Artificial Technology
بهاد التطور السريع ديال العلم.. خصوصا فمجالات التكنولوجيا وبالضبط فالذكاء الاصطناعي.. الأمر يزداد خطورة..
التقنيات لي كيخرجو شي حاجة خرافية يا صديقي.. خلينا من الخواريزميات ديال التجسس على الانسان.. بحال اليابان لي دايرين الكاميرات فأي بلاصة مشيتي ليها.. وكاميرات ماشي عادية بل مجهزة بتقنيات الذكاء الاصطناعي لي كتاخذ الصور ديال بنادم وكتحللها وتعرف سمياتهم وفين كيسكنو وفين كيمشيو ووو.. لدرجة أنه الى رتاكبتي جريمة عندهم فظرف 6 دقايق غايجبدوك
واا 6 دقايق اعصااام !!
طبعا هو شيء جميل نشوفو بحال هادشي لأنه غاتقل نسبة الجريمة والناس غايعيشو مرتاحين.. ولكن خايبة فنفس الوقت بالنسبة لخصوصية الانسان..
.
خلينا من هادشي اجي نشوفو تقنيات الذكاء الاصطناعي لي ولاو كيستعملوها للروبوتات باش يقلدو الانسان.. بحال الروبوت ديال "صوفيا" لي كتمتاز بالهندسة الاجتماعية.. يعني كتقدر تكومينيكا مع بنادم انطلاقا من الحركات دالوجه ديالو وتقدر تطرح عليها سؤال كتفكر فيه بدون ماتقلب عليه فلاباز دوني ! واو هادشي هارب.
بلاتي بلاتي دبا بعدا هاد الخواريزميات راه ماشي كلهم كيخدمو مجموعين.. بل كل خواريزمية كتخدم فجهة وكتخدم بوحدها.. يعني مثلا خواريزمية تحليل الصوت كتخدم بوحدها.. وخواريزمية تحليل الصورة كتخدم بوحدها وقس على ذلك..
العلماء حاليا قالك خاصنا نجمعو كااع هاد الخواريزميات كلها.. ونديروها فقاعدة بيانات واحدة.. باش تبقى تواصل مع بعضها وتولي أقوى ذكاءا..
يعني بغاو يرجعوها بحال بنادم تمااما.. عندنا العقل هو لاباز دوني ديالنا هو لي كيتحكم فالجسم كامل..
كذلك بغاو يديرو مع هاد الخواريزميات..
الأمر كان شويا غير منطقي.. لكن جات شركة اسمها
SingularityNET
وقالت ليهم تا را ماكايناش شي حاجة ماشي لوجيك.. جمعات كااع الخواريزميات لي مصنوعين من عدة شركات.. وقالت ليهم اراو ليا دوك الخواريزيمات ديالكم كاملين نحطوهم فقاعدة بيانات واحدة.. الاخرين قالو مرحبا وكولشي حط الخواريزميات ديالو..
وفعلا هادشي لي دار مع "صوفيا" حتى ولات بهاد الذكاء..
حتى لهنا غانصفقو على هاد العلماء لي وصلو لهادشي كامل..
البلان كاين فأنه قالك خاصهم يخليو هاد الخواريزميات كااملة تبدا تعلم من بعضياتها بطريقة اوتوماتيكية بلا ما يدخلو فيها هما..
بهدف أنها تلبي الخدمات ديال الانسان طبعا..
.
لكن تخيل معايا آ حمادي هاد الخواريزيمات ملي تبدا تكومينيكا مع بعضها وتخلق بدورها هي نيت ذكاء اصطناعي اخر فين غانوليو ديك الساعة؟
ف 2017 مقدار التعاملات المالية من خلال استخدام أنظمة الذكاء الاصطناعي وصل ل 234 مليار دولار. وكيقولو انه من هنا لشي 6 سنين غايولي المبلغ 3 تريليون!
مبلغ ماكيجمعو غا الفم كيف كنقولو..
ايماجيني معايا هاد الاطنان الهائلة ديال هاد الاكواد البرمجية دير علينا انقلاب ؟
تبدا تصنع خواريزيمات غا بوحدها نيت.. دير قاعدة باينات مخفية.. تعاود تجي خواريزمية اخرى دير شي كريبطاج خاص بها.. تجي عوتاني خواريزمية اخرى مختصة فنقل الاموال تهز ديك 3 تريليون وتحطها فديك لاباز دوني المخفية..
تا را العالم غا يروح فالخسران.. غادي يتدمر الاقتصاد ديال العالم كامل الى وقع بحال هاكا.
لأن الدول لي كتحكم العالم الآن كتحكمو بالقوة الاقتصادية وليست العسكرية !
