TCP/IP
هاد البروتوكول نقدرو نعتبروه الأب الروحي ديال بزاف دالبروتوكولات.. يعني هو بروتوكول وفخدمتوا نيت كيخدموا معاه برتوكولات اخرى.. لمهم هاد البروتوكول خاص بالاتصال بين الاجهزة باش يتواصلوا مع بعضهم داخل الانترنت.. وهو اختصار لجملة:Transmission Control Protocol / Internet Protocol
وكتعني التحكم فنقل البيانات.. هو بروتوكول كيتحكم فالارسال والاستقبال ديال لي دوني وسط الانترنت بين الاجهزة.. وكيضمن لك بلي راه البيانات ديالك وصلوا للبلاصة لي بغيتي تصيفطهم ليها.. والى ماوصلوش كيقولها لك.. بحال ديك القضية ديال رسائل الـ SMS ملي كيوصل الميساج كيقولك راه مشى.. والى ما مشاش كيرجع لك ميساج بلي راه ما مشاش.. وهنا فين كاين الفرق بين TCP/IP و UDP هاد الـ UDP حتى هو بروتوكول وكان هو الاول خرج.. لكن ملي كتصيفط عن طريقوا شي بيانات ماكيقولكش واش وصلوا ولا لا.. يعني نتا وزهرك يقدروا يمشيو يقدروا لا.. يقدروا يمشيو فيهم غا النص.. وجا TCP/IP باش يحل هاد المشكل.. لكن TCP/IP تقيل فالخدمة.. عكس الـ UDP لي خفيف وكيوصل داكشي بزربا..
والدور ديالو بصفة عامة.. هو كيصيفط ويستقبل البيانات بعد ما كيقسمهم لإيطاب.. (وغانهضروا على هاد لي طاب من بعد).. وأيضا بالفضل ديالو كنعرفوا المنافذ (Les Ports) ديال البروتوكولات.. وكينقسم لجوج انواع:
TCP: وهاد الجزء مختص فترقيم أجزاء البيانات.. يعني ملي كتبغي تصيفط شي دوموند لشي حاجة.. كيرقم هو ديك الديموند باش ملي يوصلوا عند الجهة لي نتا مصيفطهم ليها.. كيعاود يجمعهم بالترتيب وعاد يقراهم ويجاوبك.. ومن المميزات ديالو أنه كيراقب الى كانت شي حاجة ناقصة فحزمة البيانات.. كيعلمك ويقولك راه ناقصة شي حاجة عاود صيفط.. وأيضا الى وقع شي مشكل فالاتصال بحال المشاكل لي ذكرنا فالسطاتي ديال رسائل الخطأ لي كتعرض ليها خلال التصفح.. هو كيعاود يجمع الحزم بسرعة ويعاود يصيفطهم.. كمثال بسيط باش تفهم.. مثلا كتكتب شي كلمة فگوگل يالاه كتكليكي اونطخي.. كتقطع الكونيكسيون مثلا.. يعني الروكيط مزال ما مشاتش.. ملي كترجع الكونيكسيون كتلقاه دار أكتياليزي وجاوبك.. يعني عاود جمعهم راسو.. بلاما تعاود نتا تكتب..
IP: وهاد الجزء مختص فتقسيم أجزاء البيانات.. يعني كيقسم ديك الدموند لأجزاء.. وبعد ما كيرقمها ليه TCP كيصيفطها هو للحاسوب لي غاتمشي ليه هاد الدوموند.. وداكشي كيوقع عن طريق التعرف على الأيبي ديال الجهاز لي غايتصيفط ليه..
.
وبالنسبة للبروتوكولات لي كتخدم مع TCP/IP :
" UDP " User Datagram Protocol.
اتصال بسيط بين التطبيقات.
" ICMP " Internet Control Message Protocol.
وهذا هو لي كيصحح الأخطاء.
" DHCP " Dynamic Host Configuration Protocol.
وهذا كيعطينا لي زادريس اوتوماتيك (ديناميك)
وهاذوا حتى هما غا نشرحوهم من بعد.. وكل مرة نزيدوا معلومة حتى تعرفوا كل واحد ديالاش وتعرفوا حتى البروتوكولات لي كيخدموا مع بعضياتهم..
