الفرق بين الفأرة العادية والكيمر ؟

 واش كاين شي فرق بين لاسوري العادية ولاسوري لي كتسمى بالكيمر ؟

الغرض من لاسوري أو الفأرة هو ترجمة الحركة ديال اليد لأبعاد وأرقام يقدر يقراها الحاسوب ديالنا ويعطينا داكشي لي بغينا نوصلو ليه من خلال التحريك او الضغط. وباش تحقق هاد المسألة كنحتاجو مستشعر، وهاد المستشعر هو داك الضوء الاحمر لي كيكون تحت لاسوري كيتسمى بالمستشعر البصري Optical Sensor .

هاد المستشعر كتكون معاه كاميرا صغيرة كتلتاقط مئات الصور فالثانية للحركة ديال الماوس ومن بعد كتدوز للكارط مير ديال لاسوري باش كتحدد الاتجاهات وكتحولهم وترجمهم للحاسوب لي كتكون أول قطعة فيه مستقبلة لدوك المعلومات هو البروسيسور لي بدورو كيحول دوك البيانات للحركة لي كنشوفوها حنى فالشاشة ديالنا، هاد المستشعر كيكون فكاع أنواع لي سوري لي كاينين سواء العاديين أو "الكيمينغ".

كاين نوع آخر من المستشعرات ولي هو عبارة عن ليزر Laser Sensor.

وهذا كيكون غير فليسوري ديال الكيمينغ، كيعتامد على الاشعة فوق البنفسجية، الشيء لي كيخليها تكون أكثر دقة فاستشعار الحركة، لكن المستشعر الضوئي كيتعتابر أفضل داكشي علاش كولشي كيخدم عليه.

مزيان ولكن فين هو الفرق بين الفأرة العادية والاحترافية ؟

بالنسبة للفأرات العادية فكتلقاها تحتوي على جوج ديال الازرار فقط، وكيكون Dpi ديالها نااقص بزاف.. وماكتدومش بزاف لأنها ما مخصصاش لمدة زمنية طويلة ولعدد من الضغطات يكون كبير. على عكس الفأرة الاحترافية. من بين المزايا ديالها أنها فيها أزرار آخرين اضافيين تقدر تكونفيكيريهم وتخدم بيهم كيف بغيتي، وأيضا كيكون معاهم سوفتوير ديالهم تقدر تحكم فالبارميطر ديالها..

وفيها ميزة Polling Rate هاد الميزة كتعبر عن سرعة الإستجابة ديال الفأرة فإرسال البيانات للحاسوب وكتحسب بوحدة الـ Hz وكلما كان معدل الهيرتز مرتفع فالفأرة كلما كانت أحسن.

وأيضا مسألة Dpi لي دوينا عليها قبيلا ولي كتعني Dots per inch هاذي وحدة قياس لمستشعر الحركة ديال الفأرة.. وشحال ما كان معدل الـ Dpi طالع شحال ما كانت لاسوري مزيانة.

وأيضا الفأرة الاحترافية كتمتاز بطول العمر بحيث أنها كتصبر لعدد كبير من الضغطات يصل لعشرات الملايين ضغطة. وكتكون مصنوعة من مواد جيدة مقارنة مع الفأرات العادية. وأيضا فيها الألوان والشكل ديالها جذاب وزوين

والفرق كاين أيضا فالثمن الفأرة العادية دايرة 20 درهم تا لـ 60 درهم.

أما الاحترافية دايرة 400 درهم تا ل 1500 درهم. نتا وجهدك.. ولكن غير ديال 400 درهم راها كافياك فقط ركز على معدل الـ Polling Rate يكون كبير.. والى كانت عندك مونيتور كبيرة وفيها روزيليسيون كبيرة ركز أيضا على معدل الـ Dpi