.
اجيو نشوفو كيفاش كيخدم هاد البروتوكول..
عندنا فيه ثلاثة ديال لي مود..
Mode Server / Mode Client / Mode transparant
لنفترض عندنا خمسة ديال السويتشات وبغينا نديرو فكل سويتش عشرة ديال ال VLAN غانختارو شي سويتش لي غانديرو فيه الكونفيكيراسيون.. وغادي نعطيوه Mode Server باش هو لي غايفرق ديك الكونفيكيراسيون على لي سويتش لاخرين..
الكوموند لي كنستعملو باش نعطيوه هاد المود:
Switch1(config)#vtp mode server
طبعا خاصنا نكونو فالمود كونفيكيراسيون كلوبال..
من بعد مكنديرو هاد الكوموند خاصنا نكريو الضومين.. بحال داكشي ديال وينداوز سيرفر خاصنا الضومين باش كنتكومينيكاو مع شي لاخر.. هاكا كتكون الكوموند:
Switch1(config)#vtp domain maroc.ma
Switch1(config)#vtp password 1234
هنا كريينا الضومين ديالنا ولي سميناه مثلا maroc.ma
وخاصنا نعطيو مودباص.. ومن مور هادشي كنكريو ال VLANs لي بغينا..
.
ونمشيو للسويتشات لاخرين دبا.. غانطبقو عليهم واحد العملية سهلة باش ياخذو الكونفيكيراسيون حتى هما..
والكوموند غاتكون على هاد الشكل:
Switch3(config)#vtp mode client
Switch3(config)#vtp domain maroc.ma
Switch3(config)#vtp password 1234
هنا عطينا للسويتش المود ديال client يعني غاياخذ داكشي لي عطاه server وعطيناه حتى الضومين لي درنا فالسيرفر والباسوورد كذلك..
وهكذا غايكون هاد السويتش خدا نفس الكونفيكيراسيون لي درنا فالاول.. بلامااا نبقاو نعاودها فيه ونضيعو الوقت ونضربو تمارة..
.
بقى لينا المود الاخير ولي هو transparant ..
هاد المود كنديروه الى كان عندنا سويتش بين جوج سويتشات.. ومابغيناهش ياخذ الكونفيكيراسيون.. يعني بغيناه يبقى عادي ولكن السويتش لي من موراه بغيناه ياخذ الكونفيكيراسيون.. هنا فين كيجي دور هاد المود..
وهاكا كتكون الكوموند:
Switch2(config)#vtp mode transparant
Switch2(config)#vtp domain maroc.ma
Switch2(config)#vtp password 1234
حتى هو كنعطيوه المود ديالو.. والضومين والباسوورد.. وفالاخير هو ماكياخذش الكونفيكيراسيون.. كيبقى عاادي غير كنديروه طريق باش يدوز الكونفيكيراسيون للسويتش لي موراه.. يعني هو غا قنطرة وصافي..
هادشي لي كنديرو.. وطبعا مانساوش نديرو ال trunk فكاع ليزانطيرفاس ديال السويتشات باش يتكومينيكاو مع بعضهم..
هادشي لي كاين.. نتلاقاو فشي شرح اخر ان شاء الله.. نتمنى تكونو ستافدتو.
