فهاد التدوينة غانشرحوا الطريقة لي كتخدم بها الأنترنت.. وغادي نشرحها بشكل مبسط جدا.. لأن بعض الناس هنا يالاه مبتدئين ماكيعرفوش مصطلحات تقنية وماعمر سبق لهم شافوهم..
الانترنت ولا كيف ما كيطلقو عليها الشبكة العنكبوتية.. هما بزاف ديال البيسيات مرتابطين مع بعضهم.. ولي كنطلقوا عليهم إسم السيرفر (Server) باللغة العربية سميتو الخادم.. يعني إلى لاحظتوا أن الاسم ديالو منطقي وموخود من الواقع ديالنا.. نسبة للسرباي لي كيكون فالقهوة.. كتجلس كتعيط ليه كتقولو بغيت قهوة نص نص.. كيمشي يجيبها لك.. نفس الشيء مع هاد السيرفر ديال الانترنت.. نتا كتطلب منو شي حاجة ولي كتسمى فعالم المعلوميات بالـ (Requete) ولا الدوموند.. يعني كدوموندي اشنو بغتي.. وهو كيحضر لك داكشي لي باغي نتا.. هاكا كتم العملية ببساطة..
نزيدو نتعمقوا شويا من بعد ماعطينا هاد المقدمة الصغيرة..
نتا طبعا كتشد الطيلي ولا بيسي وكتربطهم بالانترنت.. (هاد الطريقة معقدة شويا.. خاصكم حتى تفهموا هادشي لي أساسي ومن بعد غانشرحوا داكشي لاخور)..
كتمشي نتا كتكتب فشي متصفح.. موقع فايسبوك مثلا.. هنا نتا راك كتصيفط دوموند ديالك.. هاد الدوموند عندها واحد الفترة محددة الى ماوصلاتش كيفشل الاتصال وهنا فين كيطلع ليك شي ميساج من دوك الميساجات لي ذكرنا فالمقال ديال ماذا تعني رسائل الخطأ لي كتواجهكم خلال التصفح.. لمهم ديك الدوموند كتلعب واحد الدور فالكواليس (هادشي كامل غانشرحوه فيما بعد) وكتمشي للسيرفر لي خاصها تمشي ليه وهاد السيرفر عبارة عن بيسي عاادي را ماشي شي حاجة لي غريبة.. غا هو مجهد على البيسيات العاديين لي كنخدمو بيهم.. عموما هاد السيرفر كيكون ديما خدام 24/24 ساعة و 7/7 ايام.. ماخاصوش يطفى گاع ولا يخسر.. باش كيبقى ديما فالخدمة..
ربما السؤال لي غايتلاح لدماغكم دبا هو كيفاش زعما هاد اللعيبة.. واش هاد 5 مليار ديال المواقع كاملة لي كاينة فالعالم كلها كتمشي لسيرفر واحد ؟
طبعا لا وألف لا لأنه من المستحيل سيرفر واحد يتحمل هادشي كامل.. نعطيكم مثال بسيط باش تفهموا.. ناخذو موقع گوگل الشهير.. كوكل عندها شي 3 ديال سيرفيرات.. والى دخلتي دبا لشي متصفح وطابيتي فيه گوگل بوان كوم.. غاتشوف السرعة لي غايجاوبك بها.. وفاللحظة لي نتا دخلتي لكوكل راه الملاييين نحو العالم طاباو نفس الدوموند فنفس الوقت وجاوبكم كاملين بسرعة.. هادشي علاش گوكل دايرة 3 سيرفيرات على قبل الضغط ديال الناس لي كيدخلو للموقع ديالهم.. باش كولشي يقدر يدخل بزربا دارت 3 باش الضغط مايكونش غير على سيرفر واحد.. وباش حتى الى خسر شي سيرفر مثلا يبقاو جوج لاخرين خدامين وكيجاوبو بنادم.. حيت كون كان عندها غا واحد وطاح أومبان مثلا.. عرفتي شحال ديال الزبناء غا تخسر فكل ثانية..
وكذلك نفس الامر كينطابق على فايسبوك عندها جوج سيرفيرات.. والفايسيوك كل نهار كيدخل ليه حوالي مليار ونص ديال بنادم حول العالم.. باش مايكونش الضغط على سيرفر واحد كيقسموا الادوار بين دوك جوج سيرفرات وهاكا كولشي كيتكونيكطا بيس..
وهاد الامر كينطابق على كاع السيتات.. غير هو كاين شويا ديال الاختلاف.. انا فهاد المثال عطيتك شركات كبار مشهورين.. تقدر تمشي غالط دبا وتقول مع راسك يعني كل موقع عندو سيرفر ديالو.. لا لا.. مثلا انا كنبغي نصاوب شي موقع را ماعنديش سيرفر ديالي طبعا.. ولكن كنشري واحد الضومين من عند شي شركة وهي كتعطيني الضومين كنخدم بيه والسيرفر راه عندها هي.. وهاكا كينطابق الامر عليهم كاملين..
لمهم نوقف هنا باش مانخربقكمش.. بخلاصة هاكا كيفاش كتكونيكطاو كتصيفط الدوموند نتا كيرد عليك السيرفر.. والشرح ديال هادشي هو لي ذكرنا الفوق والسلام عليكم..
مزال غانشرح شي حوايج آخرين فالجزء الثاني
