ضيفنا هاد النهار بروتوكل http.. هاد البروتوكول المشهور ولي كنستعملوه بزااف فحياتنا الأنترنيتية ..هاد البروتوكول الدور ديالو هو ينقل المعلومات من الموقع للمتصفح ديال الشخص لي باغي المعلومات..
وكالعادة داكشي ماكيجيش غير عبثا.. ضروري كيتلعبو شي بلانات مور الكواليس.. ولي هما ملي نتا كتكتب شي لعبة فالمتصفح ديالك.. كتمشي الروكيط للموقع لي فيه داكشي لي نتا باغي.. والموقع كيجاوب على ديك الروكيط.. والمتصفح ديالك كيقوليه صافي نعاماس راه داكشي وصل فآمان الله.. وطبعا كااينين بلانات اخرى كتوقع وغانهضروا عليها فيما بعد.. حنى دبا كنهضروا غا على خدمة الـ http..
يعني هاد البروتوكول الدور ديالو هو يآفيشي ليك المعلومة لي كيجيبها من الموقع.. صافي هاذي هي خدمتو.. غير هو هاد الـ http ملي كيجيب لك المعلومة بحالا كيجيبها وهو هازها فميكة بيضا.. كولشي يقدر يشوف اش فيها وخا ماكتهموش.. داكشي علاش جا التوأم ديالو لي زايد عليه بنغزة.. ولي هو https ولي كيجيب المعلومة فميكة كحلة وسط من صندوق كحل مسدود بقفل .. كيديرو نفس الخدمة الفرق بيناتهم هو السيكيريطي.. وهاد الاخير أكثر حماية من الأول.. والغلاف لي مغلف بيه هاد البروتوكول ولي شبهناه بالميكة الكحلة.. هو البروتوكول SSL لي كيدير عملية التشفير (الكريبطاج) وحتى هو غانهضروا عليه ان شاء الله..
يعني مثلا نتا دخلتي شي باسوورد فيه simo هو كيرجع ديك سيمو مخربقة باش هاكا ملي كيتجسس عليك شي هاكر مثلا.. الى لقى الباسوورد غايلقاه مشفر وماغايعرفوش.. وهاد التشفير لي كيدير هاد البروتوكول ماكيحلو حتى شي حد من غيرو نيت.. وهادشي غانهضروا عليه حتى هو فموضوع مفصل باش تفهموا..
رغم هاد الحماية كاملة ماكافياش.. وجا بروتوكول آخر بنفس الوظيفة ديال SSL لكن أقوى منو.. ولي هو TLS وحتى هو غانشرحوه فيما بعد..
ضونك ملي تبغي تكونيكطا وبالأخص الى كنتي غاتدخل لشي موقع لي غاتدفع فيه فلوس ولا غاتحط شي باسوورد ولا شي حاجة مهمة.. ديما تأكد من السيت بلي فالبداية ديالو كاينة Https باش هاكا معلوماتك يكونو فأمان..
مفاهيم:
HTTP: HyperText Transfer Protocol
HTTPS: HyperText Transfer Protocol Secure
SSL: Secure Socket Layer
TSL: Transport Layer Security
